Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

Iesu—Le Ala, le Upu Moni ma le Ola

 MATAUPU 77

Ua Avatu e Iesu Fautuaga e Faatatau i ʻOa

Ua Avatu e Iesu Fautuaga e Faatatau i ʻOa

LUKA 12:1-34

  • TALAFAATUSA E FAATATAU I SE TAMĀLOA MAUʻOA

  • UA FETALAI IESU E FAATATAU I OREVA MA LILI O LE VAO

  • O LE A IAI SE “LAFU MAMOE ITIITI” I LE MALO

A o taumafa Iesu i le fale o se Faresaio, o loo potopoto i fafo le faitau afe o tagata ma faatalitali seʻi maliu ane o ia. Sa faapena foʻi le motu o tagata i Kalilaia a o iai o ia i inā. (Mareko 1:33; 2:2; 3:9) Peitaʻi o lea ua iai nei Iesu i Iutaia, ma e toʻatele tagata o loo mananaʻo e vāai ma faalogologo atu iā te ia, o se uiga e ese mai i uiga sa faaalia e le ʻau Faresaio a o latou faiʻaiga faatasi.

Ua fetalai muamua atu nei Iesu i ona soo, e faatatau i se lapataʻiga lea e iai se uiga tāua mo i latou: “Ia outou mataala i le mea faafefete a le ʻau Faresaio, o le faafiaamiotonu lea.” Sa avatu foʻi e Iesu lenei lapataʻiga i se taimi ua teʻa. Ae o le mea sa ia vaaia i le taimi na aai ai ma le ʻau Faresaio, ua faaalia ai le tāua tele o lenei lapataʻiga. (Luka 12:1; Mareko 8:15) E taumafai le ʻau Faresaio e natia o latou uiga leaga, e ala i le faafoliga atu o i latou o ni tagata lolotu. O se lamatiaga lenā mea, ma e tatau ona faailoa atu o latou uiga moni. Ua fetalai atu Iesu: “E leai se mea e matuā natia e lē faaalia, e leai foʻi se mea lilo e lē faailoaina.”—Luka 12:2.

Atonu o le toʻatele o tagata o loo lolofi ane iā Iesu, o tagata mai i le itumalo o Iutaia e leʻi faalogo muamua iā te ia a o aʻoaʻo atu i Kalilaia. O lea, ua ia toe taʻua ai manatu autū o mea sa ia aʻoaʻoina i Kalilaia. Ua augani atu o ia i lana ʻaufaalogologo: “Aua tou te matataʻu i ē e fasiotia le tino, auā pe a uma, ona lē toe mafai lea ona latou faia o se isi mea.” (Luka 12:4) Ua toe faamamafa atu e Iesu i ona soo le tāua o le faatuatuaina o Ieova e na te tausia i latou. E manaʻomia foʻi ona latou taliaina le Atalii o le tagata, ma iloa e mafai e le Atua ona fesoasoani iā i latou.—Mataio 10:19, 20, 26-33; 12:31, 32.

Ua faapea ane se tamāloa o loo i le motu o tagata: “Le Aʻoaʻo e, ia e fetalai atu i loʻu uso ina ia vaelua mai le tofi iā te aʻu.” (Luka 12:13) E tusa ai ma le Tulafono, e tuuina atu i le ulumatua vaega e lua o le tofi. E leai la se māfuaaga o le a tupu ai fua se finauga i lenei mataupu. (Teuteronome 21:17) E foliga mai e sili atu le mea o loo manaʻo i ai lenei tamāloa, nai lo o le vaega o le tofi ua tuuina atu iā te ia e tusa ai ma le tulafono. Ua faaalia e Iesu le atamai ma le lē faaituʻau e ala i le fesili atu: “Sole, o ai na tofia aʻu e faamasinoina pe vaevaeina o outou tofi?”—Luka 12:14.

