Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

Iesu—Le Ala, le Upu Moni ma le Ola

 MATAUPU 98

Ua Toe Finau le ʻAuaposetolo po o Ai o i Latou e Sili

Ua Toe Finau le ʻAuaposetolo po o Ai o i Latou e Sili

MATAIO 20:17-28 MAREKO 10:32-45 LUKA 18:31-34

  • UA TOE VALOIA E IESU LONA MALIU

  • LE AUALA UA TALI ATU AI IESU I FAANAUNAUGA FIA SILI O LE ʻAUAPOSETOLO

O loo faaauau pea le faigāmalaga a Iesu ma ona soo i le itu i saute o Perea e agaʻi atu i Ierusalema, ma ua latou sopoʻia le vaitafe o Ioritana e latalata i Ieriko. O loo latou faimalaga faatasi ma isi tagata mo le Paseka i le 33 T.A.

O loo muamua atu Iesu i luma o ona soo, ma o loo naunau o ia ina ia taunuu i le aai i le taimi e faia ai le Paseka. Peitaʻi, ua lagona e le ʻausoo le fefefe. I se taimi muamua atu ina ua maliu Lasalo, ma a o sauni le malaga a Iesu mai i Perea e agaʻi atu i Iutaia, na faapea atu ai Toma i isi soo: “Seʻi tatou ō foʻi, ina ia tatou oti faatasi ma ia.” (Ioane 11:16, 47-53) O lea, o le a iai i se tulaga lamatia o latou ola pe a ō atu i Ierusalema. E lētioa fefefe le ʻausoo.

Ina ia sauniunia i latou mo mea o le a tutupu, ua ave ai e Iesu ona aposetolo ua na o i latou ma fetalai atu: “O le a tatou ō aʻe i Ierusalema, ma e tuuina atu ai le Atalii o le tagata i le ʻaufaitaulaga sili ma le ʻautusiupu, ma latou te faasalaina o ia i le oti, e latou te tuuina atu foʻi o ia i tagata o nuu ese, latou te tauemu, ma sasa tigāina, ma tutuʻi o ia i luga o le laau, ae e toe faatūina o ia i le aso lona tolu.”—Mataio 20:18, 19.

O le faatolu ai lea ona fetalai atu o Iesu i ona soo e faatatau i lona maliu ma lona toetū. (Mataio 16:21; 17:22, 23) Ae i le taimi la lenei, ua ia faamatala atu o le a fasiotia o ia e ala i le faatautau i luga o se laau. E ui lava o loo faalogologo atu le ʻausoo iā Iesu, ae e latou te lē o malamalama i le uiga o lana fetalaiga. Atonu o loo latou faatalitalia le toe faafoʻisia o le malo o Isaraelu i luga o le lalolagi, ma maua le mamalu ma le viiga i se malo i le lalolagi faatasi ma Keriso.

O loo iai i le ʻaumalaga Salome le tinā o aposetolo o Iakopo ma Ioane. Ua faaigoa e Iesu nei aposetolo e toʻalua i ni igoa o lona uiga “o Atalii o le Faititili,” ona o le malolosi o o la uiga. (Mareko 3:17; Luka 9:54) Ua umi se taimi o iai faanaunauga o nei aposetolo, ina ia sili o la tulaga i le Malo o Keriso, ma e iloa lelei e lo la tinā lenā mea. Ua faalatalata atu Salome iā Iesu e fai ma sui o lana fanau, ua ifo atu iā te ia, ma talosaga atu. Ua fesili mai Iesu: “O le ā se mea e te manaʻo i ai?” Ua faapea atu Salome: “Ia e fetalai ane ina ia nonofo laʻu fanau e toʻalua, o le tasi i lou itu taumatau a o le isi i lou itu tauagavale i lou malo.”—Mataio 20:20, 21.

O le mea moni, o Iakopo ma Ioane e ana lenei talosaga. Ua faatoʻā uma ona taʻua e Iesu le tulaga faalumaina o le a oo iā te ia. O lea, ua fetalai ane ai o ia iā i laʻua: “Lua te lē iloa le mea ua oulua talosaga mai ai. Pe e mafai ea ona oulua inu i le ipu lea ua toeitiiti oʻu inu ai?” Ua tali mai i laʻua: “E ma te mafaia.” (Mataio 20:22) Peitaʻi, e foliga mai e la te lē o malamalama lava i le uiga o nei upu mo i laʻua.

E ui i lea, ua fetalai atu Iesu: “Lua te inu lava i laʻu ipu, ae ou te lē pule po o ai e nofo i loʻu itu taumatau ma loʻu itu tauagavale, ae e maua lenā tulaga e i latou ua saunia i ai e loʻu Tamā.”—Mataio 20:23.

Ina ua iloa e isi aposetolo e toʻasefulu le mea ua talosaga atu ai Iakopo ma Ioane, ona matuā feita ai lea o i latou. Faamata e tele ni faamatalaga a Iakopo ma Ioane i le taimi muamua sa finau ai le ʻauaposetolo po o ai o i latou e sili? (Luka 9:46-48) E tusa lava po o le ā le mea na tupu i le taimi muamua, ae o le talosaga a Iakopo ma Ioane ua faaalia ai e leʻi faatatauina e aposetolo e toʻasefulu lua, le fautuaga a Iesu i le avea o se tasi ma tagata faatauvaa. O loo tumau pea lo latou faanaunauga fiasili.

Ua filifili nei Iesu e foʻia lenei finauga, faapea feeseeseaʻiga ua aliaʻe mai i le va o le ʻauaposetolo. Ua ia valaau atu iā i latou ma fautua atu ma le alofa: “Tou te iloa, o ē ua taʻua o taʻitaʻi o malo, e pulepuletutū i latou i tagata, ma o ē ua sili, ua pule foʻi i latou i tagata. Ae e lē faapena outou; o sē e fia sili iā te outou e tatau ona avea o ia ma a outou auauna, ma o sē e fia muamua iā te outou, e tatau ona avea o ia ma pologa a tagata uma.”—Mareko 10:42-44.

Ua faailoa atu e Iesu e tatau ona latou mulimuli i lana faaaʻoaʻoga, e ala i le fetalai atu: “E leʻi sau le Atalii o le tagata ina ia auauna mai tagata iā te ia, ae ia auauna atu, ma foaʻi atu lona ola e fai ma togiola e sui aʻi tagata e toʻatele.” (Mataio 20:28) Pe ā ma le tolu tausaga o auauna Iesu i isi, ma o le a ia faia faapea seʻia oo lava ina maliu mo tagata. E manaʻomia e soo uma lenā uiga e pei ona faaalia e Keriso, o le naunau e auauna atu i isi ae e lē o le auauna mai o isi iā i latou, ma ia avea o ni ē e faatauvaa nai lo o le maua o ni tulaga maualuluga.