Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

Iesu—Le Ala, le Upu Moni ma le Ola

 MATAUPU 88

Se Suiga mo le Tagata Mau‘oa ma Lasalo

Se Suiga mo le Tagata Mau‘oa ma Lasalo

LUKA 16:14-31

  • TALAFAATUSA I LE TAGATA MAUʻOA MA LASALO

E tele fautuaga aogā sa avatu e Iesu i ona soo e faatatau i le auala e faaaogā ai ʻoa faaletino. Peitaʻi, e lē na o le ʻausoo o loo faalogologo atu iā te ia. O loo iai foʻi i inā le ʻau Faresaio, ma ua tatau foʻi ona latou faatatauina lenei fautuaga a Iesu, auā o i latou o ni ē e “naunau i tupe.” Ae ina ua latou faalogo i le fetalaiga lenā a Iesu, ona latou ʻaamu ai lea iā te ia.’—Luka 15:2; 16:13, 14.

Peitaʻi, e lē o fefe ai Iesu i a latou tauemuga. Ua fetalai atu o ia: “Ua outou taʻuamiotonuina outou lava i luma o tagata, a ua silafia e le Atua o outou loto; auā o le mea e sili ona maualuga i manatu o tagata, o le mea lenā e inosia i le silafaga a le Atua.”—Luka 16:15.

Ua umi se taimi o faasilisilia e tagata le ʻau Faresaio. Peitaʻi, o lea ua oo i le taimi e suia ai le tulaga o mea. O le a faamaualaloina i latou o loo i tulaga maualuluga i faiga faapolotiki, o ē mauʻoa, faapea taʻitaʻi lotu. Ae o le a faamaualugaina tagata lautele, o ē e amanaʻia o latou manaʻoga faaleagaga. Ua faamatala mai e Iesu lenei suiga tele e faapea:

“Na iai le Tulafono ma Perofeta seʻia oo mai iā Ioane. Ua amata mai ai i lenā taimi ona folafola atu le tala lelei o le malo o le Atua. Ua tausinio i ai tagata eseese uma ina ia sao atu i ai. E moni, e faigofie ona mavae atu le lagi ma le lalolagi, ae e faigatā ona mavae atu se vaega o se mataʻitusi o le Tulafono, seʻia taunuu mea uma.” (Luka 3:18; 16:16, 17) E faapefea i upu a Iesu ona faamaonia ai ua iai se suiga i lenā lava taimi?

Ua faapea atu ma le faamaualuluga taʻitaʻi lotu Iutaia o loo latou tausia le Tulafono a Mose. Manatua foʻi ina ua faapupulaina e Iesu mata o le tamāloa sa tauaso i Ierusalema, na faapea atu ma le faamaualuga le ʻau Faresaio: “O i matou o soo o Mose. Ua matou iloa na fetalai mai le Atua iā Mose.” (Ioane 9:13, 28, 29) O se tasi o fuafuaga o le Tulafono, ina ia taʻitaʻia ai tagata lotomaulalo i le Mesia po o Iesu. Na faapea mai Ioane le Papatiso, o Iesu o le Tamaʻi Mamoe a le Atua. (Ioane 1:29-34) Na amata ona faalogo tagata Iutaia lotomaulalo aemaise i latou e matitiva, e faatatau i “le malo o le Atua” talu mai le taimi o le faiva a Ioane. O le mea moni, e iai le “tala lelei” mo i latou uma o loo mananaʻo e avea ma tagatānuu o le Malo o le Atua, ma maua ai aogā.

E lē faapea e lē o faataunuuina le Tulafono a Mose, auā o lenei Tulafono ua taʻitaʻia atu ai i le Mesia. E lē gata i lea, ua lata i le taimi e lē toe manaʻomia ai ona tausia lenei tulafono. O se faataʻitaʻiga, sa faataga i le Tulafono le tatalaina o faaipoipoga ona o ni māfuaaga eseese. Peitaʻi, o lea ua fetalai atu Iesu: “O sē e faateʻa i lana avā ma faaipoipo i se isi, ua mulilua o ia, ma o lē e faaipoipo i le fafine ua faateʻaina e lana tane, ua mulilua foʻi o ia.” (Luka 16:18) E mautinoa le matuā feita o le ʻau Faresaio i nei upu, auā e latou te maumauaʻi e faia tulafono mo so o se vala o le olaga.

