Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

Iesu—Le Ala, le Upu Moni ma le Ola

 MATAUPU 97

Talafaatusa i le ʻAufaigaluega i le Togāvine

Talafaatusa i le ʻAufaigaluega i le Togāvine

MATAIO 20:1-16

  • UA AVEA Ē NA “MULIMULI” GALULUE I LE TOGĀVINE MA “Ē E MUAMUA”

Ua faatoʻā uma ona faamatala e Iesu i lana ʻaufaalogologo i Perea e faapea, “o le toʻatele o ē e muamua e avea ma ē e mulimuli, ma o ē e mulimuli e avea ma ē e muamua.” (Mataio 19:30) Ua ia toe faamatilatila lenā manatu i se talafaatusa e faatatau i ē e galulue i se togāvine:

“Ua faatusaina le malo o le lagi i se matai o le aiga, o lē na usu atu i le taeaopō e saʻili ni tagata e faafaigaluega i lona togāvine. Na ia aauina atu i latou i le togāvine, ina ua malilie faatasi ma le ʻaufaigaluega, e galulue mo le tenari i le aso. Ina ua toe alu atu i le itula e tolu, na ia vaaia ai ni tagata e lē o faia ni galuega o loo tutū i le maketi; ona ia fai atu lea iā i latou, ʻIa outou ō atu foʻi i loʻu togāvine, ma ou te avatu iā te outou le totogi e tatau ai.’ Ona latou ō ai lea. Na ia toe alu atu i le itula e ono ma le itula e iva ma faia foʻi faapea. Ona ia alu atu ai lea pe tusa o le itula e sefulu tasi, ma maua atu ai foʻi isi o loo tutū mai, ona ia fai atu lea iā i latou, ʻO le ā le mea ua outou tutū ai i le aso atoa ae leai ni a outou galuega e fai?’ Ona latou fai mai lea iā te ia, ʻAuā e leai se isi e faafaigaluegaina i matou.’ Ona ia fai atu lea, ʻIa outou ō atu foʻi i le togāvine.’”—Mataio 20:1-7.

Atonu o loo mafaufau le ʻaufaalogologo a Iesu iā Ieova le Atua, ina ua ia taʻua “le malo o le lagi” ma le “matai o le aiga.” Ua faamatalaina Ieova i Tusitusiga Paia o lē e ana se togāvine, lea e faaataina mai ai le nuu o Isaraelu. (Salamo 80:8, 9; Isaia 5:3, 4) Ua faatusaina i latou o loo i le feagaiga o le Tulafono i ē e galulue i le togāvine. Peitaʻi, e lē o faamatalaina atu e Iesu le tulaga o mea i le taimi ua teʻa. Nai lo o lea, o loo ia faamatalaina se tulaga o loo tupu i lenā lava taimi.

E foliga mai o loo faaauau pea ona galulue i le auaunaga i le Atua taʻitaʻi lotu, o ē e pei o le ʻau Faresaio na taumafai e tofotofoina Iesu i le mataupu e faatatau i talagā faaipoipoga. Ua pei nei taʻitaʻi lotu o tagata o loo galulue i le aso atoa i le togāvine. E latou te faatalitalia lo latou totogi atoa o le tenari, lea e tutusa ma le totogi o se tagata faigaluega i le aso e tasi.

I le vaaiga a le ʻauositaulaga ma nisi o taʻitaʻi lotu, e lē o galulue mamafa tagata Iutaia faatauvaa i le auaunaga i le Atua. E pei i latou o ē e galulue faavaitaimi i le togāvine a le Atua. I le talafaatusa a Iesu, e faasino atu i latou nei i ē na valaaulia e galulue i le “itula e tolu” (tā o le 9 i le taeao), po o le itula e ono, itula e iva po o le itula e sefulu tasi (tā o le lima i le afiafi).

