Accessibility setting

Filifili le gagana

Skip to secondary menu

Skip to content

Molimau a Ieova

Faa-Samoa

Pe E te Fia Iloa le Upu Moni?

Pe E te Fia Iloa le Upu Moni?

O LE upu moni e faatatau i le ā? E faatatau i nisi o fesili aupito i tāua ua fesili ai tagata. Atonu na e taumānatu i fesili e pei o fesili nei:

  • Po o manatu moni mai ea le Atua iā i tatou?
  • Po o le a faai‘uina ea taua ma puapuaga?
  • O le ā e tupu iā i tatou pe a tatou feoti?
  • Pe iai se faamoemoe mo ē ua maliliu?
  • O le ā le auala ou te tatalo ai ina ia faafofoga mai le Atua?
  • E faapefea ona ou maua le fiafia i le olaga?

O fea e te maua ai tali o nei fesili? Pe afai e te alu i faletusi po o fale e faatau ai tusi, e te ono maua ai le faitau afe o tusi o loo faapea mai e maua ai tali. Ae, e masani lava ona feteena‘i faamatalaga a na tusi. O isi tusi e foliga mai o loo aogā i le taimi nei, ae e lē umi ae uma le aogā ma mana‘omia ona toe faafou manatu o iai, pe toe sui fo‘i.

Peita‘i ane, o loo iai se tusi ua maua ai tali maufaatuatuaina. O se tusi o loo iai faamatalaga moni. Na ta‘ua e Iesu i lana tatalo i le Atua e faapea: “O lau afioga o le upu moni lea.” (Ioane 17:17) Ua tatou iloa i aso nei o lenā Afioga, o le Tusi Paia lea. I itulau o loo sosoo mai, o le a faamatala faapuupuu ai tali e moni a‘ia‘i ma manino lelei mai le Tusi Paia, i fesili e pei ona ta‘ua i luga.

Po o Manatu Moni Mai ea le Atua iā i Tatou?

O le tamāloa ua si‘omia e tagata

LE MĀFUAAGA UA LĀGĀ AI LE FESILI: Ua tatou ola i se lalolagi ua tumu i le sauā ma faiga lē tonu. Ua a‘oa‘o e le tele o lotu e faapea, o puapuaga o loo tatou feagai, o le finagalo lea o le Atua.

A‘OA‘OGA A LE TUSI PAIA: E lē mafai ona faapogaia e le Atua le amio leaga. Ua ta‘ua i le Iopu 34:10: “E mamao ma le Atua ona ia amio leaga.” O loo iai se fuafuaga alofa a le Atua mo tagata. O le māfuaaga lea ua a‘oa‘o ai i tatou e Iesu e tatalo faapea: “Lo matou Tamā e, o i le lagi, ia…oo mai lou malo. Ia faia lou finagalo i le lalolagi, e pei ona faia i le lagi.” (Mataio 6:9, 10) E manatu mamafa mai le Atua iā i tatou, lea ua ia faia ai se gaoioiga ina ia faamautinoa le faataunuuina o lana fuafuaga.-Ioane 3:16.

Taga‘i fo‘i i le Kenese 1:26-28; Iakopo 1:13; ma le 1 Peteru 5:6, 7.

Po o le a Faai‘uina ea Taua ma Puapuaga?

O fitafita

LE MĀFUAAGA UA LĀGĀ AI LE FESILI: Ua faaauau ona maliliu le anoanoa‘i o tagata ona o taua. Ua oo iā i tatou uma lava tulaga o loo pagatia ai tagata.

A‘OA‘OGA A LE TUSI PAIA: Ua valoia e le Atua le taimi o le a ia faatumauina ai le filemu i luga o le lalolagi. I le pulega a lona Malo i le lagi, o le a lē toe iai ni tagata e ‘a‘oa‘o i taua.’ Nai lo lenā, o le a latou “tu‘i…a latou pelu e fai ma uamea o suotosina.” (Isaia 2:4) O le a faai‘uina e le Atua tulaga lē amiotonu uma faapea ma mafatiaga. Ua folafola mai e le Tusi Paia: “E na te soloiesea fo‘i loimata uma i o latou mata, e lē toe iai se oti, po o se faanoanoa, po o se tagiauē, e lē toe iai fo‘i se tigā. Auā ua mavae atu mea muamua [lea e aofia ai faiga lē tonu ma puapuaga].”-Faaaliga 21:3, 4.

