Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

Iesu—Le Ala, le Upu Moni ma le Ola

 MATAUPU 86

Ua Toe Fo‘i Mai le Atalii sa Leiloa

Ua Toe Fo‘i Mai le Atalii sa Leiloa

LUKA 15:11-32

  • TALAFAATUSA E FAATATAU I LE ATALII SA LEILOA

Atonu o loo iai pea Iesu i Perea i le itu i sasaʻe o le vaitafe o Ioritana, a o ia faamatalaina atu ni talafaatusa e faatatau i le mamoe na leiloa ma le tupe siliva na leiloa. Ua tatou aʻoaʻoina mai i na talafaatusa, e tatau ona tatou olioli pe a salamō se tagata agasala ma toe foʻi i le Atua. Sa faitio le ʻau Faresaio ma le ʻautusiupu iā Iesu, ona o lona taliaina o tagata agasala ua salamō. Ae po ua aʻoaʻoina e le ʻau Faresaio ma le ʻautusiupu se lesona mai i na talafaatusa e lua? Po ua latou malamalama i faalogona o lo tatou Tamā i le lagi e faatatau i tagata agasala ua salamō? Ua faamatala atu nei e Iesu se isi talafaatusa e pāʻia ai loto, ma faamatilatila lenei lesona tāua e faatatau i faalogona o Ieova i tagata agasala ua salamō.

O lenei talafaatusa e faatatau i se tamā ma ni ona atalii se toʻalua. O le uii o le tagata autū lea o le talafaatusa. E tatau la i le ʻau Faresaio ma le ʻautusiupu faapea isi tagata o loo faalogologo atu, ona aʻoaʻoina se lesona mai i faamatalaga e faatatau i le uii. Peitaʻi, e tatau foʻi ona amanaʻia le faamatalaga a Iesu e uiga i le tamā ma le atalii matua, auā e iai ni lesona tāua e aʻoaʻoina mai i o la uiga. O lea, seʻi mafaufau loloto e faatatau i nei tane e toʻatolu a o faamatalaina e Iesu le talafaatusa:

“Sa iai i se tagata ni atalii se toʻalua. Ona fai atu lea o le uii i lona tamā, ‘Loʻu tamā e, ia e aumai iā te aʻu loʻu tofi o le ʻoa.’ Ona ia vaeluaina lea o ana mea iā i laʻua.” (Luka 15:11, 12) Mātau mai, o loo soifua pea le tamā o le uii. E lē o talosaga atu la le uii mo lona tofi lea e maua pe a maliu lona tamā. Peitaʻi, o loo manaʻo o ia e avatu i le taimi lava lea lona tofi, ina ia mafai ai ona ia maua le saʻolotoga ma pule ai lava o ia i le auala e faaaogā ai. O le ā lenā auala?

Ua faaauau le faamatalaga a Iesu: “Mulimuli ane, ua mavae ni nai aso, ona faapotopoto ai lea e le uii o ana mea uma, ma alu malaga i se atunuu mamao, ma ua faamaʻimau ai ana mea e ala i le ola i se olaga soonafai.” (Luka 15:13) Ioe, ua filifili le uii e alu i se isi atunuu, nai lo o le nofo i lo latou aiga e saogalemu ma malupuipuia, faatasi ai ma lona tamā e alofa ma o loo tausia i laʻua. Ua faamaʻimau e ia lona tofi, ina ia faamalie ai ona tuʻinanauga taufeusuaʻiga. Mulimuli ane, ua oo faigatā i le uii, e pei ona faamatalaina e Iesu e faapea:

“Ina ua uma ana mea uma, ona tupu ai lea o se oge tele i lenā atunuu, ma ua mativa ai o ia. Ua oo lava ina alu atu o ia ma nofo i se tagata o lenā atunuu, ona auina atu ai lea o ia e le tagata i lona fanua e tausi lana lafu puaa. Ua manaʻo o ia e ʻai i mea e aai ai puaa, ma ua leai se tasi na toe avatua se mea iā te ia.”Luka 15:14-16.