O tane ma fafine o loo mulimuli atu iā Iesu, e vaai i ai taʻitaʻi lotu o ni tagata ua “faamalaiaina.” (Ioane 7:49) E toetoe o o latou olaga atoa sa avea ai o ni faifaiva ma faia isi galuega mamafa. Ae ina ua oo i le taufaaiʻuiʻuga o le 29 T.A., na auina atu ai e “lē e ana le togāvine” Iesu, e valaaulia nei tagata e galulue mo le Atua o ni soo o Keriso. O i latou ia o “ē e mulimuli” e pei ona faamatalaina e Iesu, o ē e galulue i le itula e sefulu tasi i le togāvine.

Ua faaiʻu le talafaatusa a Iesu, i le faamatalaina o le mea ua tupu ina ua lata i le faaiʻuga o le aso faigaluega: “Ina ua oo i le afiafi, ona fai atu ai lea o lē e ana le togāvine i lē e pule i lana ʻaufaigaluega, ʻIa valaau atu i le ʻaufaigaluega ma avatu o latou totogi, e amata i ē na mulimuli e oo i ē na muamua.’ Ina ua ō mai tamāloloa na amata i le itula lona sefulu tasi, na tofu i latou ma le tenari. Ae ina ua ō mai i latou na muamua, na latou manatu e sili atu se mea latou te maua, ae na latou maua foʻi le totogi o le tenari e tasi. Ina ua maua le tenari, ona latou muimui ai lea i lē e ana le togāvine ma faapea mai, ʻE na o le tasi le itula na galulue ai i latou na mulimuli mai, ae ua tutusa o matou totogi e ui ua alu le aso atoa o matou tigāina i le vevela o le lā!’ Ae na tali atu o ia i le tasi o i latou, ʻSole, e leai se mea sesē ua ou faia iā te oe, pe ta te leʻi malilie faatasi ea i le tenari e tasi? Ia tago loa i lou totogi ma e alu. Ou te manaʻo e avatu i lenei tagata mulimuli le totogi na ou avatu foʻi iā te oe. Pe e faasā ona ou pule i le mea e fai i aʻu lava mea? Po ua e lotoleaga ea ina ua ou agalelei?’ O lenei, o ē e mulimuli e avea ma ē e muamua, ma o ē e muamua e avea ma ē e mulimuli.”—Mataio 20:8-16.

Atonu o loo taumānatu le ʻausoo, i le vaega mulimuli o le talafaatusa o loo faamatalaina e Iesu. E faapefea ona avea ma “ē e mulimuli” taʻitaʻi lotu Iutaia o ē sa avea ma “ē e muamua”? Ae faapefea ona avea soo o Iesu ma “ē e muamua”?

O le a avea soo o Iesu ma “ē e muamua” maua lo latou totogi o le aso atoa. O i latou ia sa vāai i ai le ʻau Faresaio ma isi o ni “ē e mulimuli.” Pe a maliu Iesu, o le a tuulafoaʻiina Ierusalema faaletino, ae o le a filifilia e le Atua se nuu fou “le Isaraelu a le Atua.” (Kalatia 6:16; Mataio 23:38) Sa faasino atu le faamatalaga a Ioane le Papatiso iā i latou e faia aʻe ai le nuu fou “le Isaraelu a le Atua,” ina ua ia taʻua le papatisoina i le agaga paia lea o le a tupu mulimuli ane. O i latou sa avea ma “ē e mulimuli” o le a “muamua” papatisoina i le agaga paia, ma o le a latou maua foʻi le faaeaga o le avea ma molimau iā Iesu i “tuluʻiga uma o le lalolagi.” (Galuega 1:5, 8; Mataio 3:11) Pe a fua i mea ua malamalama i ai le ʻausoo e faatatau i le suiga mataʻina o loo faasino atu i ai Iesu, atonu la ua latou faatalitalia le matuā inosia o i latou i le lumanaʻi e taʻitaʻi lotu, o ē o le a avea ma “ē e mulimuli.”