Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

Iesu—Le Ala, le Upu Moni ma le Ola

 MATAUPU 73

Ua Avea se Tagata Samaria ma Tuaoi Moni

Ua Avea se Tagata Samaria ma Tuaoi Moni

LUKA 10:25-37

  • LE AUALA E MAUA AI LE OLA E FAAVAVAU

  • SE TIAOI SAMARIA AGALELEI

Ua iai nei Iesu e latalata i Ierusalema, ma ua ō atu iā te ia le toʻatele o tagata Iutaia. O nisi e mananaʻo e aʻoaʻoina i latou e Iesu, ae o isi e na ona fia tofotofo iā te ia. O se tasi o i latou o se tagata e atamai i le Tulafono. Ua fesili atu o ia iā Iesu: “Le Aʻoaʻo e, o ā ni mea e tatau ona ou faia ina ia ou maua ai le ola e faavavau?”—Luka 10:25.

Ua iloa lelei e Iesu e lē o fesili atu lenei tagata ona o se fia malamalama. Atonu o loo taumafai o ia e uunaʻia Iesu, ina ia tali atu i se auala e faatigā ai i tagata Iutaia. Ua silafia e Iesu ua leva ona iai se manatu o lea tagata e faatatau i lenei mataupu. O lea, ua ia tali atu ai i se auala atamai, ina ia faailoa mai ai e lenei tagata le mea tonu o loo i lona mafaufau.

Ua fesili atu Iesu: “O le ā le mea o loo tusia i le Tulafono? O le ā sau faitau i ai?” Na aʻoaʻoina lenei tagata i le Tulafono a le Atua, ma o le Tulafono lea ua faavae ai lana tali. Ua ia siiina mai le Teuteronome 6:5 ma le Levitiko 19:18 lea e faapea mai: “ʻIa e alofa atu iā Ieova lou Atua ma lou lotoatoa, ma lou ola atoa, ma lou malosi atoa, ma lou mafaufau atoa,’ ma ʻia e alofa atu i lou tuaoi e pei o oe lava iā te oe.’” (Luka 10:26, 27) Po o le tali lea i le fesili sa lāgā e le tamāloa i le amataga?

Ua fetalai atu Iesu i le tamāloa: “Ua saʻo lau tali; ʻia e faia pea lenā mea ona e maua ai lea o le ola.’” Pe na māeʻa ai i inā le talanoaga? E lē o manaʻo le tamāloa e tau ina faapea atu Iesu e saʻo lana tali. Nai lo o lea, “ona o lona faafiaamiotonu,” ua ia taumafai ai e saʻili ni faamaoniga e faapea ai e saʻo ona manatu, ma e saʻo le auala o loo ia feutagaʻi ai ma isi. O lea ua fesili atu ai o ia iā Iesu: “O ai la loʻu tuaoi?” (Luka 10:28, 29) E ui e foliga mai e faigofie lenei fesili, ae e iai sona uiga tāua. I le ā le itu?

E manatu tagata Iutaia o le upu “tuaoi,” e faasino atu tau lava o i latou e tausia tū ma aga a Iutaia, ma atonu e foliga mai o loo lagolagoina e le Levitiko 19:18 lenā manatu. O le mea moni, e ono faapea mai se tagata Iutaia e “sā i le tulafono” ona faifaimea faatasi o ia ma se tagata e lē o se Iutaia. (Galuega 10:28) O lea, e manatu lenei tamāloa iā te ia o se tagata amiotonu, pe afai e feutagaʻi ma isi tagata Iutaia i se auala agalelei. Atonu o le manatu foʻi lenā o nisi o soo o Iesu. Ae pe afai o se tagata e lē o se Iutaia, e manatu nisi e mafai ona latou lē feutagaʻi ma ia i se auala agalelei, talu ai e lē o ia o se “tuaoi.”

