Skip to content

Skip to secondary menu

Skip to table of contents

Molimau a Ieova

Faa-Samoa

Iesu—Le Ala, le Upu Moni ma le Ola

 MATAUPU 112

Se Lesona e Faatatau i le Mataala Mai i le Talafaatusa i Taupou

Se Lesona e Faatatau i le Mataala Mai i le Talafaatusa i Taupou

MATAIO 25:1-13

  • UA FAAMATALA E IESU LE TALAFAATUSA E UIGA I TAUPOU E TOʻASEFULU

Ua faatoʻā māeʻa ona taliina e Iesu le fesili a ona aposetolo e toʻafā, e faatatau i le faailoga o lona faatasi mai ma le taufaaiʻuiʻuga o lenei faiga o mea. O lea la ua ia avatu nei se apoapoaʻiga atamai e ala i se isi talafaatusa. O le a vaaia e i latou o le a ola i le taimi o lona faatasi mai, le faataunuuga o lenei talafaatusa.

Ua ia faatomua atu le talafaatusa e faapea: “E avea le malo o le lagi e pei o taupou e toʻasefulu, na ave a latou molī ma ō atu e faafeiloaʻi le alii faaipoipo. E vālea le toʻalima, ae e faautauta le isi toʻalima.”—Mataio 25:1, 2.

E lē o uiga atu Iesu o le a vaeluaina ona soo o ē e fai mo latou tofi le Malo o le lagi i ni vaega se lua. O le isi vaega e vālea, ae o le isi vaega e faautauta. Nai lo o lea, o loo ia faasino atu i le iai i ona soo taʻitoʻatasi o le avanoa e filifili ai pe e latou te mataala pea, pe tosina ese o latou mafaufau i isi mea. E ui i lea, ua silafia e Iesu e mafai e ana auauna ona tumau ma le faamaoni ma maua faamanuiaga mai i lona Tamā.

I le talafaatusa, o loo faamatalaina ai taupou e toʻasefulu ua ō atu e faafeiloaʻi le alii faaipoipo ma auai ai i le solo o le faaipoipoga. Pe a taunuu le alii faaipoipo, o le a faamalamalama e taupou i a latou molī le ala ma faamamaluina ai le alii faaipoipo, a o ia aumaia le tamaʻitaʻi faaipoipo i le fale ua ia saunia mo ia. O ā isi mea o le a tutupu?

Ua faaauau le faamatalaga a Iesu: “Na ave e ē vālea a latou molī ae e leʻi aveina ni a latou suāuu, a o ē e faautauta na ave a latou fagu suāuu faatasi ma a latou molī. Ina ua tuai mai le alii faaipoipo, ona tau tulemomoe ai lea o i latou uma ma ua momoe loa.” (Mataio 25:3-5) E leʻi taunuu le alii faaipoipo i le taimi na faatalitalia. E foliga mai ua tuai mai o ia, ma o lea ua momoe ai nei taupou e toʻasefulu. O lenei tala atonu ua toe manatua ai e aposetolo le faamatalaga a Iesu e faatatau i se alii mamalu o lē na alu malaga, ae ʻmulimuli ane toe foʻi mai o ia ina ua maua le tofi o le tupu.’—Luka 19:11-15.

Ua faamatala e Iesu le mea ua tupu ina ua taunuu le alii faaipoipo: “Ina ua oo i le vaeluapō, ona sau ai lea o le alaga, ʻUa sau le alii faaipoipo! Ia outou ō atu e faafeiloaʻi iā te ia.’” (Mataio 25:6) Po o nofosauni ma mataala nei taupou?

Ua faaauau le faamatalaga a Iesu: “Ona tulaʻi ai lea o na taupou uma ma sauniuni a latou molī. Na fai atu o ē e vālea i ē e faautauta, ʻIa aumai sina suāuu ma i matou, auā o le a pepē a matou molī.’ Na tali mai o ē e faautauta, ʻNeʻi lē lava mo i matou ma outou. O lea, ia outou ō atu i ē e faatau ma faatau mai ai ni a outou suāuu.’”—Mataio 25:7-9.

Ioe, e lē o mataala taupou vālea e toʻalima, ma e latou te lē o nofosauni foʻi mo le taunuu mai o le alii faaipoipo. E lē o lava suāuu mo a latou molī, ma ua latou taumafai e suʻe ni suāuu. Ua faamatala e Iesu: “A o latou ō atu e faatau, ae taunuu mai loa le alii faaipoipo, ona ō atu ai lea o taupou ua uma ona sauni, faatasi ma ia i le ʻaiga o le faaipoipoga; ona tapuni ai lea o le faitotoʻa. Mulimuli ane, ona ō mai ai lea o isi taupou ma faapea mai, ʻLau susuga e, lau susuga e, seʻi tatala mai le faitotoʻa iā i matou!’ A ua tali atu o ia, ʻOu te taʻu atu iā te outou le mea moni, ou te lē iloa outou.’” (Mataio 25:10-12) Pagā le leaga o le iʻuga e oo iai ona o le lē faaauau ona nofosauni ma mataala!

Ua mafai nei ona iloa e aposetolo, o le alii faaipoipo o loo taʻua e Iesu e faasino atu iā te ia. E leʻi leva atu, sa ia faatusaina ai o ia i se alii faaipoipo. (Luka 5:34, 35) Ae faapefea taupou popoto? Ina ua taʻua e Iesu le “lafu mamoe itiiti” o ē o le a tuuina atu i ai le Malo, sa ia faaaogā faaupuga nei: “Ia fusia o outou sulugātiti, ma ia mumū pea a outou molī.” (Luka 12:32, 35) O lea, e faigofie ona malamalama aposetolo, o loo faasino atu lenei talafaatusa i soo faamaoni e pei o i latou. O le ā la le feʻau o loo faailoa atu e Iesu e ala i lenei talafaatusa?

E manino lelei le feʻau o loo avatu e Iesu. Ua ia faaiʻu le talafaatusa i lona faapea atu: “O le mea lea, ia faaauau ai ona outou mataala, auā tou te lē iloa le aso po o le itula.”—Mataio 25:13.

Ioe, o loo apoapoaʻi atu Iesu i ona soo faamaoni e faatatau i lona faatasi mai lea e manaʻomia ai ona ʻfaaauau ona latou mataala.’ O le a sau o ia, ma e manaʻomia ona latou nofosauni ma ia mataala pea, e pei o taupou faautauta e toʻalima. O le faia faapea, o le a latou taulaʻi atu ai pea i lo latou faamoemoe tautele, ma maua ai lo latou taui.

Faitau Atili

O Ā AʻOAʻOGA MONI A LE TUSI PAIA

Po ua Tatou Ola i “Aso e Gata Ai”?

Seʻi iloilo pe faapefea i amioga ma uiga o tagata, ona faamaonia ai o loo tatou ola i “aso e gata ai,” e pei ona valoia mai i le Tusi Paia.

LE OLOMATAMATA (LOMIGA MO SU‘ESU‘EGA)

Po o le a ‘Faaauau Ona Outou Mataala’?

Ia faitau i le fetuuna‘iga o le malamalamaga i le talafaatusa a Iesu i taupou e to‘asefulu, lea e ua‘i atu i se fe‘au faigofie ma faanatinati.