Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

Iesu—Le Ala, le Upu Moni ma le Ola

 MATAUPU 137

Ua Vāai le Faitau Selau iā Iesu a o Leʻi Oo i le Penetekoso

Ua Vāai le Faitau Selau iā Iesu a o Leʻi Oo i le Penetekoso

MATAIO 28:16-20 LUKA 24:50-52 GALUEGA 1:1-12; 2:1-4

  • UA FAAALI ATU IESU I LE TOʻATELE O TAGATA

  • UA AFIO AʻE O IA I LE LAGI

  • UA LILIGI IFO E IESU LE AGAGA PAIA I SOO E TUSA MA LE TOʻA 120

Ina ua mavae le toetū o Iesu, ona ia faatulaga lea o se feiloaʻiga ma ona aposetolo e toʻa 11 i se mauga i Kalilaia. O loo iai foʻi i inā isi soo e pe ā ma le toʻa 500, lea e aofia ai ma nisi o loo masalosalo pea. (Mataio 28:17; 1 Korinito 15:6) Peitaʻi, ua fesoasoani le fetalaiga lenei a Iesu e faatalitonu ai i latou, o ia moni lea ua toe soifua mai.

Ua faamatala atu e Iesu, ua tuuina mai e le Atua iā te ia le pule uma i le lagi ma le lalolagi. O lea, ua ia augani atu ai: “O le mea lea, ia outou ō atu e fai tagata o nuu uma lava ma soo, ma papatiso atu iā i latou i le suafa o le Tamā, ma le Atalii, ma le agaga paia, ia aʻoaʻoina i latou ia tausi i mea uma ua ou poloaʻi atu ai iā te outou.” (Mataio 28:18-20) E lē gata o loo soifua Iesu, ae o loo naunau o ia e faamautinoa e talaʻia pea le tala lelei.

O lenei tofiga o le faia o isi ma soo, ua tuuina atu i soo uma o Iesu, lea e aofia ai tane, fafine ma tamaiti. Atonu e taumafai tagata tetee e taofia la latou talaʻiga ma le aʻoaʻo atu, ae ua faamautinoa atu e Iesu: “Ua tuuina mai iā te aʻu le pule uma i le lagi ma le lalolagi.” O le ā le uiga o lenā faamatalaga mo ona soo? Ua fetalai atu Iesu iā i latou: “Faauta! ou te faatasi ma outou i aso uma lava seʻia oo i le taufaaiʻuiʻuga o le faiga o mea a le lalolagi.” E lē o faapea mai Iesu o i latou uma e faia se sao i le galuega talaʻi, o le a mafai ona faia galuega mamana. Peitaʻi, o le a latou mauaina le fesoasoani a le agaga paia.

Ua faaali atu Iesu i ona soo a o ʻfaagasolo aso e fā sefulu,’ talu ona mavae lona toetū. E liutino o ia i tino eseese ma ʻfaailoa atu iā i latou nei o ia lea ua toe soifua mai, e ala i le tele o faamaoniga maumaututū.’ Ua ia faamatala atu foʻi “mea e uiga i le malo o le Atua.”—Galuega 1:3; 1 Korinito 15:7.

E foliga mai o loo iai pea le ʻauaposetolo i Kalilaia, ma ua faatonuina i latou e Iesu e toe foʻi i Ierusalema. Ina ua latou feiloaʻi i inā, ona fetalai atu lea o Iesu: “Ia aua neʻi outou ō ese mai i Ierusalema, a ia faatalitali ai pea i le mea na folafolaina mai e le Tamā, lea foʻi na outou faalogo i ai mai iā te aʻu. Auā o le mea moni, na papatiso Ioane i le vai, ae i ni nai aso, ona papatisoina lea o outou i le agaga paia.”—Galuega 1:4, 5.

Mulimuli ane, ua toe feiloaʻi foʻi Iesu ma ona aposetolo. Ua ia taʻitaʻiina atu “i latou i Petania,” lea o loo i le itu i sasaʻe o le mauga o Olive. (Luka 24:50) E ui i mea uma na fetalai atu ai Iesu e faatatau i lona tuua o i latou, ae o loo latou talitonu pea o le a faavae lona Malo i le lalolagi.—Luka 22:16, 18, 30; Ioane 14:2, 3.