Ua faamatala atu nei e Iesu se talafaatusa e faamamafa ai le suiga tele lea o loo tupu. O lenei talafaatusa e faatatau i ni tamāloloa se toʻalua, o ē na matuā suia atoatoa o la tulaga. A o faamatalaina lenei talafaatusa, ia manatua o loo aofia ai i le ʻaufaalogologo le ʻau Faresaio o ē e naunau i tupe ma e faasilisilia e tagata.

Ua faamatala e Iesu: “E iai se tasi tagata mauʻoa e masani ona ofu o ia i ofu violē ma le ʻie lino, ua olioli o ia i aso uma i se olaga tamaoaiga. Ae e masani ona faanofo i le faitotoʻa o lona pā, se tagata ʻaisi e igoa iā Lasalo, ua lilofia i papala, ma ua manaʻo o ia e ʻai i mea e toʻulu ifo mai i le laulau a le tagata mauʻoa. E ō ane foʻi taʻifau ma etoeto i ona papala.”—Luka 16:19-21.

Manatua foʻi, e naunau le ʻau Faresaio i tupe. Faamata la e toe fesiligia po o ai o loo faasino atu i ai le faaupuga “tagata mauʻoa”? E fiafia foʻi nei taʻitaʻi lotu Iutaia e oofu i ofu taugatā ma anagatā. E lē gata i lea, e foliga mai o loo latou mauʻoa i tulaga faalelotu, faapea le tele o isi mea ua latou mauaina. Ioe, ua pei i latou o le tagata mauʻoa o loo ofu i le ofu violē, lea e faaāta mai ai lo latou tulaga aloaʻia, a o le ʻie lino paʻepaʻe ua faaāta mai ai lo latou faafiaamiotonu.—Tanielu 5:7.

O le ā le manatu o nei taʻitaʻi mauʻoa ma faamaualuluga i tagata matitiva ma tagata lautele? E latou te ʻinoʻino ma vaai maualalo i na tagata, e ala i le taʻua o i latou o ‛am ha·’aʹrets po o tagata o le nuu (laueleele), o ē e lē iloa le Tulafono pe e  lē aogā foʻi ona aʻoaʻoina i le Tulafono. (Ioane 7:49) Ua faaāta mai ai i inei le tulaga o le “tagata ʻaisi e igoa iā Lasalo,” o lē e manaʻo e ʻai “i mea e toʻulu ifo mai i le laulau a le tagata mauʻoa.” E pei o Lasalo o lē ua lilofia lona tino atoa i le papala, e faapena foʻi le vaaiga a nei taʻitaʻi i tagata lautele. Ua pei i latou o ni ē e lē o mauaina le finagalo malie o le Atua.

Ua umi se taimi o vaaia pea lenā tulaga faanoanoa. Peitaʻi, ua silafia e Iesu ua oo i le taimi e tatau ona suia ai le tulaga o mea, mo i latou e pei o le tagata mauʻoa ma i latou e pei o Lasalo.

UA SUIA LE TULAGA O MEA

Ua faaauau le faamatalaga a Iesu e faatatau i le suiga tele lea ua tulaʻi mai: “O lea, a o faagasolo aso, ona oti ai lea o le tagata ʻaisi, ma ua ave o ia e agelu ma tuu i le fatafata o Aperaamo. Ua oti foʻi le mauʻoa ma ua tanu o ia. Ua tepa aʻe o ia i luga mai i le Tuugamau o loo faapuapuagatia ai, ua ia iloa mamao atu Aperaamo, ma Lasalo o loo i lona fatafata.”—Luka 16:22, 23.

E iloa lelei e le ʻaufaalogologo a Iesu, ua leva ona maliu Aperaamo ma o loo i le Tuugamau. E manino faamatalaga a Tusitusiga Paia e faapea, e leai se tasi i le Tuugamau po o Seoli e mafai ona vaai pe tautala, e aofia ai ma Aperaamo. (Failauga 9:5, 10) Faamata la o ā ni manatu o nei taʻitaʻi lotu e faatatau i le uiga o le talafaatusa a Iesu? Atonu o le ā o loo faailoa mai e Iesu e faatatau i tagata lautele, ma nei taʻitaʻi lotu matapeʻapeʻa?

Ua faatoʻā uma ona fetalai Iesu e faatatau i se suiga i lona faapea atu, ʻna iai le Tulafono ma Perofeta seʻia oo mai iā Ioane le Papatiso. Na amata mai i lenā taimi ona folafolaina atu le tala lelei o le malo o le Atua.’ O lea, o le talaʻiga a Ioane ma Iesu Keriso, ua peiseaʻī ai ua feoti Lasalo ma le tagata mauʻoa mai i o la tulaga sa iai muamua, ae ua iai i ni tulaga fou lea e fesootaʻi atu i la laʻua faiā ma le Atua.