Ua apoapoaʻi atu Iesu i le motu o tagata: ʻIa outou mataala pea ma leoleo iā te outou i le manaʻo tele, auā e lē ola se tasi i le tele o ana mea ua iā te ia.’ (Luka 12:15) Po o le ā lava le tele o ʻoa a se tasi, ae pe e lē oo ea iā te ia le oti ma ia tuua ai na mea uma? Ua faamamafa atu e Iesu lea manatu e ala i se talafaatusa, lea e faaalia ai le tāua o le iai o se talaaga lelei ma le Atua:

“Ua fua tele mai le fanua o se tasi tagata mauʻoa. Ona manatu ifo lea o ia e faapea, ʻO le ā se mea ou te faia, auā o lenei ua leai se mea e tuu ai aʻu saito?’ Ona ia faapea lea, ʻO le mea lenei o le a ou faia: O le a ou tala i lalo oʻu fale saito, ma toe fau ni fale tetele, o i inā o le a ou teuina ai aʻu saito ma aʻu mea lelei uma. Ona ou faapea ifo lea iā te aʻu: “Ua ou maua le tele o mea lelei ua faaputuina mo le tele o tausaga; ia ou faifaimālie ai, ia ʻai ma inu, ma fiafia.”’ A ua fetalai atu le Atua iā te ia, ʻO oe na le tagata lē faautauta, o le pō nei e latou te mananaʻo ai i lou ola. O ai la o le a fai mo ia mea na e faaputuina?’ O lea, e faapena le tagata e faaputu ʻoa mo ia lava, ae e lē mauʻoa i le silafaga a le Atua.”—Luka 12:16-21.

E mafai ona maileia soo o Iesu faapea isi o lana ʻaufaalogologo, i le saʻilia ma le faaputuina o ʻoa, pe faalavelavea foʻi la latou auaunaga iā Ieova i popolega o le olaga. O lea, ua toe avatu ai e Iesu le fautuaga sa ia tuuina atu i le tausaga ma le ʻafa ua mavae, i lana Lauga i luga o le Mauga:

ʻAua tou te toe popole i o outou ola i mea tou te aai ai, po o outou tino i ofu tou te oofu ai. Ia vaavaai lelei i oreva, auā latou te lē lūlū ni fatu pe selesele, pe faaputu i se fale saito, ae e fafagaina i latou e le Atua. Pe e lē sili ea ona tāua outou i lo manufelelei? Ia vaavaai lelei pe e faapefea ona tutupu lili o le vao, latou te lē galulue, e lē milo foʻi. Ae ou te fai atu iā te outou, E oo lava iā Solomona ma lona mamalu uma, e leʻi tutusa lona matagofie ma se tasi o nei lili. O lea, aua tou te toe soona popole i le saʻilia po o ā mea tou te aai ai, ma po o ā foʻi mea tou te inu ai. Ua silafia e lo outou Tamā, o mea ia o loo outou manaʻomia. Ia faaauau pea ona outou saʻili lona malo, ona faaopoopoina ai lea o nei mea iā te outou.’—Luka 12:22-31; Mataio 6:25-33.

O ai i latou o le a saʻilia le Malo o le Atua? Ua faailoa mai e Iesu o le a faia faapea e se “lafu mamoe itiiti,” o se fuainumera toʻaitiiti o tagata faamaoni. Mulimuli ane, o le a faailoa mai o lo latou aofaʻi e na o le 144,000. O le ā le faamanuiaga o le a latou mauaina? Ua faamautinoa atu e Iesu iā i latou: “Ua finagalo malie lo outou Tamā e tuuina atu le malo iā te outou.” E latou te lē taulaʻi atu i le mauaina o ʻoa i le lalolagi, lea e mafai e tagata ona gaoia. Nai lo o lea, e uaʻi atu o latou loto i “le ʻoa i le lagi e lē mou atu,” ma o i inā foʻi e latou te pule faatasi ai ma Keriso.—Luka 12:32-34.