Skip to content

Skip to secondary menu

Skip to table of contents

Molimau a Ieova

Faa-Samoa

Iesu—Le Ala, le Upu Moni ma le Ola

 MATAUPU 83

O ni Valaaulia i se Taumafataga

O ni Valaaulia i se Taumafataga

LUKA 14:7-24

  • SE LESONA E FAATATAU I LE LOTOMAULALO

  • UA FAI FAAMOLEMOLEGA LE ʻAUVALAAULIA

O loo iai pea Iesu i le fale o se Faresaio, ina ua māeʻa ona ia faamālōlōina se tamāloa sa maua i le maʻi fulafula. Ua ia mātauina le auala ua filifili ai e isi tagata valaaulia nofoaga sili mo i latou i le taumafataga, ma ua ia faaaogā lea avanoa e aʻoaʻo atu ai se lesona e faatatau i le lotomaulalo.

Ua fetalai atu o ia: “Pe afai e valaaulia oe e se tasi i le ʻaiga o se faaipoipoga, aua e te taoto i le nofoaga sili. Auā atonu na valaaulia foʻi e ia se tasi e sili atu ona tāua nai lo o oe, ona ō atu ai lea o ia ma lē na ia valaaulia ma faapea atu iā te oe, ʻSeʻi nofo atu le alii nei i le nofoaga lenā.’ Ona e alu ai lea ma le māsiasi i le nofoaga e aupito i maulalo.”—Luka 14:8, 9.

Ua toe fetalai atili Iesu: “Pe a valaaulia oe, ia e alu ma taoto i le nofoaga e aupito i maulalo, pe a sau lē na ia valaaulia oe, o le a faapea atu, ʻLaʻu uō e, ia e alu atu i le nofoaga sili.’ Ona faaaloalogia ai lea o oe i luma o mālō uma.” E lē o uiga atu Iesu i le tau ina faaalia o le faaaloalo. Talu ai ua ia faamatalaina: “Auā o sē e faaeaina o ia lava e faamaulaloina lea, a o sē e faamaulalo o ia iā te ia, e faaeaina lea.” (Luka 14:10, 11) O loo taumafai Iesu e faalaeiau lana ʻaufaalogologo e atiaʻe le lotomaulalo.

Ua toe aʻoaʻo atu nei e Iesu se isi lesona i le Faresaio lea sa valaauliaina o ia, i le auala e saunia ai se taumafataga e sili ona tāua i le silafaga a le Atua. “Pe a e faia se taumafataga i le aoauli po o le pō, aua e te valaauliaina au uō, ou uso, aiga, po o ou tuaoi mauʻoa. Atonu latou te toe valaaulia foʻi oe ma toe totogi mai iā te oe. Ae a e faia se taumafataga, ona valaaulia lea o ē e matitiva, o ē e pipili, o ē e pipiʻo o latou vae, ma ē e tauaso; ma o le a e fiafia ai, auā e lē mafai ona latou toe totogi mai iā te oe.”—Luka 14:12-14.

O se gaoioiga masani le valaaulia o uō, tauaiga po o tuaoi e fai taumafataga faatasi, ma e lē o faapea atu Iesu e sesē lenā mea. Peitaʻi, ua ia faamamafa mai o le saunia o se taumafataga mo ē matitiva, o ē e pipili, pe tauaso foʻi e mafai ona aumaia ai le tele o faamanuiaga. Ua faapea atu Iesu i le Faresaio o loo talimālō: “E tauia oe i le toetutū mai o ē e amiotonu.” Ae ua faapea atu se tasi o le ʻauvalaaulia: “E fiafia o lē e ʻai i le malo o le Atua.” (Luka 14:15) Ua iloa e lenei tagata o se faaeaga lenā mea. Peitaʻi, e lē o tagata uma e faaalia lenā lototalisapaia, e pei ona faailoa mai e Iesu i le talafaatusa o loo mulimuli mai:

“Ua faia e se tagata se taumafataga tele i le pō, ma ua ia valaauliaina ai tagata e toʻatele. Ua ia auina atu lana pologa . . . ma faapea atu i ē ua valaaulia, ʻŌ mai loa, auā o lea ua saunia mea uma.’ A ua tofu lava i latou uma ma le faamolemolega e fai mai. Ua faapea mai lē na muamua iā te ia, ʻE faamalie atu e lē mafai ona ou alu atu; ona ua ou faatauina se fanua ma e tatau ona ou alu seʻi vaai i ai.’ A ua faapea mai le isi, ʻE faamalie atu e lē mafai ona ou alu atu, ona ua uma ona faatau aʻu povi e sefulu ma e tatau ona ou alu e siaki.’ A ua faapea mai le tasi, ʻE lē mafai ona ou alu atu, ona o lea faatoʻā uma ona ma faaipoipo ma laʻu avā.’”—Luka 14:16-20.

E matuā lē talafeagai lava nei faamolemolega. E masani lava ona vaavaai muamua e se tasi se fanua po o se lafupovi a o leʻi faatauina. E leai la se māfuaaga e manaʻomia ai ona toe vaavaai i na mea i lea taimi, auā o lea ua uma ona faatauina. O le tagata lona tolu, e lē faapea o loo sauni o ia e faaipoipo. O lea ua uma ona faaipoipo. E lē tatau la ona avea lenā ma itu e taofia ai o ia mai i le taliaina o lea valaaulia tāua. Ina ua faalogo atu le matai i nei faamolemolega, ona matuā ita ai lea o ia ma faapea atu i lana pologa:

“Alu vave nei i ala tetele ma ala vaiti o le aai, ma aumai i inei o ē e matitiva, o ē e pipili, o ē e tauaso ma ē e pipiʻo o latou vae.” Ua māeʻa ona faia e le pologa o lea faatonuga, ma o loo tele pea avanoa i le fale. Ua fai atu le matai iā te ia: “Ia e alu atu i auala ma nofoaga ua siʻomia i le pā, ma pulunaunau i latou e ō mai, ina ia tumu ai loʻu fale. Auā ou te fai atu iā te outou, E leai se tasi o na tagata ua valaaulia e ʻai i laʻu taumafataga o le pō.”—Luka 14:21-24.

O lenei talafaatusa, ua faailoa atu ai le auala ua faaaogā ai e Ieova le Atua ia Iesu Keriso, ina ia tuuina atu le valaaulia i tagata taʻitoʻatasi e maua le tofi i le Malo o le lagi. Ua muamua tuuina atu le valaaulia i tagata Iutaia, aemaise taʻitaʻi lotu. E toetoe o i latou uma ua teena lenā valaaulia a o faagasolo le faiva a Iesu. Peitaʻi e iai foʻi isi o le a valaaulia. Ua faaalia mai ma le manino e Iesu o le a iai se isi valaaulia i le lumanaʻi, ma o le a tuuina atu i ē e faatauvaa o le nuu o Iutaia ma i latou ua liliu i le lotu Iutaia. Ona sosoo ai lea ma le valaaulia lona tolu ma o le valaaulia mulimuli foʻi lea. O le a tuuina atu lenei valaaulia iā i latou ia e manatu i ai tagata Iutaia e leai se aogā i le silafaga a le Atua.—Galuega 10:28-48.

O le mea moni, o fetalaiga a Iesu ua faamaonia ai le moni o upu a se tasi o le ʻauvalaaulia: “E fiafia o lē e ʻai i le malo o le Atua.”

Faitau Atili

TALA LELEI MAI I LE ATUA!

O le ā le Malo o le Atua?

O ai le Tupu o le Malo o le Atua, ma o ā mea o le a faataunuuina e lenā Malo?