Skip to content

Skip to secondary menu

Skip to table of contents

Molimau a Ieova

Faa-Samoa

Iesu—Le Ala, le Upu Moni ma le Ola

 MATAUPU 100

Le Talafaatusa a Iesu e Faatatau i Mina e Sefulu

Le Talafaatusa a Iesu e Faatatau i Mina e Sefulu

LUKA 19:11-28

  • LE TALAFAATUSA E FAATATAU I MINA E SEFULU

Atonu o loo iai pea Iesu ma ona soo i le fale o Sakaio, e ui lava o Ierusalema le nofoaga o loo manaʻo e alu atu i ai. E talitonu le ʻausoo e lē o toe umi ona faavaeina lea o “le malo o le Atua,” lea o le a avea ai Iesu ma Tupu. (Luka 19:11) E latou te lē o malamalama i le uiga o lenei mataupu, e pei lava ona latou lē malamalama e tatau ona maliu Iesu. O lea, ua faamatala ai e Iesu se talafaatusa e fesoasoani iā i latou e malamalama ai, e leʻi oo i le taimi e faavae ai le Malo.

Ua fetalai atu Iesu: “E iai se tasi alii mamalu ua alu malaga i se nuu mamao, ina ia fai o ia ma tupu, ona toe foʻi mai ai lea.” (Luka 19:12) E umi lenei faigāmalaga. E manino mai o Iesu le “alii mamalu” lea ua alu malaga i se “nuu mamao” po o le lagi, lea o le a tuuina atu ai e lona Tamā le pule e avea ai ma tupu.

O loo taʻua i le talafaatusa a o leʻi alu malaga le “alii mamalu,” ua ia valaau i ana pologa e toʻasefulu ma tuuina atu iā i latou taʻitoʻatasi se mina siliva, ma le faatonuga e faapea: “Ia ō e fai ai ni a outou pisinisi seʻia ou sau.” (Luka 19:13) O mina siliva o ni tupe e tāua tele. E tutusa le mina e tasi ma le totogi e maua e se tagata e galue i se faatoʻaga i masina e tolu.

E ono manatu le ʻausoo ua faatusaina i latou i pologa e toʻasefulu, auā sa faatusaina i latou e Iesu i se ʻaufaigaluega e faia le seleselega. (Mataio 9:35-38) E leʻi faapea na fetalai atu Iesu e latou te seleseleina ni saito. Nai lo o lea, o le seleselega o loo latou faia, o le seleseleina lea o isi soo o ē e mafai ona maua ni o latou avanoa i le Malo o le Atua. E faaaogā e le ʻausoo o latou taimi, lo latou malosi, faapea foʻi a latou alagāʻoa, ina ia maua ai nisi suli o le Malo.

O ā isi faamatalaga ua taʻua e Iesu i lenei talafaatusa? Ua ia faapea mai, “ua ʻinoʻino” tagatānuu i lenei alii mamalu “ma aauina atu ni sāvali e mulimuli atu iā te ia ma faapea atu, ʻMatou te lē mananaʻo e fai lenei tagata ma o matou tupu.’” (Luka 19:14) Ua iloa e le ʻausoo e lē talia e tagata Iutaia Iesu, ma e mananaʻo isi e fasioti o ia. Ina ua mavae le maliu o Iesu ma toe afio i le lagi, e toetoe o tagata Iutaia uma sa faaalia o latou manatu e faatatau iā te ia, e ala i le sauāina o ona soo. Na matuā manino mai ai, le lē mananaʻo o nei tagata tetee e fai Iesu ma Tupu.—Ioane 19:15, 16; Galuega 4:13-18; 5:40.

