Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

Iesu—Le Ala, le Upu Moni ma le Ola

 MATAUPU 70

Ua Faamālōlōina e Iesu se Tamāloa Tauaso

Ua Faamālōlōina e Iesu se Tamāloa Tauaso

IOANE 9:1-18

  • UA FAAMĀLŌLŌINA SE TAMĀLOA ʻAISI NA FANAU MAI E TAUASO

O loo iai pea Iesu i Ierusalema i le aso Sapati. A o femaliuaʻi o ia ma ona soo i totonu o le aai, ua latou vaaia ai se tamāloa ʻaisi na fanau mai e tauaso. Ua fesili atu le ʻausoo iā Iesu: “Le Aʻoaʻo e, o ai na agasala, o le tamāloa lenei po o ona mātua, auā na fanau mai lava o ia ua tauaso?”—Ioane 9:2.

O loo iloa e le ʻausoo, e leʻi ola muamua lenei tamāloa i se tino agaga a o leʻi fanau mai o ia. Peitaʻi, atonu o loo latou taumānatu pe faamata e agasala se tagata a o iai pea i le manava o lona tinā. Ua tali atu Iesu: “E leʻi agasala lenei tamāloa po o ona mātua, ae ina ia faaalia ai galuega a le Atua e ala iā te ia.” (Ioane 9:3) O lea, e leʻi tauaso lenei tamāloa ona o se mea sesē po o se agasala patino na ia faia po o ona mātua. Ae ua māfua ona o le agasala a Atamu lea ua fananau mai ai tagata uma e lē lelei atoatoa, ma aafia ai i āuga leaga e pei o le tauaso. O le tulaga tauaso o lenei tamāloa ua maua ai e Iesu se avanoa e faaalia ai galuega a le Atua, e pei ona ia faia i le taimi ua teʻa i le faamālōlōina o tagata mamaʻi.

Ua faamamafa atu e Iesu le faanatinati o le faia o nei galuega, e ala i le faapea atu: “E tatau ona tatou faia galuega a lē na auina mai aʻu manū o ao; e oo mai le pō, e lē mafai ona toe galue ai se tasi. A o oʻu iai pea i le lalolagi, o aʻu o le malamalama o le lalolagi.” (Ioane 9:4, 5) E lē o toe umi ona oo lea i le taimi e maliu ai Iesu, lea e peiseaʻī ai ua iai o ia i le pogisa o le tuugamau, lea o le a lē toe mafai ai ona ia faia se galuega. Peitaʻi a o leʻi oo i lenā taimi, o loo faaauau pea ona avea o ia ma puna o le malamalama.

Pe faamata o le a faamālōlōina e Iesu le tamāloa tauaso? Pe afai o le tulaga lenā, e faapefea ona ia faamālōlōina o ia? Ua feanu Iesu i le palapala ma palu ai i ona fāua. Ua ia nini ai mata o le tamāloa ma faapea atu: “Inā alu ia e fufulu i le vai tāʻele o Seloa.” (Ioane 9:7) Ua usitaʻi le tamāloa i lenā faatonuga, ma ua pupula ai ona mata. Maʻeu le fiafia o lenei tamāloa, ona o lea ua mafai ona vaai mo le uluaʻi taimi!

Ua maofa tuaoi ma ē na vāai muamua iā te ia o tauaso, ma ua latou faapea ane: “Pe e lē o le tamāloa ea lenei na masani ona nofo ma ʻaisi?” Ua fai mai nisi: “O ia lenei.” Ae ua lē talitonu isi ma faapea atu: “E leai, ae e pei uma lava o ia.” Peitaʻi, ua tali mai le tamāloa: “O aʻu lenei o ia.”—Ioane 9:8, 9.

O lea, ua latou fesili atu ai iā te ia: “Na faapefea ona pupula ou mata?” Ua tali mai o ia: “O le tagata e igoa iā Iesu, na ia palu le palapala, ma nini ai oʻu mata, ma faapea mai iā te aʻu, ʻAlu i Seloa e fufulu ai.’ Ona ou alu lea ma fufulu, ma ua ou pupula ai.” Ua latou toe fesili atu: “O fea la o iai lenā tagata?” Ua tali mai le tamāloa ʻaisi: “Ou te lē iloa.”—Ioane 9:10-12.

Ua taʻitaʻi atu nei e tagata le tamāloa na tauaso i le ʻau Faresaio, o ē o loo fia iloa foʻi le auala na pupula ai ona mata. Ua fai atu le tamāloa iā i latou: “Na ia tuu le palapala i oʻu mata, na ou fufuluina, ma ua ou vaai.” E tatau ona fiafia le ʻau Faresaio ua faamālōlōina lenei tagata ʻaisi. Nai lo o lea, ua taʻusalaina e nisi o i latou Iesu e faapea: “E lē mai i le Atua lenei tagata, auā na te lē tausia le Sapati.” Ae ua faapea atu isi: “E faapefea ona faia e se tagata agasala ni faailoga faapenei?” (Ioane 9:15, 16) O lea ua fevaevaeaʻi ai i latou.

O le eseese o o latou manatu e faatatau iā Iesu, ua latou fesili atu ai i le tamāloa na tauaso: “O le ā sau upu e uiga i lenei tagata, o lē na ia faapupulaina ou mata?” Ua tali mai ma le mautinoa o ia: “O ia o se perofeta.”—Ioane 9:17.

E lē mananaʻo le ʻau Faresaio e talitonu i le faamatalaga a le tamāloa. Atonu ua latou mafaufau o loo faia e Iesu ma lenei tamāloa se faufauga ina ia faasesēina ai tagata. O lea, ua latou manatu ai e pau le auala e foʻia ai lenei mataupu, o le fesili atu lea i mātua o lenei tamāloa pe e moni lava na tauaso o ia.