Taga‘i fo‘i i le Salamo 37:10, 11; 46:9; ma le Mika 4:1-4.

O le ā e Tupu iā i Tatou pe a Tatou Feoti?

O ni tuugamau

LE MĀFUAAGA UA LĀGĀ AI LE FESILI: Ua a‘oa‘oina e le tele o lotu i le lalolagi e faapea, e iai se mea i totonu o le tagata e faaauau ona ola pe a oti le tagata. E manatu nisi, e mafai e tagata ua feoti ona faatupuina ni mea leaga i tagata o loo feola, po o le faasalaina fo‘i e le Atua le tagata leaga e ala i le faapuapuagatia e faavavau i le afi i seoli.

A‘OA‘OGA A LE TUSI PAIA: Pe a oti le tagata, ua lē o toe ola. Ua faapea mai le Failauga 9:5: “O ē ua oti, latou te lē iloa se mea.” Talu ai la o i latou ua feoti ua lē o toe iloa, lagona, po o le malamalama i so o se mea, e latou te lē mafai la ona faatupuina ni mea leaga-pe fesoasoani iā i latou o feola.-Salamo 146:3, 4.

Taga‘i fo‘i i le Kenese 3:19 ma le Failauga 9:6, 10.

Pe Iai se Faamoemoe mo Ē ua Maliliu?

O se tamaitiiti o faavauvau ona o le maliu o se pele

LE MĀFUAAGA UA LĀGĀ AI LE FESILI: E tatou te manana‘o e faaauau pea ona ola, ma e tatou te manana‘o e olioli i le ola ma i latou e tatou te alolofa i ai. O le tulaga masani lo tatou moomoo e toe vāai i ē pele iā i tatou ua maliliu.

A‘OA‘OGA A LE TUSI PAIA: O le to‘atele o i latou ua feoti o le a toetutū mai. Na folafola e Iesu e faapea, o “i latou uma o loo i tuugamau…latou [te] ō mai ai.” (Ioane 5:28, 29) Ina ia ōgatasi ma le ulua‘i fuafuaga a le Atua, o tagata o le a toetutū mai, o le a maua le avanoa e ola ai i le lalolagi parataiso. (Luka 23:43) O lenei lumana‘i ua folafola mai, e aofia ai le soifua mālōlōina, ma le ola e faavavau mo tagata usiusitai. Ua faapea mai le Tusi Paia: “E fai lava le nuu mo tagata amiotonu, e nonofo ai pea i latou.”-Salamo 37:29.

Taga‘i fo‘i i le Iopu 14:14, 15; Luka 7:11-17; ma le Galuega 24:15.

O le ā le Auala Ou te Tatalo ai Ina ia Faafofoga Mai le Atua?

O loo tatalo se tamāloa

LE MĀFUAAGA UA LĀGĀ AI LE FESILI: E toetoe o tagata i lotu uma lava e tatalo. Ae, e lagona e nisi faapea, e lē o taliina a latou tatalo.

A‘OA‘OGA A LE TUSI PAIA: Na a‘oa‘o i tatou e Iesu ia ‘alofia le toe ta‘ua pea o faaupuga lava e tasi i a tatou tatalo. O lana fetalaiga, “Pe a e tatalo, aua le faia soo au upu masani.” (Mataio 6:7) Pe afai e tatou te manana‘o e faafofoga mai le Atua i a tatou tatalo, e ao ona tatou tatalo atu i le auala e na te taliaina mai. Ina ia faia lenā mea, e tatau ona tatou a‘oa‘oina le finagalo o le Atua ona tatalo lea ia ōgatasi ma lona finagalo. Ua faamatalaina i le 1 Ioane 5:14: “Po o ā lava mea tatou te talosaga atu ai e tusa ma lona [le Atua] finagalo, e faafofoga mai lava o ia iā i tatou.”

Taga‘i fo‘i i le Salamo 65:2; Ioane 14:6, 14; ma le 1 Ioane 3:22.

E Faapefea Ona Ou Maua le Fiafia i le Olaga?

Ua sa‘ilia e le fafine le fiafia e ala i le faitauina o le Tusi Paia

LE MĀFUAGA UA LĀGĀ AI LE FESILI: E to‘atele tagata e talitonu faapea, o le mauaina o tupe, ia ta‘uta‘ua, po o le lalelei, o le a latou maua ai le fiafia. O le māfuaaga lenā ua latou sa‘ilia ai na mea-ae latou te iloa mulimuli ane e latou te lē o mauaina le fiafia.

