Skip to content

Skip to secondary menu

Skip to table of contents

Molimau a Ieova

Faa-Samoa

Iesu—Le Ala, le Upu Moni ma le Ola

 MATAUPU 95

Aʻoaʻo Atu e Faatatau i Talagā Faaipoipoga ma le Alofa i Tamaiti

Aʻoaʻo Atu e Faatatau i Talagā Faaipoipoga ma le Alofa i Tamaiti

MATAIO 19:1-15 MAREKO 10:1-16 LUKA 18:15-17

  • UA FAAILOA MAI E IESU LE SILAFAGA A LE ATUA I TALAGĀ FAAIPOIPOGA

  • LE MEAALOFA O LE NOFOFUA

  • E MANAʻOMIA ONA PEI O TAMAITI

Ua ō ese Iesu ma ona soo mai i Kalilaia. Ua latou sopoʻia le vaitafe o Ioritana ma ui atu i Perea agaʻi i le itu i saute. I le taimi mulimuli sa iai Iesu i Perea, na ia faamatala atu ai i le ʻau Faresaio le faatulagaga a le Atua i talagā faaipoipoga. (Luka 16:18) Ae o lea ua latou toe lāgā foʻi lenei mataupu ina ia tofotofoina ai Iesu.

Na tusi Mose e mafai ona tatala le faaipoipoga ma se fafine, pe afai “ua leaga se mea ua ia faia.” (Teuteronome 24:1) E taofi eseese tagata i māfuaaga e mafai ai ona tatala se faaipoipoga. E talitonu nisi e aofia ai i na māfuaaga ni mataupu faatauvaa. O lea, ua fesili ane ai le ʻau Faresaio iā Iesu: “Pe e taga i le tulafono ona faateʻa e se tamāloa lana avā i so o se māfuaaga?”—Mataio 19:3.

Nai lo o le tali atu o Iesu e faavae i manatu o tagata, ua ia tali atu ma le atamai i le taʻua lea o le faatulagaga a le Atua mo le faaipoipoga: “Tou te leʻi faitaulia ea o lē na foafoaina i laʻua i le amataga, na ia faia i laʻua o le tane ma le fafine, ma na ia fetalai atu, ʻO le mea lea e tuua ai e le tane lona tamā ma lona tinā, ae nonofo faatasi ma lana avā, ona avea ai lea o i laʻua ma tino e tasi’? O lea ua lē toe toʻalua ai, ae ua avea i laʻua ma tino e tasi. O ē ua faatasia e le Atua, aua neʻi tuueseeseina e se tagata.” (Mataio 19:4-6) Ina ua faavae e le Atua le faatulagaga mo le faaipoipoga i le va o Atamu ma Eva, e na te leʻi faia se fuafuaga e toe tatala ai.

Ua finau atu le ʻau Faresaio iā Iesu: “Aiseā la na fai mai ai Mose e avatu se tusi e faamaonia ai ua faateʻa le avā?” (Mataio 19:7) Ua tali mai Iesu: “Ona o lo outou lotomaaa, na faataga ai e Mose outou e faateʻa i a outou avā, ae e lē o le tulaga lenā mai i le amataga.” (Mataio 19:8) E lē o faasino atu le upu “amataga” i aso o Mose, ae o loo faasino atu i le taimi na faavae ai e le Atua le faaipoipoga i Etena.

Ua faailoa atu nei e Iesu se upu moni tāua: “Ou te fai atu iā te outou, ai se tasi e faateʻa i lana avā ae e leʻi faitaaga [upu Eleni, por·neiʹa] lana avā, ma toe faaipoipo i se isi fafine, ua mulilua o ia.” (Mataio 19:9) O lea, e pau le māfuaaga faale-Tusi Paia e mafai ai ona tatala se faaipoipoga, pe afai e faia e se tasi o le paaga ni amioga lē mamā taufeusuaʻiga.

Ua faapea atu le ʻausoo iā Iesu: “Afai o le tulaga lea o le tane ma lana avā, e sili la pe a aua le faaipoipo se tasi.” (Mataio 19:10) Ua manino mai, e tatau i so o se tasi o loo mafaufau e faaipoipo, ona vaai i le faaipoipoga o se faatulagaga tumau.

E tusa ai o le tulaga o le nofofua, ua faapea mai Iesu e iai nisi e fananau mai o ni eunuka ona ua faalētonu o latou totogasā, ma ua lē mafai ai ona latou faia ni feusuaʻiga. O isi ua lē mafai ona faia ni feusuaʻiga, ona ua faaleagaina e tagata o latou fuāmanava. Ae o isi ua latou pulea o latou faanaunauga e faia ai feusuaʻiga, ina ia uaʻi atoatoa atu ai i vala e fesootaʻi i le Malo. Ua augani atu Iesu i lana ʻaufaalogologo: “O lē ua lotomalie e lē faaipoipo, ia nofofua pea o ia.”—Mataio 19:12.

Mulimuli ane, ua avatu e tagata a latou fanau iā Iesu. Peitaʻi ua vavao i latou e le ʻausoo, atonu o loo mananaʻo e taofi tagata mai i le faalavelave atu iā Iesu. Ua lē fiafia Iesu i lenei mea ma ua fetalai atu: “Tuu ai pea tamaiti e ō mai iā te aʻu, ae aua le taofia i latou. Auā ua fai le malo o le Atua ma tofi o ē e pei o nei tamaiti. E moni ou te fai atu iā te outou, O sē na te lē taliaina le malo o le Atua e pei o se tamaitiiti, e lē ulu atu lava i ai o ia.”—Mareko 10:14, 15; Luka 18:15.

Maʻeu se lesona lelei! Ina ia talia le Malo o le Atua, e tatau ona tatou faaalia le agamalu ma ia aʻoaʻogofie e pei o tamaiti. Ua faaalia e Iesu lona alofa mo tamaiti, i lona tago atu ma sii mai i latou ma faamanuia i ai. E na te faaalia foʻi lenā alofa faapelepele iā i latou uma e “taliaina le malo o le Atua e pei o se tamaitiiti.”—Luka 18:17.