Skip to content

Skip to secondary menu

Skip to table of contents

Molimau a Ieova

Faa-Samoa

Lesona E te Aʻoaʻoina Mai i le Tusi Paia

 LESONA 60

Se Malo e Tumau e Faavavau

Se Malo e Tumau e Faavavau

I se tasi pō, na fai ai se miti uigaese a le tupu o Nepukanesa, ma e leʻi lelei ai lana moe. Na ia aami ana taulāitu ma faapea atu iā i latou: ʻFaamatala mai laʻu miti na fai.’ Na latou tali mai: ʻLe tupu e, taʻu mai lau miti.’ Ae na fai atu Nepukanesa: ʻLeai! Ia faamatala mai le mea na ou miti ai, a leai o le a ou fasiotia outou.’ Na latou toe tali mai: ʻTaʻu mai lau miti, ona matou faamatala atu lea o lona uiga.’ Na fai atu Nepukanesa: ʻO loo outou taumafai uma e faasesē aʻu. Faamatala mai laʻu miti.’ Na latou faapea atu i le tupu: ʻE leai se tagata i lenei lalolagi e mafai ona faia lenā mea. E faigatā le mea ua e talosaga mai ai.’

Na matuā ita Nepukanesa, ma o lea na ia faatonuina ai le fasiotia o taulāitu ma tagata atamamai uma i Papelonia. Na aofia ai Tanielu, Sataraka, Mesako ma Apeteniko. Na talosaga atu Tanielu i le tupu ina ia tuu atu se taimi. Ona latou tatalo lea ma ana uō e toʻatolu iā Ieova e fesoasoani mai iā i latou. O le ā na faia e Ieova?

Na faaali mai e Ieova iā Tanielu i se vaaiga le miti a Nepukanesa ma le uiga o lenā miti. I le aso na sosoo ai, na alu atu ai Tanielu i le auauna a le tupu ma fai atu: ʻAua neʻi e fasiotia tagata atamamai. E mafai ona ou faamatalaina le miti a le tupu.’ Na ave e le auauna Tanielu iā Nepukanesa. Na faapea atu Tanielu i le tupu: ʻUa faailoa mai e le Atua iā te oe mea o le a tutupu i le lumanaʻi. O lau miti lenei: Na e vaaia se faatagata telē, o lona ulu ua faia i le auro, o lona fatafata ma ona lima o siliva, o lona manava ma ona ogāvae o le ʻapamemea, o ona vae e uʻamea, o ona tapuvae o le uʻamea e fefiloi ma le omea. Ona iai lea o se maa ua tofia mai i le mauga, ma ua taia ai tapuvae o le faatagata. Na matuā nutililii le faatagata ma ua lelea i le matagi. Na avea le maa ma mauga telē, ma ua tumu ai le lalolagi atoa.’

 Ona faapea atu lea o Tanielu: ʻO le uiga lenei o lau miti: O le ulu ua faia i le auro, o lou malo lea. Pe a mavae atu lou malo ona tulaʻi mai lea o se isi malo, o le siliva lea. O le isi malo e tulaʻi mai e pule i le lalolagi atoa, o le apamemea lea. O le isi malo, o le a malosi e pei o le uʻamea. Mulimuli ane, ona tulaʻi mai lea o se isi malo. O le a vaeluaina lenei malo, o isi vaega e malosi e pei o le uʻamea ae o isi vaega e vaivai e pei o le omea. O le maa lea o le a avea ma mauga, o le Malo o le Atua. O le a nutililii e lenā Malo isi malo uma, ae e tumau lenā Malo e faavavau.’

Ona faapaʻū faō ai lea o Nepukanesa i luma o Tanielu ma faapea atu: ʻNa faailoa atu e lou Atua lenei miti iā te oe. E leai se Atua e pei o ia.’ Nai lo o le fasiotia o Tanielu, ae na tofia o ia e Nepukanesa e sili i ē e pule i tagata atamamai uma, ma avea ma pule i le itumalo o Papelonia. Pe na e iloa le auala na taliina ai e Ieova le tatalo a Tanielu?

ʻUa latou faapotopoto iā i latou i le mea ua igoa i le upu Eperu o Amaketo.’—Faaaliga 16:16