Ua leva ona matelāina faaleagaga tagata lotomaulalo po o ē e matitiva. Peitaʻi, o lea ua latou maua aogā mai le talileleia o le feʻau o le Malo lea sa talaʻiina atu e Ioane le Papatiso, ae o lea foʻi ua talaʻiina atu e Iesu. I le taimi muamua, e pau lava mea sa latou mauaina o “mea e toʻulu ifo mai i le laulau” faaleagaga a taʻitaʻi lotu. Ae o lea ua fafagaina i latou i upu moni tāua mai i Tusitusiga Paia, aemaise mea matagofie o loo faamatalaina e Iesu. E peiseaʻī o lea faatoʻā o latou mauaina le finagalo malie o Ieova le Atua.

Ae i le isi itu, e lē mananaʻo taʻitaʻi lotu mauʻoa ma malolosi taaʻiga e talia le feʻau o le Malo, na folafolaina atu e Ioane ma talaʻiina atu e Iesu i le atunuu atoa. (Mataio 3:1, 2; 4:17) Ua matuā faapuapuagatia i latou i lenā feʻau, ona o loo faasino atu i le oo mai o sala faafaamasinoga a le  Atua. (Mataio 3:7-12) E mautinoa le fiafia o nei taʻitaʻi lotu matapeʻapeʻa, pe afai e lē toe talaʻia e Iesu ma ona soo le feʻau a le Atua. Ua pei i latou o le tagata mauʻoa i le talafaatusa lea na valaau atu: “Loʻu tamā e Aperaamo, ia e alofa mai iā te aʻu, ma ia auina mai Lasalo e fufui le tumutumu o lona tamatamaʻilima i le vai, ma faamālū ai loʻu laulaufaiva. Auā ua ou pagatia i le mumū o lenei afi.”—Luka 16:24.

Peitaʻi e lē tupu lenā mea. E lē taitai suia uiga o le toʻatele o taʻitaʻi lotu. E latou te lē o mananaʻo e “faalogo iā Mose ma le ʻau Perofeta,” auā o na tusitusiga sa tatau ona fesoasoani iā i latou e talia Iesu o le Mesia ma o le Tupu tofia a le Atua. (Luka 16:29, 31; Kalatia 3:24) E latou te lē o faaalia foʻi le lotomaulalo ma mananaʻo e faatalitonuina i latou e tagata matitiva, o ē ua taliaina Iesu ma maua le finagalo malie o le Atua. E lē o faaitiitia e soo o Iesu le tāua o le feʻau o loo talaʻiina atu, ina ia faamalieina ma maua ai e taʻitaʻi lotu le filemu. Ua faamatala e Iesu lenei tulaga, i upu nei sa fai atu e “Aperaamo” i le tagata mauʻoa:

“Loʻu atalii e, ia e manatua foʻi, na e maua le tele o mea a o e ola, a o Lasalo ua faapea foʻi ona maua e ia o mea leaga, o lea la ua ia maua ai se olaga lelei i inei, a o lenā ua e pagatia. E lē gata i nei mea uma, a ua iai se vanu tele i lo tatou va, o lea ua lē sao atu ai i latou o i inei e fia ō atu i inā. E lē mafai foʻi ona sao mai outou i inā iā i matou.”—Luka 16:25, 26.

Ua matuā tonu ma talafeagai lenei suiga tele. Ua faaalia mai i inei le suia atoatoa o tulaga o mea i le va o taʻitaʻi lotu faamaualuluga, ma tagata lotomaulalo o ē ua taliaina le amo a Iesu. O lea ua faatoʻā maua e tagata lotomaulalo le faafouina, ma fafagaina i latou i le itu faaleagaga. (Mataio 11:28-30) O le a sili atu ona manino lenei suiga i nai masina mulimuli ane, pe a suia le feagaiga o le Tulafono i le feagaiga fou. (Ieremia 31:31-33; Kolose 2:14; Eperu 8:7-13) Pe a liligi ifo e le Atua le agaga paia i le Penetekoso i le 33 T.A., ona matuā manino mai ai lea e maua e soo o Iesu le finagalo malie o le Atua, nai lo o le ʻau Faresaio ma taʻitaʻi lotu o loo lagolagoina i latou.