Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

Iesu—Le Ala, le Upu Moni ma le Ola

 MATAUPU 108

Ua Faalēaogāina e Iesu Taumafaiga Ina ia Maileia o Ia i Ana Upu

Ua Faalēaogāina e Iesu Taumafaiga Ina ia Maileia o Ia i Ana Upu

MATAIO 22:15-40 MAREKO 12:13-34 LUKA 20:20-40

  • IA AVATU MEA A KAISARA IĀ KAISARA

  • PE E TOE FAAIPOIPO I LATOU O LE A TOETUTŪ MAI?

  • O POLOAʻIGA SILISILI

Ua matuā feita fili o Iesu. Ua faatoʻā māeʻa ona ia faamatalaina talafaatusa e faaalialia ai lo latou amioleaga. Ua taupulepule nei le ʻau Faresaio e saʻili se mea e maileia ai Iesu i ana upu, ina ia mafai ai ona latou molia o ia ma avatu i le kovana o Roma. Ua latou totogia foʻi nisi o o latou soo ina ia maileia Iesu.—Luka 6:7.

Ua ō atu nei soo ma faapea atu iā Iesu: “Le Aʻoaʻo e, matou te iloa e moni au upu ma au aʻoaʻoga, ma e te lē faailoga tagata foʻi, a ua e aʻoaʻo atu le ala o le Atua e tusa ma le upu moni: Pe e taga i le tulafono ona matou totogi atu lafoga iā Kaisara pe e leai?” (Luka 20:21, 22) E lē o faasesēina Iesu i a latou upu faaviivii pepelo, ona ua ia silafia o loo latou taumafai e maileia o ia. Pe afai e tali atu Iesu ʻE leai e lē tatau ona totogiina lenā lafoga,’ e mafai ona molia o ia i le fouvale i le malo o Roma. Ae a tali atu foʻi ʻIoe e tatau ona totogi,’ o le a faauigasesē e tagata o ē e lē o mananaʻo e gauaʻi atu i le pulega a Roma, ma latou feita ai iā te ia. O le ā la le auala o le a ia tali atu ai?

Ua tali atu Iesu: “O outou o tagata faafiaamiotonu, aiseā ua outou tofotofo mai ai iā te aʻu? Ia faaali mai iā te aʻu se tupe o le lafoga.” Ua latou aumai iā te ia se tenari. Ona fesili atu lea o Iesu: “O ai e ona le ata ma le igoa lea?” Ua latou tali mai: “O Kaisara.” Ona fetalai atu lea o Iesu: “Ia totogi atu mea a Kaisara iā Kaisara, a o mea a le Atua ia avatu i le Atua.”—Mataio 22:18-21.

Ua taufaiofo tagata i fetalaiga nei a Iesu, ma ua matuā lē iloa e i latou po o le ā se tali e avatu iā te ia. O lea ua latou ō ese ai. Peitaʻi e leʻi uma le aso, ma e leʻi uma foʻi taumafaiga a tagata e maileia Iesu i ana upu. Ua lē taulau taumafaiga a le ʻau Faresaio, ma ua ō atu iā Iesu taʻitaʻi o le ʻau Satukaio.

E faapea mai le ʻau Satukaio e leai se toetū. Ua latou lāgā nei se fesili e faatatau i le toetū ma le faaipoipo atu o se tasi i le avā a lona uso ua oti. Ua latou fesili atu: “Le Aʻoaʻo e, ua faapea mai Mose, ʻAfai e oti se tane ae leai sana fanau, e ao ona faaipoipo atu lona uso i lana avā ina ia maua ai se fanau mo lona uso.’ O lenei, e toʻafitu le ʻauso sa iā i matou, ua faaipoipo lē e muamua ma ua oti, ae e leai sana fanau, ae tuua lana avā mo lona uso. O le mea lenā na tupu i le uso lona lua ma le lona tolu, seʻia oo lava i le uso lona fitu. Mulimuli ane ua oti foʻi le fafine. O lea la, i le toetū, o ai o le toʻafitu lea e fai ma ia le avā? Auā na latou faaipoipo uma iā te ia.”—Mataio 22:24-28.

Ua sii mai e Iesu faaupuga o loo i tusitusiga a Mose lea e talitonu i ai le ʻau Satukaio, ma ua tali atu o ia: “Pe e lē o le mea ea lenā ua outou sesē ai, auā ua outou lē iloa Tusitusiga Paia po o le mana o le Atua? Auā e lē faaipoipo tane ma fafine pe a toetutū mai, ae e pei i latou o agelu o loo i le lagi. Pe tou te leʻi faitau ea i le tusi a Mose, e faatatau i le toetutū mai o ē ua oti, i le tala e uiga i le laau tuitui, ma le fetalaiga a le Atua iā te ia e faapea, ʻO aʻu o le Atua o Aperaamo, o le Atua o Isaako, ma o le Atua foʻi o Iakopo’? O ia o le Atua o ē ola, ae lē o ē ua oti. Ua outou matuā sesē lava.” (Mareko 12:24-27; Esoto 3:1-6) Ua maofa le motu o tagata i le tali a Iesu.

Ua matuā lē iloa e le ʻau Faresaio ma le ʻau Satukaio se tali e avatu iā te ia. O lea, ua auaufaatasi ai nei taʻitaʻi lotu tetee ma toe tofotofo iā Iesu. Ua fesili atu se tasi o tusiupu: “Le Aʻoaʻo e, o le ā le poloaʻiga e sili i le Tulafono?”—Mataio 22:36.

Ua tali mai Iesu: “O le poloaʻiga sili lenei, ʻIa faalogo mai Isaraelu e, o Ieova lo tatou Atua, o Ieova e toʻatasi lava ia, ma ia e alofa atu iā Ieova lou Atua ma lou lotoatoa, ma lou ola atoa, ma lou mafaufau atoa, ma lou malosi atoa.’ O le lona lua lenei, ʻIa e alofa atu i lou tuaoi e pei o oe lava iā te oe.’ E leai lava se isi poloaʻiga e sili atu i lo o ia poloaʻiga.”—Mareko 12:29-31.

Ua faalogo le tusiupu i le tali a Iesu ma ua ia faapea atu: “Le Aʻoaʻo e, ua tutusa lelei au fetalaiga ma le upu moni, ʻE toʻatasi lava Ia, ma e leai lava se isi e na o Ia’; ma o lenei alofa o se tasi ma le lotoatoa, le mafaufau atoa, le malosi atoa, ma le alofa o se tasi i lona tuaoi e pei o ia lava, e sili mamao atu nai lo o taulaga mū uma atoa ma taulaga.” Ua silafia e Iesu ua tali mai ma le atamai le tusiupu, ona ia fetalai atu lea iā te ia: “E te lē o mamao mai i le malo o le Atua.”—Mareko 12:32-34.

Ua tolu nei aso (Nisani 9, 10, ma le 11) o aʻoaʻo atu Iesu i totonu o le malumalu. Na iai tagata na fiafia i mea sa latou faalogologo i ai e pei o lenei tusiupu. Ae e leʻi faapena taʻitaʻi lotu. E leai se tasi o i latou ʻua lototele e toe fesili atu iā Iesu.’

Faitau Atili

O le ā le Faamoemoe mo Ē ua Maliliu?

O le ā e tupu iā i tatou pe a tatou feoti? Pe e tatou te toe feiloaʻi ma ē pele iā i tatou ua maliliu?