A‘OA‘OGA A LE TUSI PAIA: Na faailoa e Iesu le auala e maua ai le fiafia ina ua faapea mai: “E fiafia o ē naunau i mea faaleagaga, auā e fai mo i latou le malo o le lagi.” (Mataio 5:3) E na o le pau le auala e tatou te maua ai le fiafia, o le faia o laasaga e faamalieina ai lo tatou mana‘oga e sili ona tāua-o lo tatou naunau lea i mea moni faaleagaga e uiga i le Atua ma ana fuafuaga mo i tatou. O loo maua lenā upu moni i le Tusi Paia. O le iloa o lenā upu moni, e fesoasoani iā i tatou e iloa ai le mea e tāua moni, ma le mea e lē tāua. O le tuu atu i upu moni o le Tusi Paia e ta‘ita‘ia a tatou filifiliga ma gaoioiga, o le a maua ai se olaga e sili atu ona faamalieina.-Luka 11:28.

Taga‘i fo‘i i le Faataoto 3:5, 6, 13-18 ma le 1 Timoteo 6:9, 10.

O sina vaaiga puupuu lea i tali a le Tusi Paia i nei fesili e ono. Po o iai nisi mataupu o e fia malamalama i ai? Pe afai o oe o se tasi o loo “naunau i mea faaleagaga,” e lē fesiligia o le tulaga lenā o loo e mana‘o ai. Atonu o loo e taumānatu i nisi fesili, e pei o lenei: ‘Pe afai e manatu mai le Atua iā i tatou, aiseā la ua ia lē taofia ai le tele o mea leaga ma puapuaga ua tutupu i le talafaasolopito o le tagata? E faapefea ona faaleleia le tulaga o lo‘u olaga faaleaiga?’ O loo aumai i le Tusi Paia ni tali atoatoa ma faamalieina ai, mo nei fesili ma le tele o isi fesili.

Ae peita‘i, o le tele o tagata i aso nei e latou te faatalatū e su‘e i le Tusi Paia. E latou te manatu o se tusi e telē tele, e faigata i nisi taimi ona malamalama i ai. Pe e te mana‘o i se fesoasoani e su‘e ai tali o loo i le Tusi Paia? O loo ofo atu e Molimau a Ieova ni fesoasoani se lua e aogā iā te oe.

Muamua, o le tusi O ā A‘oa‘oga Moni a le Tusi Paia? ua faatulaga e fesoasoani i tagata pisi e iloilo ai tali manino mai le Tusi Paia i fesili tāua. O le vala lona lua, o se polokalame o su‘esu‘ega faale-Tusi Paia i le aiga, e aunoa ma se totogi. E faia fua lenei su‘esu‘ega e se Molimau a Ieova e agavaa e a‘oa‘o le Tusi Paia, ma e mafai ona alu atu i lou aiga po o se isi nofoaga e talafeagai, ma lua talanoaina puupuu le Tusi Paia i vaiaso ta‘itasi. E faitau miliona tagata i le lalolagi ua latou maua aogā mai lenei polokalame. O le to‘atele o i latou ua faapea mai ma le fiafia: “Ua ou maua le upu moni!”

E lē mafai ona e maua se isi ‘oa e sili atu. E tuusa‘oloto i tatou e upu moni o le Tusi Paia mai talitonuga faanuupō, le fenuminumia‘i, ma le soona fefe vavale. E aumaia iā i tatou le faamoemoe, fuafuaga o le olaga, ma le olioli. Na fetalai Iesu: “E iloa e outou le upu moni, e tuusa‘oloto fo‘i outou e le upu moni.”-Ioane 8:32.

1. Ua a‘oa‘oina e le tamāloa a‘oa‘oga a le Tusi Paia; 2. Ua a‘oa‘oina e le fafine a‘oa‘oga a le Tusi Paia

Faitau Atili

Aiseā e Su‘esu‘e ai le Tusi Paia?

Ua fesoasoani le Tusi Paia i le faitau miliona o tagata i le lalolagi aoao, ina ia maua tali o fesili tāua e faatatau i le olaga. Pe e te fia iloa tali o na fesili?