Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

Iesu—Le Ala, le Upu Moni ma le Ola

 MATAUPU 87

Sauniuni Mamao e Ala i le Faaaogā o le Atamai Aogā

Sauniuni Mamao e Ala i le Faaaogā o le Atamai Aogā

LUKA 16:1-13

  • TALAFAATUSA I LE AUAUNA PULE LĒ FAAMAONI

  • ʻFAI NI UŌ’ E ALA I AU ʻOA

Ua tatau nei ona malamalama le ʻauaolafoga, le ʻautusiupu, ma le ʻau Faresaio o loo faasino atu le talafaatusa lea sa faamatala e Iesu, i le finagalo o le Atua ina ia faamagalo tagata agasala ua salamō. (Luka 15:1-7, 11) Mulimuli ane, ua faamatala e Iesu se isi talafaatusa i ona soo, e faatatau i se tamāloa mauʻoa na lē faamaoni iā te ia lana auauna pule.

Ua molia lenei auauna pule ona o le faatalalē i le tausia o ʻoa a lona matai. O lea ua faapea atu ai lona matai, o le a lē toe avea o ia ma auauna pule. Ona faapea ifo lea o le auauna pule iā te ia lava: “O le ā se mea ou te faia, auā o le a faateʻa aʻu e loʻu matai mai i le avea ma auauna pule? Ou te lē lavā faigaluega mamafa, ou te mā foʻi e ʻaisi.” O lea, ina ia sauniuni mamao mo tulaga o le a tulaʻi mai, ua faapea ane ai le auauna pule: “O lea la ua ou iloa nei le mea ou te faia ina ia talia ai aʻu e tagata i o latou fale, pe a faateʻa aʻu mai i le avea ma auauna pule.” Ua ia valaau i tagata o loo nofo aitalafu i lona matai, ma fesili atu iā i latou: “E fia mea o e aitalafu ai i loʻu matai?”—Luka 16:3-5.

Ua faapea ane le tasi tagata aitalafu, e “ono selau kalone [e tusa ma le 2,200 L] o suāuu olive.” Atonu e iai se togāolive telē a lenei tagata aitalafu, pe sa avea foʻi o ia o sē e faatauina atu le suāuu. Ua fai atu le auauna pule iā te ia: “Tago i lau pepa, ma e nofo i lalo ma tusi vave ai, e tolu selau [e tusa ma le 1,100 L].”—Luka 16:6.

Ua fesili atu le auauna pule i le isi tagata: “Ae ā oe, e fia mea o e aitalafu ai?” Ua fai mai o ia: “E selau kori o saito.” E tusa lenā ma le 20,000 kuata [22,000 L]. Ua faapea atu le auauna pule iā te ia: “Tago i lau pepa ma tusi ai, e valu sefulu.” O lenei auala, ua faaitiitia ai e le auauna pule le aitalafu a lenā tagata i le 20 pasene.—Luka 16:7.

O loo vaavaaia pea e le auauna pule ʻoa a lona matai. O lea, o loo iai pea iā te ia le pule e faaitiitia ai aitalafu a isi tagata i lona matai. O le faaitiitia e le auauna pule o aitalafu a tagata, ua ia faia ai ni uō ma i latou nei, o ē atonu o le a fesoasoani atu iā te ia pe a faateʻa o ia mai i lana galuega.

Mulimuli ane, ua iloa e le matai le mea ua tupu. E ui lava o le gaoioiga lea sa faia e lana auauna pule ua tele ai ana ʻoa o le a lē toe maua mai, ae ua ofo o ia ma avatu le faamālō i le auauna pule “e ui e lē amiotonu, ae ua ia gaoioi ma le atamai aogā.” Ua toe fetalai atu Iesu: “E sili atu le atamamai o tagata o le olaga nei i le feagai ai ma o latou lava tupulaga, nai lo o tagata o le malamalama.”—Luka 16:8.

E lē o faapea atu Iesu e leai se afāina o le gaoioiga sa faia e le auauna pule, pe faapea foʻi o loo ia uunaʻia faiga faapisinisi faapiʻopiʻo. O le ā tonu la le uiga o lana fetalaiga? Ua ia augani atu i ona soo: “O le ʻoa a le amiolētonu, ia outou fai ai uō ma outou, auā pe a lē toe aogā ia mea, latou te taliaina ai outou i fale e faavavau.” (Luka 16:9) O loo aumaia i inei se lesona i le tāua o le iai o le faautaga mamao, ma faaaogā le atamai aogā. E tatau i auauna a le Atua po o “tagata o le malamalama,” ona faaaogā a latou alagāʻoa i se auala atamai a o taulaʻi atu i le ola e faavavau i le lumanaʻi.

E na o Ieova le Atua ma lona Alo e mafai ona taliaina se tasi i le Malo i le lagi, po o le Parataiso i le lalolagi i lalo o le pulega a lenā Malo. E tatau ona tatou filigā e atiaʻe ni faauōga ma i laʻua, e ala i le faaaogā o a tatou alagāʻoa e lagolagoina ai manaʻoga o le Malo. E tusa lava la pe mavae atu pe faaumatia foʻi auro, siliva ma isi ʻoa faaletino, ae ua mautinoa lo tatou ola e faavavau i le lumanaʻi.

Ua fetalai atu foʻi Iesu, o i latou e faamaoni i le auala e tausia ma faaaogā ai a latou ʻoa faaletino o loo iai, e latou te faamaoni foʻi i le tausia o mea e sili atu ona tāua. Ona toe faaauau lea o le fetalaiga a Iesu: “Pe afai e tou te lē faamaoni i ʻoa a le amiolētonu, o ai la o le a tuuina atu iā te outou le ʻoa moni [e pei o manaʻoga o le Malo] e tausi?”—Luka 16:11.

O loo faailoa atu e Iesu i ona soo, e tele mea e faatalitalia mai iā i latou ina ia talia ai “i fale e faavavau.” E lē mafai ona avea se tasi ma auauna moni a le Atua, ae i le taimi e tasi o loo avea ma pologa i ʻoa a le amiolētonu po o ʻoa faaletino. Ua faaiʻu le fetalaiga a Iesu e faapea: “E lē mafai e se auauna o le aiga ona pologa i ni matai se toʻalua; auā e ita o ia i le tasi, ae alofa i le isi, pe e pipii atu o ia i le tasi, ae ʻinoʻino i le isi. E lē mafai ona e pologa i le Atua atoa ma ʻOa.”—Luka 16:9, 13.