Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

Iesu—Le Ala, le Upu Moni ma le Ola

 MATAUPU 66

I Ierusalema mo le Tausamiga o Faleapitaga

I Ierusalema mo le Tausamiga o Faleapitaga

IOANE 7:11-32

  • AʻOAʻO ATU IESU I LE MALUMALU

Ua iloga Iesu i ana galuega sa faia, talu mai le taimi o lona papatisoga. Ua faitau afe tagata Iutaia ua vāai i ana vavega, ma ua salalau atu tala e faatatau i ana galuega i le atunuu uma. O lea, ua oo nei i le Tausamiga o Faleapitaga (po o Fale Lauvao) i Ierusalema, ma o loo saʻili le toʻatele iā te ia.

E taofi eseese tagata e faatatau iā Iesu. Ua faapea mai isi: “O ia o se tagata lelei.” A ua fai mai isi: “E leai, auā ua ia faasesēina le motu o tagata.” (Ioane 7:12) Ua faia taumusumusu le tele o nei talanoaga i aso amata o le tausamiga. Peitaʻi, e leai ma se tasi e lototele e fai atu se tala e lagolagoina ai Iesu, ona o le fefefe i le auala o le a tali mai ai taʻitaʻi Iutaia.

Pe tusa o le aso lona fā o le tausamiga, ua maliu atu ai Iesu i le malumalu. Ua maofa le toʻatele o tagata i le mataʻina o le auala ua ia aʻoaʻo atu ai. E leʻi auai lava Iesu i se aʻoga faalelotu a Iutaia. O lea, ua taumānatu ai tagata Iutaia ma faapea ane: “E faapefea ona poto lenei tagata i tusi ae e leʻi lelei ni ana aʻoga?”—Ioane 7:15.

Ua fetalai atu Iesu: “O mea ua ou aʻoaʻoina atu, e lē o ni oʻu manatu, a o manatu o lē na auina mai aʻu. Afai e naunau se tasi e fai Lona finagalo, e iloa ai e ia pe e mai i le Atua le aʻoaʻoga, po o soʻu lava manatu.” (Ioane 7:16, 17) E ōgatusa aʻoaʻoga a Iesu ma le Tulafono a le Atua. Ua manino mai la, o loo saʻilia e Iesu le viiga mo le Atua ae e lē o se viiga mo ia lava.

Ua toe fetalai atu Iesu: “Pe e leʻi tuuina atu ea e Mose le Tulafono iā te outou? Ae e leai se tasi o outou e usiusitaʻi i le Tulafono. Aiseā ua outou lamalama ai e fasioti iā te aʻu?” E lē o iloa e isi o loo iai i le tausamiga, atonu o ni tagata e asiasi mai, o loo taumafai ni tagata e fasioti Iesu. E faigatā ona latou talitonu, e mananaʻo tagata e fasioti se faiaʻoga e pei o Iesu. O lea ua latou faapea ane ai, atonu e iai se mea o tupu iā Iesu ua māfua ai ona ia fetalai i na upu. Ua latou faapea atu: “Ua uluitinoina oe e se temoni. O ai o loo lamalama e fasioti iā te oe?”—Ioane 7:19, 20.

I le tausaga ma le ʻafa ua mavae, na mananaʻo ai taʻitaʻi Iutaia e fasioti Iesu ina ua uma ona ia faamālōlōina se tamāloa i le Sapati. Ua faaaogā nei e Iesu se faamatalaga faatupu manatu, ma faaalia ai le lē magafagafa o nei taʻitaʻi. Ua ia faauaʻi atu manatu i le Tulafono lea o loo taʻua ai, e tatau ona peritomeina se pepe tama i le aso lona valu, e tusa lava po o le Sapati. Ona fesili atu lea o Iesu: “Afai e peritome se tagata i le sapati ina ia lē solia ai le tulafono a Mose, aiseā ua outou matuā feita ai iā te aʻu auā ua ou faamālōlōina se tagata i le sapati? Soia tou te faamasino e tusa ma mea ua outou vāai i ai, ae ia tonu la outou faamasinoga.”—Ioane 7:23, 24.

Ua faapea ane nisi o ē o loo nonofo i Ierusalema: “Pe e lē o le tagata ea lenei o loo latou [faipule o Iutaia] lamalama e fasioti? Ae vaai! O loo aʻoaʻo atu o ia i nofoaga faitele, ae e leai sa latou tala e fai atu i ai. Po ua iloa ea e faipule o le Keriso lea?” Aiseā la e lē talitonu ai tagata o Iesu o le Keriso lea? Ua faaauau la latou faamatalaga: “Ua tatou iloa le mea e sau ai lenei tagata; ae pe a maliu mai le Keriso, e lē iloa e se tasi le mea e sau ai o ia.”—Ioane 7:25-27.

A o iai pea Iesu i le malumalu, ua ia fetalai atu: “Ua outou iloa aʻu ma le mea na ou sau ai. Ae ou te leʻi sau ona o loʻu lava loto, ae e iai moni lē na auina mai aʻu, ae tou te lē iloa o ia. Ua ou iloa o ia, auā o aʻu o lona sui, ma o Ia o lē na auina mai aʻu.” (Ioane 7:28, 29) O lea, ua lamalama ai tagata e puʻe iā Iesu, ina ia faafalepuipui pe fasiotia o ia. Peitaʻi, e lē o taulau a latou taumafaiga, auā e leʻi oo i le taimi e tatau ona maliu ai Iesu.

E ui i lea, ua faatuatua le toʻatele iā Iesu. Sa savali o ia i luga o le sami, faatoʻafilemu le matagi, fafaga le faitau afe i nai falaoa ma iʻa, faamālōlō ē e mamaʻi ma ē e pipili, faapupula mata o ē tauaso, faamālōlō tagata lepela, ma toe faatutū ē ua feoti. O lea, ua fesili atu ai tagata: “Pe a taunuu mai le Keriso, po o le a ia faia ea ni faailoga e sili atu i lo o lenei tagata?”—Ioane 7:31.

Ina ua faalogo le ʻau Faresaio i tala a le motu o tagata e faatatau iā Iesu, ona latou aauina atu lea ma le ʻaufaitaulaga sili o leoleo e puʻe iā te ia.