Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

Iesu—Le Ala, le Upu Moni ma le Ola

 MATAUPU 74

O Lesona e Faatatau i le Agaga Talimālō ma le Tatalo

O Lesona e Faatatau i le Agaga Talimālō ma le Tatalo

LUKA 10:38–11:13

  • UA ASIASI ATU IESU IĀ MARETA MA MARIA

  • E TĀUA LE FINAFINAU PEA I LE TATALO

O loo i le itu i sasaʻe o le mauga o Olive, le nuu o Petania lea e pe ā ma le lua maila (3 km) le mamao mai i Ierusalema. (Ioane 11:18) Ua alu atu Iesu i inā, ma ua ulu atu i le fale o se ʻauso e toʻalua, o Mareta ma Maria. O i laʻua faatasi ai ma lo la tuagane o Lasalo, o ni uō mamae a Iesu. Ua latou faafeiloaʻi atu nei ma le māfana iā te ia.

O se faaeaga mo i latou le asiasi atu o le Mesia. Ua matuā naunau Mareta e saunia mo Iesu mea e aupito sili ona lelei. O lea, ua ia saunia ai se taumafataga tele. A o pisi Mareta i le faia o nei tapenaga, o loo nofo pea i tafatafa o vae o Iesu Maria ma faalogologo atu iā te ia. Ua faapea atu Mareta iā Iesu: “Le Alii e, e te lē manatu mai ea, auā ua tuu mai e loʻu uso na o aʻu e faia nei mea uma? Seʻi e fai ane iā te ia e sau e fesoasoani mai iā te aʻu.”—Luka 10:40.

E lē o faitio Iesu i le gaoioiga ua faia e Maria. Peitaʻi ua ia fautua atu iā Mareta, ona o lona soona popole i le sauniaina o nei mea ma ua ia faapea atu: “Mareta, Mareta e, ua e popole ma atuatuvale i le tele o mea. Ae e itiiti lava ni mea e manaʻomia, pe e na o le tasi foʻi. A ua filifilia e Maria le mea lelei, ma e lē aveesea mai iā te ia.” (Luka 10:41, 42) Ua faailoa mai e Iesu, e lē manaʻomia ona faaalu se taimi tele i le sauniunia o ni meaʻai se tele pe a faia se taumafataga. A maua lava se meaʻai se tasi, ua lava ma totoe lenā.

E lelei faanaunauga o Mareta. E manaʻo o ia ina ia avea o sē e talimālō lelei. Peitaʻi o lona popole tele i le sauniaina o meaʻai, ua ia misia ai le avanoa e maua ai aʻoaʻoga aogā mai i le Alo o le Atua. Ua faamamafa atu e Iesu, sa faia e Maria se filifiliga atamai, lea e iai ni aogā tumau mo ia. E tatou te aʻoaʻoina mai ai foʻi se lesona i lenei mea.

I se taimi mulimuli ane, ua taʻua ai e Iesu se isi lesona e tāua foʻi. Ua fesili atu se tasi o soo o Iesu iā te ia: “Le Alii e, ia e aʻoaʻo mai iā i matou i le tatalo, e pei foʻi ona aʻoaʻo e Ioane i ona soo.” (Luka 11:1) Ua uma ona faailoa atu e Iesu lenei mea i le tausaga ma le ʻafa ua mavae, i lana Lauga i luga o le Mauga. (Mataio 6:9-13) Ae atonu e leʻi iai lenei soo i lenā taimi, o lea, ua toe faamatala atu ai e Iesu manatu autū e faatatau i le faia o tatalo. Ua sosoo nei ma lona faamatalaina atu o se talafaatusa, e faamatilatila ai le tāua o le finafinau pea i le tatalo.

“O ai o outou e ana le uō e alu atu i ai i le vaeluapō ma faapea atu, ʻLaʻu uō e, seʻi aumai iā te aʻu ni falaoa se tolu, auā ua faatoʻā taunuu mai le malaga a se tasi o aʻu uō, ma e leai se mea ou te laulauina atu mo ia’? A ua tali mai lenā uō mai totonu o le fale, ʻSoia le faalavelave mai iā te aʻu. Ua loka le faitotoʻa, ma ua matou momoe ma laʻu fanau. E lē mafai ona ou toe tū atu e avatu se mea iā te oe.’ Ou te fai atu iā te outou, E ui lava o ia o lana uō, ae e lē tū atu o ia ma avatu se mea, peitaʻi ona o lona faatauanau atu pea, e tulaʻi ai loa o ia ma avatu iā te ia mea na te manaʻomia.”—Luka 11:5-8.

E lē o faapea mai Iesu e lē finagalo Ieova e tali mai i ōlega, e pei ona sa faia e le uō a lē na talosaga atu. Peitaʻi, ua ia faailoa mai ai, pe afai e tali mai se uō musuā ona o le faatauanau atu pea a lana uō, e sili atu la ona tali mai lo tatou Tamā alofa i le lagi i ōlega a ana auauna faamaoni. Ua toe faaauau le fetalaiga a Iesu: “Ou te fai atu iā te outou, Ia talosaga atu pea, ona foaʻiina mai lea iā te outou. Ia saʻili atu pea, ona outou maua ai lea. Ia tuʻituʻi atu pea, ona tatalaina mai lea iā te outou. Auā o ē e talosaga atu, e foaʻiina mai iā i latou. O ē e saʻili atu, e mauaina e i latou, ma o ē e tuʻituʻi atu, e tatalaina mai iā i latou.”—Luka 11:9, 10.

Ua faamamafa atu nei e Iesu le uiga o lana fetalaiga, e ala i le faia o se faatusatusaga i tamā faaletagata: “O ai se tamā o iā te outou e ōle mai lona atalii iā te ia mo se iʻa, ae ia avatu i ai se gata ae e lē o se iʻa? Pe e ōle mai foʻi mo se fuāmoa, ae e avatu i ai se akarava? O lea la, o outou o ē e leaga, afai tou te avatu i a outou fanau meaalofa lelei, e sili atu la ona foaʻi mai e le Tamā o i le lagi le agaga paia iā i latou o ē e ōle atu iā te ia!” (Luka 11:11-13) Maʻeu le faalaeiauina o i tatou i le iloaina, o loo finagalo lo tatou Tamā e faafofoga mai ma tali mai i o tatou manaʻoga!