Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

Iesu—Le Ala, le Upu Moni ma le Ola

 MATAUPU 94

Le Manaʻoga ia Tatalo ma ia Lotomaulalo

Le Manaʻoga ia Tatalo ma ia Lotomaulalo

LUKA 18:1-14

  • LE TALAFAATUSA I LE FAATAUANAU ATU PEA O SE FAFINE UA OTI LANA TANE

  • LE FARESAIO MA LE AOLAFOGA

Ua uma ona faamatala atu e Iesu i ona soo, se talafaatusa e faatatau i le manaʻomia ona finafinau i le tatalo. (Luka 11:5-13) Atonu o lea ua iai o ia i se aai i Samaria po o Kalilaia, ma ua ia toe faamamafa atu le tāua o le finafinau i le tatalo e ala i le talafaatusa lenei:

“I se tasi aai, sa iai se faamasino e lē mataʻu i le Atua, ma e lē faaaloalo foʻi i tagata. Ae e iai se fafine ua oti lana tane i lenā aai, ua alu atu pea iā te ia ma faapea atu, ʻIa e faia le faamasinogatonu mo aʻu ona o lē ua agaleaga mai iā te aʻu.’ O lea, e ui ina musu le faamasino, ae mulimuli ane ua ia faapea ifo, ʻE ui ina ou lē mataʻu i le Atua pe faaaloalo i se tagata, ae ona o le faalavelave mai pea o lenei fafine ua oti lana tane, o le a ou faia ai le faamasinogatonu mo ia, ina neʻi sau soo o ia ma faatigā mai iā te aʻu, ma iʻu ai ina ou fiu.’”—Luka 18:2-5.

Ona faamatala lea e Iesu o le faatatauga o lenei talafaatusa: “Po ua outou faalogo ea i le mea ua fai mai ai le faamasino e ui ina amiolētonu? O le mea moni, pe e lē faia ea e le Atua le faamasinogatonu mo ē ua ia filifilia, o loo alalaga atu iā te ia i le ao ma le pō, e ui lava o loo faapalepale mai pea o ia iā i latou?” (Luka 18:6, 7) O le ā ua faailoa mai i inei e Iesu e faatatau i lona Tamā?

E lē o faapea mai Iesu e pei Ieova le Atua o le faamasino amiolētonu. Nai lo o lea, o loo faailoa mai i lenei talafaatusa se faatusatusaga: Pe afai e tali atu se faamasino amiolētonu i le faatauanau atu pea o tagata, e mautinoa foʻi la le tali mai o le Atua i a tatou talosaga. E amiotonu ma lelei o ia, ma e tali mai pe afai e faaauau pea ona tatalo atu ona tagata iā te ia. E faamaonia lenā manatu i le fetalaiga lenei a Iesu: ʻOu te fai atu iā te outou, E vave ona faia e le Atua le faamasinogatonu mo i latou.’—Luka 18:8.

O le tele o taimi e lē maua e tagata faatauvaa ma ē matitiva le faamasinogatonu, ae e tele ina faatāua tagata mauʻoa ma ē e iai le pule. Peitaʻi e lē o le auala lenā a le Atua. Pe a oo i le taimi tonu, o le a ia faia le faamasinogatonu e ala i le faamautinoa e maua e ana auauna le ola e faavavau, ae faaumatia ē e amioleaga.

O ai i latou e iai le faatuatua e pei o lenā fafine ua oti lana tane? E toʻafia tagata e talitonu moni lava ʻe vave ona faia e le Atua le faamasinogatonu mo i latou’? O lea faatoʻā māeʻa ona faataʻitaʻia e Iesu le manaʻomia ona finafinau i le tatalo. Ua fesili atu nei Iesu e tusa ai o le faatuatua i le malosi o le tatalo: “Pe a sau le Atalii o le tagata, pe na te maua ea le faatuatua moni i le lalolagi?” (Luka 18:8) O le uiga o lenei faamatalaga, atonu e lē toʻatele nisi e faaalia lenā ituaiga o faatuatua pe a taunuu mai Keriso.

O loo iai i nisi o loo faalogologo atu iā Iesu, se uiga o le mautinoa naʻuā i lo latou faatuatua. E latou te manatu iā i latou lava o ni tagata amiotonu, ae e manatu faatauvaa i isi. O lea, ua faamatala atu ai e Iesu iā i latou lenei talafaatusa:

“E toʻalua ni tamāloloa ua ō atu i le malumalu e tatalo ai, o le tasi o le Faresaio, a o le isi o le aolafoga. Ua tū le Faresaio ma tatalo e faapea, ʻLe Atua e, ou te faafetai atu iā te oe ona ua ou lē pei o isi tagata, o ē e faia mea faapiʻopiʻo, o ē e amiolētonu, o ē e mulilulua, ua ou lē pei foʻi o lenei aolafoga. E faalua ona ou anapogi i le vaiaso, ou te avatu le sefuluaʻi o mea uma ou te maua.’”—Luka 18:10-12.

Ua lauiloa le ʻau Faresaio i le faafoliga atu o i latou o ni tagata amiotonu i luma o le lautele, ina ia faaofo ai tagata. E masani ona latou anapopogi i Aso Gafua ma Aso Tofi, ia e tumutumu ai tagata e fai a latou fefaatauaʻiga i maketi. Ua latou filifili e anapopogi i na aso, e ui e leai se tulafono o loo taʻua ai e tatau ona latou faia faapea. E latou te faaeteete foʻi i le totogiina o le sefuluaʻi e oo lava i laau iti o le fanua. (Luka 11:42) I ni nai masina na muamua atu, na faailoa atu lo latou manatu faatauvaa i tagata lautele e ala i la latou faamatalaga lenei: “Ua faamalaiaina lenei motu o tagata, o ē e lē iloa le Tulafono [e tusa ai ma le auala e faauiga ai e le ʻau Faresaio le Tulafono].”—Ioane 7:49.

Ua toe faaauau le faamatalaina e Iesu o le talafaatusa: “A ua tū mamao mai le aolafoga, ma e leʻi mafai ona tepa aʻe ona mata i le lagi, a ua tuʻituʻi pea lona fatafata ma faapea atu, ʻLe Atua e, ia e alofa mai iā te aʻu le tagata agasala.’” O lea ua faailoa atu ma le lotomaulalo e le aolafoga ona sesē. Ua faaiʻu e Iesu le talafaatusa e faapea: “Ou te fai atu iā te outou, Na alu lenei tagata i lona aiga, ua sili ona amiotonu o ia nai lo o lea tagata; auā o sē e faaeaina e ia o ia lava, e faamaulaloina lea, a o sē e faamaulaloina e ia o ia lava, e faaeaina lea.”—Luka 18:13, 14.

Ua faailoa atu ma le manino e Iesu le manaʻomia ona faaalia o le lotomaulalo. E tāua lenā fautuaga mo ona soo, o ē na ola aʻe i se siʻomaga o loo faatāua ai e le ʻau Faresaio faafiaamiotonu, tulaga aloaʻia ma maualuluga. E tāua foʻi lenā fautuaga mo ona soo uma.

Faitau Atili

Aiseā e Teena ai e le Atua Nisi Tatalo?

Iloilo po o ā ituaiga tatalo e lē tali mai i ai le Atua ma ituaiga tagata e lē faafofoga mai i ai le Atua.