Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

Iesu—Le Ala, le Upu Moni ma le Ola

 MATAUPU 75

Ua Faailoa Atu e Iesu le Puna o le Fiafia Moni

Ua Faailoa Atu e Iesu le Puna o le Fiafia Moni

LUKA 11:14-36

  • TULIESEA TEMONI E ALA I LE “AAO O LE ATUA”

  • LE PUNA O LE FIAFIA MONI

Ua faatoʻā uma ona toe taʻua e Iesu le auala e tatalo ai. Peitaʻi, e lē na o le pau lenā o le mataupu e masani ona tulaʻi mai a o faagasolo lana faiva. A o faia e Iesu vavega i Kalilaia, sa toe tuuaʻia foʻi o ia e faapea o le mana mai i le pule o temoni ua ia faia ai faamālōlōga. Ae o lea foʻi ua toe tuuaʻia o ia i lenei mea i Iutaia.

Ina ua tuliesea e Iesu se temoni na māfua ai ona gūgū se tamāloa, na maofa le motu o tagata. Peitaʻi, e lē o lagona na o ē na faitio iā Iesu. Ua latou toe tuuaʻia foʻi o ia e faapea: “Ua mafai ona ia tuliesea temoni ona o Pelesepulo, le pule o temoni.” (Luka 11:15) O loo saʻilia pea e isi tagata nisi faamaoniga e iloa ai po o ai moni Iesu, e ala i le fesili atu iā te ia mo se faailoga mai i le lagi.

Ua silafia e Iesu o loo latou taumafai e tofotofo iā te ia. O lea, ua ia tali atu ai e pei o le auala na tali atu ai i ē na tuuaʻia o ia i Kalilaia. Ua ia fetalai atu o malo uma e fevaevaeaʻi e lē tumau ia, ma pe “afai e fevaevaeaʻi Satani, e faapefea la ona tumau o lona malo?” Ona ia fetalai tuusaʻo atu lea iā i latou: “Pe afai o le aao o le Atua ou te tulia ai temoni, o lona uiga ua oo mai lava iā te outou le malo o le Atua.”—Luka 11:18-20.

O le taʻua e Iesu o le “aao o le Atua,” ua toe faamanatu atu ai i lana ʻaufaalogologo mea na tutupu i aso ua mavae i Isaraelu. Ina ua vāai i latou sa iai i le maota o Farao i le vavega sa faia e Mose, ona latou faapea ane lea: “O le aao o le Atua!” O le “aao [foʻi] o le Atua” lea sa tusia Tulafono e Sefulu i papamaa e lua. (Esoto 8:19; 31:18) I se tulaga talitutusa, o le “aao [foʻi] o le Atua,” o lona uiga o lona agaga paia po o lona mana galue, lea ua mafai ai e Iesu ona tuliesea temoni ma faamālōlō tagata mamaʻi. O lea, ua oo mai le Malo o le Atua i nei tagata tetee, talu ai o loo latou iai faatasi i le taimi lea ma Iesu le Tupu tofia o le Malo, ma o loo ia faia nei vavega.

O le mafai e Iesu ona tuliesea o temoni, o se faamaoniga lea o le malosi atu o lona mana i lo o le mana o Satani. E pei lava ona alu atu o se tagata matuā malosi, ma faatoʻilalo se tagata ua faaauupegaina lelei e leoleo le maota o se tupu. Ua toe faamatala atu foʻi e Iesu le tala e faatatau i le agaga leaga lea na alu ese mai i se tamāloa. Pe afai e lē faatumuina e lenā tagata le avanoa i ni mea lelei, o le a toe foʻi ane le agaga leaga lea faatasi ai ma isi agaga leaga e toʻafitu, ma ua sili atu ai ona leaga le tulaga o lenei tamāloa nai lo o le mea sa iai i le taimi muamua. (Mataio 12:22, 25-29, 43-45) O le tulaga foʻi lenā ua oo iai le nuu o Isaraelu.

A o faalogologo atu se tasi o fafine i nei mea, ua uunaʻia ai o ia e valaau atu: “Amuia le manava na e fanau mai ai ma susu na e susu ai!” E faanaunau fafine Iutaia e avea i latou ma tinā o se perofeta, aemaise lava le Mesia. Atonu la ua manatu lenei fafine, ua matuā fiafia lava Maria i le avea ai ma tinā o lenei faiaʻoga. Peitaʻi ua faasaʻo e Iesu le manatu o lenei fafine, ma fetalai atu e faatatau i le puna o le fiafia moni: “E leai, Amuia i latou e faalogo i le afioga a le Atua ma tausi i ai!” (Luka 11:27, 28) E leʻi iai lava se taimi na fetalai atu ai Iesu e tatau ona avatu iā Maria se faaaloaloga faapitoa. O le mea moni, e faalagolago le mauaina o le fiafia moni i le avea ai ma se auauna faamaoni a le Atua, nai lo o ni sootaga faaleaiga po o ni mea ua ausia e se tasi.

E pei ona sa faia e Iesu i Kalilaia, ua ia toe aʻoaʻia foʻi tagata ona o le mananaʻo i se faailoga mai i le lagi. Ua ia fetalai atu e leai se faailoga e avatua iā i latou, ae na o “le faailoga o Iona.” Na avea Iona o se faailoga e ala i lona iai i totonu o le manava o le iʻa mo aso e tolu, faapea lana talaʻiga ma le lototele lea sa uunaʻia ai tagata Nineva e salamō. Ua fetalai atu Iesu: “Ae faauta! o loo i inei se tasi e sili atu iā Iona.” (Luka 11:29-32) E sili atu foʻi Iesu i lo o Solomona, lea na malaga mai le tupu tamaʻitaʻi o Seepa e faalogo i lona atamai.

Ua faaauau le fetalaiga a Iesu: “E leai se tasi e uma ona tutu le molī, ona tuu lea i se mea lilo po o lalo o se ato e fua ai mea, ae na te tuuina i luga o le tuugāmolī.” (Luka 11:33) Atonu o lea e uiga atu lana fetalaiga e faapea, o le aʻoaʻo atu ma le faia o vavega i luma o nei tagata, ua tutusa lea ma le punitia o le malamalama o se molī. Talu ai e lē lelei la latou vaai, ua latou misia ai le fuafuaga o ana galuega.

O lea faatoʻā māeʻa ona tuliesea e Iesu se temoni, lea na māfua ai ona gūgū se tamāloa. O lenā mea e tatau ona uunaʻia ai tagata e viia le Atua, ma taʻu atu i isi mea ua faataunuuina e Ieova. O lea, ua lapataʻia ai e Iesu ē faitio e faatatau iā te ia e faapea: “O lea la, ia e mataala. Atonu e pogisa le malamalama o loo i totonu iā te oe. O le mea lea, afai e malamalama lou tino atoa e leai se mea o pogisa ai, e malamalama ai lou tino e pei ona faasusulu atu e se molī le malamalama iā te oe.”—Luka 11:35, 36.

Faitau Atili

Maria—“Faauta! O A‘u o le Teine Pologa a Ieova!”

E faapefea i le tali a Maria i le agelu o Kaperielu ona faaalia ai lona faatuatua? O ā isi uiga tāua sa faaalia e Maria?