E tusa ai ma le Tulafono a le Atua, o puaa o ni manu e lē mamā. Peitaʻi, o lea ua galue le uii o sē e tausia lafu puaa. O lona matelāina i le fia ʻai, ua oo ai lava ina manaʻo e ʻai i meaʻai a puaa o loo ia tausia. A o ia feagai ma nei puapuaga ma faalogona o le lotomafatia, “ua toe atamai o ia.” O le ā le gaoioiga ua ia faia? Ua ia faapea ifo iā te ia lava: “E toʻatele le ʻaufaigaluega a loʻu tamā o loo aai i falaoa e tele, a o lenei o le a ou oti i loʻu fia ʻai! O le a ou tulaʻi ma ou toe foʻi atu i loʻu tamā ma faapea atu: ‘Loʻu tamā e, ua ou agasala i le Atua atoa ma oe. E lē toe aogā ona taʻua aʻu o sou atalii. Ia avea aʻu ma se tasi o au tagata faigaluega.’” Ona tulaʻi lea o ia ma alu atu i lona tamā.Luka 15:17-20.

O le ā le auala o le a tali atu ai lona tamā? Po o le a ita lona tamā ma otegia o ia i le faia o se filifiliga lē atamai o le tuua o lo latou aiga? Po o le a lē ano atu lona tamā iā te ia? Pe ana faapea o oe o le tamā, o le ā le auala e te tali atu ai? Ae faapefea pe ana faapea o lou alo lea ua tupu ai lenei mea?

 UA TOE MAUA LE ATALII SA LEILOA

Ua faamatala e Iesu faalogona ma gaoioiga a le tamā e faapea: “Ua iloa mamao atu [le atalii] e lona tamā, ona mutimutivale ai lea o lona alofa iā te ia. Ua ia tamoʻe atu ma fusi i lona ua, ma sogi lemū atu iā te ia.” (Luka 15:20) E ui lava atonu na faalogo le tamā sa ola lona atalii i se olaga e sili ona leaga, ae o lea ua ia taliaina o ia. Faamata e mafai e taʻitaʻi Iutaia o ē e faapea mai e latou te iloa ma tapuaʻi iā Ieova, ona aʻoaʻoina mai i lenei talafaatusa faalogona o lo tatou Tamā i le lagi, i tagata agasala ua salamō? Pe e mafai foʻi ona latou iloa mai ai, o le uiga foʻi lea o loo faaalia e Iesu?

Ua iloa e le tamā le salamō moni o lona atalii i ona foliga faanoanoa. Ae o lona tausolomua e faafeiloaʻi lona atalii, ua faigofie ai i le atalii ona taʻutino atu ana agasala. Ua faamatala e Iesu: “A ua faapea mai le atalii i lona tamā, ‘Loʻu tamā e, ua ou agasala i le Atua atoa ma oe. E lē toe aogā ona taʻua aʻu o sou atalii.’”Luka 15:21.

Ua faatonu e le tamā ana pologa: “Ia faavave! Aumai se ofu talaloa e sili ona lelei ma faaofu iā te ia, ma tuu se mama i lona lima, ma fai ni ona seevae. Ia aumai se tamaʻi povi peti ma fasi, seʻi o tatou aai ma olioli ai. Auā o loʻu atalii lenei na oti, a ua toe ola mai; na leiloa o ia a ua toe maua.” Ona “latou olioli ai lea.”Luka 15:22-24.