Ua faapefea la ona faasaʻo e Iesu lenei manatu, e aunoa ma le faatigā i faalogona o lenei tamāloa faapea isi tagata Iutaia? E ala i le faamatalaina atu o se tala e faapea: “Na alu ifo mai Ierusalema i Ieriko se tasi tagata, ma na maua o ia e tagata faomea, ua latou aveese ona ofu ma sasa iā te ia, ona latou ō lea ae tuua o ia ua toeitiiti a oti. Ona alu ifo lea o se ositaulaga i lea auala ma iloa atu o ia, a ua ui ane o ia i le isi itu ma alu. Na faapena foʻi le sa Levī, ina ua alu ifo i lea mea ma iloa atu o ia, ona ui ane lea o ia i le isi itu ma alu. A ua alu atu le tasi tagata Samaria, ua tau atu i le mea o iai o ia, ua iloa atu o ia, ona mutimutivale ai lea o lona alofa iā te ia.”—Luka 10:30-33.

E iloa lelei e le tamāloa o loo faamatalaina atu i ai e Iesu lenei tala, o le toʻatele o ositaulaga ma sa Levī o loo fesoasoani i le malumalu, e nonofo i Ieriko. E tusa ma le 14 maila (23 km) le mamao e tatau ona latou faimalaga ifo ai mai i le malumalu, e toe foʻi atu i o latou aiga. E mafai ona lamatia ola o tagata e faimalaga i lenā ala, ona o le toʻatele o tagata gāoi e osofaʻia i latou. Pe a maua atu e se ositaulaga po o se sa Levī se tagata Iutaia o loo faamanuʻalia i le ala, pe e lē tatau ea ona la fesoasoani iā te ia? E tusa ai o le tala na faamatalaina e Iesu, e la te leʻi faia faapea. O le tagata na fesoasoani i le tagata Iutaia o se tamāloa Samaria, lea e matuā inosia e tagata Iutaia.—Ioane 8:48.

O le ā le auala na fesoasoani ai lenei tagata Samaria i le tagata Iutaia lea ua faamanuʻalia? Ua faapea atu Iesu: “Ua alu atu iā te ia, ma liligi le suāuu ma le uaina i ona manuʻa ma fusifusi i ai. Ona tuu lea e ia o le tagata i luga o lana manu, ua avatu i le faletalimālō ma tausi iā te ia. I le aso na sosoo ai, ona ia tuuina atu lea o tenari e lua i le tagata e ana le faletalimālō, ma faapea atu, ʻIa e tausi iā te ia, ma o nisi mea e te toe faatau mai mo ia, ou te toe totogi atu pe a ou toe foʻi mai.’”—Luka 10:34, 35.

Ua māeʻa nei ona faamatala atu e Iesu le Faiaʻoga Sili le tala, ona ia fai atu lea o se fesili faatupu manatu: “O ai o i latou nei e toʻatolu, e foliga mai o le tuaoi o le tagata lea na maua e le ʻaufaomea?” Atonu e musu lenei tamāloa e faapea atu “o le tagata Samaria.” O lea ua ia tali atu ai: “O lē na alofa mutimutivale iā te ia.” Ua faailoa atu nei ma le manino e Iesu le lesona ua aʻoaʻoina mai i lenei tala, ma augani atu e faapea: “Inā alu ia, ma ia faapea ona e faia.”—Luka 10:36, 37.

Maʻeu le atamai o lenei auala e aʻoaʻo atu ai. O le ā e tupu pe ana fetalai saʻo atu Iesu i le tamāloa, o ona tuaoi foʻi tagata e lē o ni Iutaia? Faamata e talia e lenei tamāloa ma isi tagata Iutaia lea manatu? E mautinoa lava e leai. O lea, ua faamatala atu ai e Iesu se tala e faigofie ona malamalama i ai, ma faaaogā faaupuga e masani ai lana ʻaufaalogologo. Ua manino mai la le tali i le fesili: “O ai la loʻu tuaoi?” O le tuaoi moni, o se tasi lea e faaalia le alofa ma le agalelei e pei ona poloaʻia i tatou e le Tusi Paia e fai.