Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

Iesu—Le Ala, le Upu Moni ma le Ola

 MATAUPU 122

Le Tatalo Faaiʻu a Iesu i le Potu i Luga

Le Tatalo Faaiʻu a Iesu i le Potu i Luga

IOANE 17:1-26

  • LE IʻUGA O LE ILOAINA O LE ATUA MA LONA ALO

  • LE AUTASI O IEOVA, IESU, MA LE ʻAUSOO

O le alofa o Iesu i ona aposetolo, ua ia sauniunia ai i latou mo le taimi o le a ia tuua ai i latou ma afio aʻe i le lagi. Ua tepa aʻe ona fofoga i le lagi ma tatalo atu i lona Tamā: “Ia e faamamaluina lou atalii, ina ia faamamaluina oe e lou atalii. Talu ai ua e tuuina mai iā te ia le pule i tagata uma, ina ia avatu e ia le ola e faavavau iā i latou uma ua e tuuina mai iā te ia.”—Ioane 17:1, 2.

Ua silafia e Iesu, o le faamamaluina o le Atua o le mea lea e sili ona tāua. Ae maʻeu le faamāfanafanaloto o le faamoemoe o le ola e faavavau lea ua ia taʻua. Talu ai ua ia maua “le pule i tagata uma,” ua mafai la ona ia ofoina atu aogā o lana taulaga togiola i tagata uma. Peitaʻi, e lē o tagata uma e mauaina lenā faamanuiaga. Aiseā? Talu ai o le a faaaogā e Iesu aogā o lana taulaga togiola, mo na o ē e gaoioi e ōgatusa ma lana fetalaiga lenei: “O le ola e faavavau foʻi lenei, ia latou iloa oe, le Atua moni e toʻatasi, atoa ma lē na e auina mai, o Iesu Keriso.”—Ioane 17:3.

E tatau i se tasi ona iloa lelei le Tamā ma le Atalii, ma iai se faiā māfana ma i laʻua. E tatau ona ia vaai i le tulaga o mea e pei o le auala e silasila ai le Tamā ma le Atalii. E tatau foʻi ona ia taumafai malosi e faaaʻoaʻo i o la uiga e lē mafaatusalia, i le auala e feutagaʻi ai ma isi. E lē gata i lea, e tatau foʻi ona ia malamalama e sili atu ona tāua le faamamaluina o le Atua nai lo o le mauaina o le ola e faavavau. Ua toe faaauau le faamatalaga a Iesu e faatatau i le faamamaluina o le Atua e faapea:

“Ua ou faamamaluina oe i le lalolagi, ma ua ou faamāeʻaina le galuega na e tuuina mai iā te aʻu e fai. O lenei, loʻu Tamā e, ia e faamamaluina aʻu pe a ou faatasi ma oe, i le mamalu na ou maua ina o ta faatasi, a o leʻi faia tagata i le lalolagi.” (Ioane 17:4, 5) O lea, o loo talosaga atu Iesu ina ia toe faafoʻisia lona tulaga mamalu i le lagi e ala i le toetū.

Ua taʻua foʻi e Iesu mea ua ia faataunuuina i lana faiva. Ua tatalo o ia: “Ua ou faailoa atu lou suafa i tagata ua e foaʻi mai iā te aʻu i le lalolagi. O ou tagata i latou, ma ua e foaʻi mai iā te aʻu ma ua latou usiusitaʻi i lau afioga.” (Ioane 17:6) E lē na o le faailoa atu o le suafa o le Atua o Ieova, na faia e Iesu i lana faiva. Sa ia fesoasoani foʻi i ona aposetolo ina ia iloa vala e aofia ai i le suafa o le Atua: o uiga o le Atua ma le auala o loo ia feutagaʻi ai ma tagata.

Ua oo ina iloa e le ʻauaposetolo Ieova, faapea foʻi le matafaioi a lona Alo ma mea sa ia aʻoaʻoina. Ua faapea atu ma le lotomaulalo Iesu: “O au fetalaiga na e tuuina mai iā te aʻu, ua ou tuuina atu iā i latou, ua latou talia ma iloa ai, ua ou sau e fai ma ou sui, ma ua latou talitonu ua e auina mai aʻu.”—Ioane 17:8.