Ae ua faapefea ona faaaogā e pologa e toʻasefulu a latou mina, seʻia oo i le taimi e ʻfai ai le alii mamalu ma tupu’ ma toe foʻi mai o ia? Ua faamatala e Iesu: “Mulimuli ane, ua toe foʻi mai o ia ina ua maua le tofi o le tupu, ona ia poloaʻi atu lea i ana pologa na ia tuuina atu i ai tupe siliva e ō mai, ina ia iloa ai po o ā ni mea ua latou maua mai i a latou pisinisi. Ona sau ai lea o lē na muamua, ua faapea mai, ʻLe Alii e, ua maua isi mina e sefulu mai i au mina.’ Ona ia faapea atu lea iā te ia, ʻMalo lava, le pologa lelei e! Auā ua e faamaoni i sina mea itiiti, o lea ia e pule ai i aai e sefulu.’ Ona sau lea o le lona lua, ua faapea mai, ʻLe Alii e, ua maua isi mina e lima mai i au mina.’ Ua ia faapea atu foʻi iā te ia, ʻIa e pule foʻi i aai e lima.’”—Luka 19:15-19.

Pe afai e malamalama le ʻausoo, e pei i latou o pologa o ē e faaaogā atoatoa o latou taimi, lo latou malosi, ma a latou alagāʻoa ina ia faia ai nisi ma soo, e mafai la ona latou mautinoa o le a fiafia Iesu iā i latou, ma o le a ia tauia a latou taumafaiga maumauaʻi. E eseese uma tulaga o soo o Iesu, ma e eseese foʻi tomai ma avanoa e latou te maua. Peitaʻi, e amanaʻia ma tauia e Iesu o lē o le a ʻfai ma tupu,’ a latou taumafaiga faamaoni o le faia o isi ma soo.—Mataio 28:19, 20.

Ae mātau le faaeseesega i le faaiʻuga o le talafaatusa a Iesu: “Ona sau ai lea o le isi [pologa], ua faapea mai, ʻLe Alii e, o lau mina lea, na ou tago ma afīfī i le ʻie. Auā ua ou fefe iā te oe ona o oe o se tagata faigatā; ua e ave aʻe le mea e te leʻi teuina, ma ua e selesele foʻi i le mea e te leʻi lūlūina.’ Ona ia faapea atu lea iā te ia, ʻLe pologa leaga e, ou te faamasino iā te oe ona o au lava upu. Ua e iloa lava o aʻu o le tagata faigatā, ua ou ave aʻe mea ou te leʻi teuina, ma ua ou selesele le mea ou te leʻi lūlūina, a ea? Aiseā la na e lē tuu ai laʻu tupe siliva i le fale tupe? Pe a ou sau, ona ou maua ai lea o laʻu tupe atoa ma lona pasene.’ Ua ia faapea atu iā i latou o loo tutū ai, ʻIa fao le mina mai iā te ia ma avatu i lē ua iai mina e sefulu.’”—Luka 19:20-24.

O le lē taulau o lenei pologa e galue mamafa e faateleina ʻoa a lona matai, ua fao ese ai mea sa iā te ia. Ua tulimataʻia e le ʻauaposetolo le taimi e pule ai Iesu i le Malo o le Atua. O lea, o le faamatalaga a Iesu e faatatau i le pologa mulimuli atonu ua latou iloa ai, afai e latou te lē faia ni taumafaiga maumauaʻi, o le a lē maua so latou avanoa i le Malo o le Atua.

E mautinoa le faalaeiauina o soo faamaoni o Iesu i ana upu, ina ia faatele a latou taumafaiga. Ua faaiʻu le faamatalaga a Iesu i upu nei: “Ou te fai atu iā te outou, O sē ua iai mea, e avatua iā te ia mea e tele; a o lē ua leai ni mea, e oo lava i mea ua iā te ia, e aveesea ia.” Ona ia toe fetalai mai lea, o le a fasiotia ona fili, o ē e lē mananaʻo “e fai [o ia] ma o latou tupu.” Ina ua māeʻa lenā, ona toe faaauau ai lea o lana malaga agaʻi i Ierusalema.—Luka 19:26-28.