Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

Iesu—Le Ala, le Upu Moni ma le Ola

 MATAUPU 99

Ua Faamālōlō e Iesu ni Tamāloloa Tauaso ma Fesoasoani iā Sakaio

Ua Faamālōlō e Iesu ni Tamāloloa Tauaso ma Fesoasoani iā Sakaio

MATAIO 20:29-34 MAREKO 10:46-52 LUKA 18:35–19:10

  • UA FAAMĀLŌLŌ E IESU NI TAMĀLOLOA TAUASO I IERIKO

  • UA SALAMŌ LE AOLAFOGA O SAKAIO

Ua taunuu Iesu ma ē o loo latou malaga faatasi i Ieriko, lea e tusa ma le aso e malaga ai mai i Ierusalema. E lua aai sa iai o Ieriko. Pe ā ma le maila le mamao (1.6 km) o le aai tuai mai i le aai fou sa fausiaina i vaitaimi o Roma. A o ō ese Iesu ma le motu o tagata o loo mulimuli atu iā te ia, mai i se tasi o nei aai ae agaʻi atu i le isi aai, ua faalogo ane ni tamāloloa ʻaisi tauaso e toʻalua. O se tasi o i laʻua e igoa iā Patimaio.

Ua faalogo Patimaio ma le isi tamāloa tauaso ua maliu ane Iesu i le aai, ona la alalaga atu lea: “Le Alii e, le Alo o Tavita, ia e alofa mai iā i maʻua!” (Mataio 20:30) Ua matuā fai atu nisi o loo i le motu o tagata iā i laʻua e aua le pisa, ae ua atili ai ona la alalaga atu ma le leotetele. Ina ua iloa e Iesu o loo vāvāō tagata, ona tū lea o ia ma fai atu iā i latou e valaau tamāloloa o loo alalaga mai. Ua ō atu tagata i nei tamāloloa tauaso ma fai atu i se tasi o i laʻua: “Ia tū i luga ma ia lototele, o loo valaau mai o ia e te alu atu.” (Mareko 10:49) O le fiafia tele o lenei tamāloa, ua oso ai o ia i luga, ua tiaʻi lona ofu tele ma alu atu iā Iesu.

Ua fesili atu Iesu: “O le ā se mea lua te mananaʻo ou te faia mo oulua?” Ua talosaga mai nei tamāloloa tauaso: “Le Alii e, seʻi e faapupulaina o maʻua mata.” (Mataio 20:32, 33) Ua alofa mutimutivale Iesu iā i laʻua ma paʻi atu i o la mata, ona fetalai atu lea i se tasi o i laʻua: “Inā alu ia, ua e malosi ona o lou faatuatua.” (Mareko 10:52) Ona pupula ai lea o mata o nei tamāloloa tauaso, ma ua vivii atu i le Atua. Ua vaaia e tagata lenei mea ona latou vivii atu ai foʻi lea i le Atua. Ua mulimuli atu nei tamāloloa sa tauaso iā Iesu.

A o ui atu Iesu i Ieriko, o loo tumutumu ai i inā le motu o tagata e toʻatele. E fia vāai i latou uma i lē na faamālōlōina tamāloloa tauaso. Ua siʻosiʻomia e tagata Iesu, ma o le māfuaaga lea ua lē mafai ai ona iloa atu o ia e nisi. O se tasi o i latou o Sakaio, o ia o le aolafoga sili i totonu ma fafo atu o Ieriko. Talu ai o ia o se tagata puupuu, ua lē mafai la ona ia iloa atu le mea o loo tupu. O lea ua tamoʻe ai o ia e muamua atu i luma o le motu o tagata, ma aʻe i le laau o le sukamoru o loo i le ala lea o loo agaʻi atu i ai Iesu. Ina ua taunuu Iesu i inā ma iloa atu Sakaio o loo i luga o le laau, ona ia faapea atu lea: “Sakaio e, sau vave i lalo, auā e tatau ona ou nofo i lou fale i le asō.” (Luka 19:5) Ua faavave ona alu ifo i lalo Sakaio mai i le laau, ma faanatinati atu i lona fale e tali lana malo faapitoa.

Ina ua vaaia e le motu o tagata lenei mea, ona latou tomumumu ai lea. E latou te manatu e lē talafeagai ona avea Iesu o se mālō a lenei tagata agasala. Ua māfua ona tele ʻoa a Sakaio, ona o lona aveesea o tupe a tagata e ala i tuuaʻiga pepelo a o ia aoina lafoga.

Ina ua ulu atu Iesu i le fale o Sakaio, ona tomumumu ai lea o tagata e faapea: “Ua alu o ia e nonofo ma le tagata agasala.” Peitaʻi ua silafia e Iesu, e mafai ona salamō Sakaio. O le mea tonu lava lenā ua tupu. Ua tulaʻi Sakaio ma faapea atu: “Le Alii e, Faauta! Ua ou avatu le ʻafa o aʻu mea uma i tagata matitiva, ma o mea foʻi na ou aveesea mai i se tasi i se tuuaʻiga pepelo, ou te toe taui atu e taʻifā.”—Luka 19:7, 8.

Maʻeu le mataʻina o le auala ua faaalia ai e Sakaio lona salamō moni! Atonu ua ia iloa mai i faamaumauga o lafoga na ia aoina, le aofaʻiga o tupe sa ia maua mai i tagata Iutaia, ma ua ia taʻutino atu o le a ia taui atu taʻifā e sili atu i lo o le aofaʻi sa ia aoina mai. Ua sili atu lenā i lo o le aofaʻi e manaʻomia e tusa ai ma le Tulafono a le Atua. (Esoto 22:1; Levitiko 6:2-5) Ua taʻutino atu foʻi e Sakaio, o le a ia foaʻi atu i tagata matitiva le ʻafa o mea uma o loo iā te ia.

Ua faafiafiaina Iesu i nei faamaoniga o le salamō moni o Sakaio, ma ua ia fetalai atu: “O le aso nei, ua oo mai ai le faaolataga i lenei aiga, auā o ia foʻi o le atalii o Aperaamo. Auā ua sau le Atalii o le tagata e saʻili ma faaolaina i latou ua leiloloa.”—Luka 19:9, 10.

E leʻi leva tele atu, sa taulaʻi atu ai Iesu i le tulaga o ē ua “leiloloa,” e ala i le talafaatusa i le atalii na leiloa. (Luka 15:11-24) Ae o lea ua ia avatu se faaaʻoaʻoga o se mea moni ua tupu, o se tasi sa foliga mai na leiloa a o lea ua toe maua. E ono tomumumu ma faitio taʻitaʻi lotu ma ē lagolagoina i latou, ona o le uaʻi atu o Iesu iā i latou e pei o Sakaio. E ui i lea, e faaauau pea ona saʻili e Iesu ma toe aumaia nei atalii ua leiloloa o Aperaamo.