Ua faailoa atu nei e Iesu le eseesega o ona soo ma tagata o le lalolagi: ʻOu te lē talosaga atu mo le lalolagi, ae mo i latou na e foaʻi mai iā te aʻu, auā o ou tagata i latou. Le Tamā paia e, ia e leoleo iā i latou ona o lou suafa lea na e tuuina mai iā te aʻu, ina ia tasi i latou e pei o i taʻua. Ua ou leoleo iā i latou ma e leai se tasi o i latou ua faaumatia, seʻi vaganā le atalii o le faaumatiaga.’ (Ioane 17:9-12) E faasino le faaupuga “le atalii o le faaumatiaga,” iā Iuta le Sekara lea ua agaʻi atu e faalata Iesu.

Ua faaauau le tatalo a Iesu: ʻUa ʻinoʻino le lalolagi iā i latou. Ou te talosaga atu iā te oe, e aua neʻi aveesea i latou mai le lalolagi, a ia leoleo iā i latou ona o lē ua leaga. E lē o ni tagata o le lalolagi i latou, e pei foʻi o aʻu, e lē o aʻu o se tagata o le lalolagi.’ (Ioane 17:14-16) E ui lava o le ʻauaposetolo ma isi soo o loo i le lalolagi o loo pulea e Satani, ae e tatau ona latou vavaeese mai i le lalolagi, faapea mea leaga uma o loo iai. E faapefea?

E tatau ona tausia lo latou tulaga paia, ma vavaeese mai i le lalolagi ina ia auauna atu i le Atua. E latou te faia faapea, e ala i le ola e tusa ai ma upu moni o loo i Tusitusiga Eperu, faapea upu moni sa aʻoaʻo atu e Iesu. Ua faaauau pea le tatalo a Iesu: “Ia faapaiaina i latou i le upu moni, o lau afioga o le upu moni lea.” (Ioane 17:17) I se taimi mulimuli ane, o le a tusia e nisi o le ʻauaposetolo ni tusi faagaeeina ia o le a avea foʻi ma vaega “o le upu moni,” e fesoasoani ai i le faapaiaina o se tasi.

E iai nisi o le a taliaina “le upu moni” a o faagasolo taimi. O lea ua tatalo ai Iesu “e lē mo na o i latou ia [o loo iai i inā], ae o i latou foʻi ua faatuatua iā te [ia] e ala i a latou upu.” O le ā le talosaga a Iesu mo i latou uma nei? “Ia tasi i latou uma e pei o oe le Tamā e autasi ma aʻu, o aʻu foʻi e autasi ma oe, ina ia autasi foʻi i latou ma i taʻua.” (Ioane 17:20, 21) E lē faapea o Iesu ma lona Tamā e tino e tasi i laʻua, ae o loo faasino atu i le autasi o o la manatu i mea uma. Ua tatalo Iesu ina ia maua foʻi e ona soo lenei lava autasi.

E leʻi leva atu, na fetalai ai Iesu iā Peteru ma isi, o le a ia alu e sauni se nofoaga mo i latou i le lagi. (Ioane 14:2, 3) Ua toe taʻua e Iesu lenā manatu i lana tatalo e faapea: “Loʻu Tamā e, e tusa ma mea ua e tuuina mai iā te aʻu, o loʻu manaʻo, o le mea ou te iai, ia iai foʻi ma i latou e faatasi ma aʻu, ina ia latou iloa loʻu mamalu ua e tuuina mai iā te aʻu, auā ua e alofa mai iā te aʻu a o leʻi faavaeina le lalolagi.” (Ioane 17:24) Ua faamautinoa mai i inei e Iesu, a o leʻi maua ni fanau a Atamu ma Eva, ua leva ona alofa mai le Atua iā te ia, o lona Atalii e toʻatasi o lē ua avea ma Iesu Keriso.

Ina ua faaiʻu le tatalo a Iesu, ua ia toe faamatilatila le suafa o lona Tamā ma le alofa o le Atua mo le ʻauaposetolo ma isi, o le a taliaina “le upu moni” e ala i le faapea atu: “Ua ou faailoa atu lou suafa iā i latou, ma saga faailoa atu, ina ia iā i latou le alofa lea na e alofa mai ai iā te aʻu, ma ou autasi ai ma i latou.”—Ioane 17:26.