O le taimi lea o loo i le fanua le atalii matua. Ua fetalai Iesu e faatatau iā te ia: “Ua sau o ia ma ua latalata mai i le fale, ua ia faalogoina musika ma faiga siva. Ona ia valaau atu lea i se tasi o auauna ma fesili atu po o ā la mea e fai. Ua fai mai le auauna iā te ia, ‘Ua sau lou uso, ma ua fasi ai e lou tamā se tamaʻi povi peti, auā ua toe foʻi manuia mai o ia.’ A ua ita o ia ma ua lē fia alu i le fale. Ona sau ai lea o lona tamā i fafo ma faaoleole iā te ia. Ua tali ane o ia i lona tamā, ‘Seʻi vaai, ua tele tausaga o oʻu nofo pologa iā te oe ma ou te leʻi solia lava sau poloaʻiga. Ae e te leʻi aumaia lava se tamaʻi ʻoti ma aʻu matou te olioli ai ma aʻu uō. Peitaʻi, o lea ua taunuu mai lou atalii sa ia faamaʻimau au ʻoa faatasi ma fafine talitane,  a ua e fasi le tamaʻi povi peti mo ia.’”Luka 15:25-30.

O ai ua pei o le atalii ulumatua, e faitio ona o le alofa mutimutivale ma le manatu mamafa o loo faaalia e Iesu, i tagata lautele ma tagata agasala? O le ʻautusiupu ma le ʻau Faresaio. Ua māfua ona faamatala e Iesu lenei talafaatusa, ona o a latou faitioga i le auala ua ia talileleia ai tagata agasala. O le mea moni, e aogā lenei lesona i so o se tasi e faitio, i le auala e faaalia ai e le Atua lona alofa mutimutivale.

Ua faaiʻu e Iesu le talafaatusa i le faamatala atu o le talosaga a le tamā i lona atalii matua: “Si oʻu atalii e, o loo e faatasi pea ma aʻu, ma o aʻu mea uma lava, o au mea foʻi ia. A ua tatau ona tatou fiafia ma olioli auā o lou uso lenei na oti, a ua toe ola mai, na leiloa foʻi, a ua toe maua.”Luka 15:31, 32.

E lē o faailoa atu e Iesu po o le ā le gaoioiga o le a faia e le atalii matua, ina ua uma ona talanoa i ai lona tamā. Ae ina ua mavae le maliu ma le toetū o Iesu, ‘e toʻatele faitaulaga ua usiusitaʻi i le faatuatua.’ (Galuega 6:7) Atonu o loo aofia ai iā i latou na, nisi o ē na faalogo o faamatala e Iesu lenei talafaatusa faagaeeloto e faatatau i le atalii na leiloa. Ioe, na mafai foʻi e i latou na ona toe atamamai, salamō, ma toe foʻi i le Atua.

Ua mafai ma ua tatau nei i soo o Iesu ona aʻoaʻoina ni lesona tāua mai i lenei talafaatusa. Muamua, nai lo o le tuua o tagata o Ieova ae alu atu e saʻili tuʻinanauga o lenei olaga e peiseaʻī o loo alu atu “i se atunuu mamao,” e atamai le faatasi pea ma tagata o le Atua lea o loo maua le saogalemu, ona o lana puipuiga ma lana tausiga alofa.

Lona lua, pe afai e iai se tasi o i tatou ua see ese mai i ala o le Atua, e tatau ona tatou toe foʻi atu i lo tatou Tamā ma le lotomaulalo, ina ia toe maua ai lona finagalo malie.

O se isi lesona, o le eseese lea o uiga sa faaalia e le tamā ma lona atalii matua. Ina ua toe foʻi mai le uii, sa talia ma faamagalo o ia e lona tamā. Peitaʻi, na ita le atalii matua ma e na te leʻi taliaina lona uso laʻitiiti. I se tulaga talitutusa, e tatau i auauna a le Atua ona faaalia le lotofaamagalo, ma talia i latou na taasē ae ua salamō moni ma toe foʻi mai i ‘le fale o le Tamā.’ O lea, seʻi o tatou fiafia ma olioli ‘auā ua toe ola mai lo tatou uso na oti, na leiloa foʻi, a ua toe maua o ia.’