Ua fesili atu le ʻauaposetolo iā Iesu: “Le Alii e, pe e te toe faavaeina le malo iā Isaraelu i le taimi nei?” Ua tali mai o ia: “E lē tatau ona outou iloa taimi po o taimi atofaina ua tuu e le Tamā i lana lava pule.” Ona ia toe faamamafa atu lea o le galuega e tatau ona latou faia: “E maua e outou le mana, pe a oo ifo iā te outou le agaga paia, ona fai lea o outou ma molimau iā te aʻu i Ierusalema, i Iutaia uma ma Samaria, ma tuluʻiga uma o le lalolagi.”—Galuega 1:6-8.

A o iai Iesu o lē ua toe faatūina mai ma ona aposetolo i le mauga o Olive, ua amata ona aveina aʻe o ia i le lagi. E leʻi umi ae lē iloa atu o ia ona ua punitia i ao. Na liutino Iesu i tino eseese faaletino, ina ua toe faatūina mai o ia. Ae o le taimi la lenei, ua ia faamataa lona tino faaletino ma afio aʻe i le lagi o se foafoaga agaga. (1 Korinito 15:44, 50; 1 Peteru 3:18) A o vaavaai atu pea ona aposetolo faamaoni i lona afio aʻe i le lagi, ua tutū faatasi ma i latou “ni tamāloloa se toʻalua o loo oofu i ofu papaʻe.” O nei tamāloloa o ni agelu ua liutino i tagata. Ua la fesili atu iā i latou: “Tagata o Kalilaia e, aiseā ua outou tutū ai ma vaavaai aʻe i le lagi? O Iesu lenā ua aveina aʻe i le lagi mai iā te outou. O le a toe maliu mai o ia, i le auala lava lea e pei ona outou vaavaai atu i ai i lona afio aʻe i le lagi.”—Galuega 1:10, 11.

Na tuua e Iesu le lalolagi e aunoa ma se faalauiloaga faalauaʻitele, auā e na o ona soo faamaoni na vāai iā te ia a o afio aʻe i le lagi. O le “auala lava lea” o le a toe maliu mai ai o ia, ma e na o ona soo faamaoni foʻi e iloa lona faatasi mai i le mana o le Malo.

Ua toe foʻi nei le ʻauaposetolo i Ierusalema. I ni aso mulimuli ane, ua latou faapotopoto faatasi ma isi soo e aofia ai “Maria le tinā o Iesu ma ona uso.” (Galuega 1:14) Ua latou finafinau i le tatalo. O se tasi o mataupu ua taʻua i a latou tatalo, o le filifilia lea o se soo e suia Iuta le Sekara, e faaatoa ai le fuainumera o aposetolo i le toʻa 12. (Mataio 19:28) E latou te mananaʻo i se soo na molimauina galuega a Iesu ma vaai iā te ia ina ua mavae lona toetū. O le taimi mulimuli foʻi lea ua taʻua ai i le Tusi Paia, le faia o se vili ina ia iloa ai po o le ā le finagalo o le Atua. (Salamo 109:8; Faataoto 16:33) Ua filifilia Matatia, ma ua ʻtaʻua o ia o se aposetolo faatasi ma le toʻasefulu tasi.’ (Galuega 1:26) Atonu sa aofia o ia i le toʻa 70 lea na aauina atu e Iesu e talaʻi.

Ina ua mavae aso e sefulu talu ona afio aʻe Iesu i le lagi, ona amata loa lea o le Tausamiga Faa-Iutaia o le Penetekoso i le 33 T.A. Pe tusa ma le toʻa 120 soo ua faapotopoto i se potu i luga i Ierusalema. Ona faafuaseʻi mai lea o se taalili mai i le lagi e pei o le agi o se matagi malosi, ma ua tumu ai le fale atoa. Ua iloa atu ni laulaufaiva e pei o le afi, ua salalau atu ma nofo i luga o i latou taʻitoʻatasi. Ua amata ona tautatala nei soo i gagana eseese. Ioe, o lea ua liligiina ifo le agaga paia e pei lava ona folafola e Iesu.—Ioane 14:26.