Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

Iesu—Le Ala, le Upu Moni ma le Ola

 MATAUPU 136

I le Matafaga o le Sami o Kalilaia

I le Matafaga o le Sami o Kalilaia

IOANE 21:1-25

  • UA FAAALI ATU IESU I LE SAMI O KALILAIA

  • E TATAU IĀ PETERU MA ISI O LOO TAʻIMUA ONA FAFAGA MAMOE

I le pō mulimuli o Iesu ma ona aposetolo, na ia fetalai atu ai iā i latou: “Pe a mavae loʻu toetū, ona ou muamua atu lea iā te outou i Kalilaia.” (Mataio 26:32; 28:7, 10) Ua malaga atu nei le toʻatele o soo o Iesu i Kalilaia. Ae o le ā e tatau ona latou faia i inā?

I se tasi taimi, ua fai atu ai Peteru i isi aposetolo e toʻaono: “Ou te alu ou te fagota.” Ua latou tali mai: “Matou te ō foʻi ma oe.” (Ioane 21:3) Ua alu le pō atoa e lē maua ni iʻa. Ina ua amata ona malamalama, ua faaali atu Iesu iā i latou i le matafaga, ae e latou te lē o iloa po o ai o ia. Ua valaau atu Iesu iā i latou: “Si aʻu fanau e, po o iai ni a outou meaʻai?” Ua latou tali mai: “E leai!” Ua fetalai atu Iesu: “Ia lafo le upega i le itu taumatau o le vaa, ona outou maua ai lea o iʻa.” (Ioane 21:5, 6) O le tele o iʻa ua latou maua ua lē mafai ai ona toso mai i luga la latou upega.

Ua fai atu Ioane iā Peteru: “O le Alii!” (Ioane 21:7) Ua faavave ona ofu e Peteru o lona ofu tele, lea e leʻi faia i le taimi a o fagota. Ua oso o ia i le sami ma aau atu pe tusa ma le selau iata (90 m) le mamao agaʻi i le matafaga. Ae ua mulimuli atu iā te ia isi soo i le vaa, ma toso atu le upega o loo tumu i iʻa.

Ua latou taunuu atu i le matafaga, ma ua vaaia ai “se afi ua mālala, ma iʻa o loo taatitia ai i luga, ma falaoa.” Ua fetalai atu Iesu: “Ia aumai ni iʻa na outou maua.” Ua toso mai i uta e Peteru le upega, lea ua tumu i iʻa e 153. Ua faapea atu Iesu: “Ō mai loa e aai.” E leai se isi o i latou e lototele e fesili atu, “O ai oe?” auā o lea ua latou iloa o Iesu. (Ioane 21:9-12) O le taimi lona tolu lea ua ia faaali atu ai i ona soo o se vaega.

Ua avatu e Iesu iā i latou falaoa ma iʻa e aai ai, ona silasila atu lea o ia i iʻa ua maua mai ma ua fesili atu: “Simona e, le atalii o Ioane, pe e sili ea lou alofa iā te aʻu nai lo o lou naunau i nei mea?” Faamata e sili atu le naunau o Peteru i lana pisinisi faifaiva, nai lo o le galuega o loo finagalo Iesu e na te faia? Ua tali mai Peteru: “Ioe le Alii e, ua e silafia ou te alofa faapelepele iā te oe.” O lea ua augani atu ai Iesu iā te ia: “Ia e fafaga i aʻu tamaʻi mamoe.”—Ioane 21:15.

Ua toe fesili atu Iesu: “Simona e, le atalii o Ioane, pe e te alofa iā te aʻu?” Atonu o le lē mautonu o Peteru, ua ia tali mai ai ma le maumauaʻi: “Ioe le Alii e, ua e silafia ou te alofa faapelepele iā te oe.” Ua toe fetalai atu foʻi Iesu: “Ia e leoleo i aʻu tamaʻi mamoe.”—Ioane 21:16.

Ua toe fesili faatolu atu Iesu: “Simona e, le atalii o Ioane, pe e te alofa faapelepele iā te aʻu?” Atonu ua amata nei ona taumānatu Peteru pe faamata o loo fesiligia e Iesu lona faamaoni. Ua tali mai ma le mautinoa o ia: “Le Alii e, ua e silafia mea uma; ua e silafia foʻi ou te alofa faapelepele iā te oe.” Ua toe faamamafa atu foʻi e Iesu iā Peteru le mea e tatau ona ia faia: “Ia fafaga i aʻu tamaʻi mamoe.” (Ioane 21:17) Ioe, e tatau iā i latou o loo taʻimua, ona auauna atu i ē ua tosina mai i le lotoā mamoe a le Atua.

Na saisaia ma faasalaina i le oti Iesu, talu ai sa ia faia le galuega na tofia o ia e le Atua e fai. O lea la ua ia faailoa atu nei, e talitutusa lenā tulaga ma le mea o le a oo iā Peteru: “A o e tauleʻaleʻa e masani ona e faia ou lava ofu, ma e alu i le mea e te loto i ai. A ua oo ina e toeaina, ua faaloaloa atu ou lima, ma e faaofu oe e se isi tagata, ma ave oe i le mea e te lē o loto i ai.” E ui i lea, ua augani atu pea Iesu iā Peteru: “Ia e mulimuli mai pea iā te aʻu.”—Ioane 21:18, 19.

Ua iloa atu e Peteru le aposetolo o Ioane ma ua fesili atu iā Iesu: “Le Alii e, o le ā le mea e fai e lenei tagata?” O le ā le mea o le a oo i lenei aposetolo o lē ua alofagia e Iesu? Ua tali mai Iesu: “Afai ou te loto ina ia tumau o ia seʻia ou sau, o le ā le mea e te popole ai fua?” (Ioane 21:21-23) E tatau iā Peteru ona mulimuli iā Iesu e aunoa ma le popole fua i mea e fai e isi. E ui i lea, ua faailoa atu e Iesu o le a sili atu ona umi le taimi o le a ola ai Ioane nai lo o isi aposetolo, ma o le a ia maua foʻi se faaaliga o le afio mai o Iesu i le mana o le Malo.

O le mea moni, e tele isi mea na faia e Iesu, ma e lē mafai ona ofi i tusi tāʻai uma i le lalolagi.