Skip to content

Skip to secondary menu

Skip to table of contents

Molimau a Ieova

Faa-Samoa

Iesu—Le Ala, le Upu Moni ma le Ola

 MATAUPU 129

Ua Faapea Atu Pilato: “Faauta! O le Tagata!”

Ua Faapea Atu Pilato: “Faauta! O le Tagata!”

MATAIO 27:15-17, 20-30 MAREKO 15:6-19 LUKA 23:18-25 IOANE 18:39–19:5

  • UA TAUMAFAI PILATO E FAASAʻOLOTO IESU

  • UA MANANAʻO TAGATA IUTAIA E FAASAʻOLOTO PARAPA

  • UA TAUFAIFAI IĀ IESU MA FAILEAGAINA O IA

Ua faapea atu Pilato iā i latou o loo mananaʻo e fasioti Iesu: “E leai se mea ua ou maua i lenei tagata e tusa ai ma mea ua outou molia ai o ia. O le mea moni, e leʻi iloa foʻi e Herota.” (Luka 23:14, 15) Ua toe taumafai nei Pilato e faasaʻoloto Iesu, e ala i le faapea atu i tagata: “O loo iai la outou tū e faasaʻoloto ai se tagata iā te outou i le aso o le paseka. Pe tou te mananaʻo la ou te faasaʻolotoina le tupu o tagata Iutaia?”—Ioane 18:39.

E iloa e Pilato e iai se pagota e igoa iā Parapa, o lē ua lauiloa i le gaoi, fouvale faasaga iā Roma, ma le fasioti tagata. O lea ua ia fesili atu ai i tagata Iutaia: “O ai tou te mananaʻo ou te faasaʻolotoina, o Parapa po o Iesu o lē ua taʻua o le Keriso?” Ua uunaʻia e le ʻaufaitaulaga sili tagata ina ia talosaga atu e faasaʻoloto Parapa ae lē o Iesu. Ua toe fesili atu Pilato: “O ai o i laʻua tou te mananaʻo ou te faasaʻolotoina?” Ua valaau ane tagata: “O Parapa.”—Mataio 27:17, 21.

O le lē fiafia o Pilato ua ia fesili atu ai: “O le ā la se mea ou te faia iā Iesu, o lē ua taʻua o le Keriso?” Ua alalaga leotetele mai tagata: “Ia tutuʻi o ia i luga o le laau!” (Mataio 27:22) Pagā le matagā o lenei mea, ona o loo latou mananaʻo e fasioti se tagata e lē sala. Ua ʻaiʻoi atu Pilato: “Aiseā, o le ā se mea leaga ua faia e lenei tagata? Ou te lē iloa se mea ua faia e ia ua tatau ai ona oti; o lea, ou te faasala o ia ma faasaʻoloto iā te ia.”—Luka 23:22.

E ui lava i taumafaiga maumauaʻi a Pilato, ae ua matuā feita le motu o tagata ma alalaga atu: “Ia tutuʻi o ia i luga o le laau!” (Mataio 27:23) O uunaʻiga a taʻitaʻi lotu ua atili ai ona matuā feita le motu o tagata, ma oo ai lava ina mananaʻo e faamasaa le toto o lenei tagata. Peitaʻi, e lē o le toto o se tagata solitulafono, ae o le toto o se tagata e lē sala o lē sa alu atu i Ierusalema o se Tupu i le lima aso ua mavae, ma sa talileleia e tagata. Pe afai o loo iai soo o Iesu i inā, e mautinoa e leai sa latou tala e fai atu, ma e latou te taumafai foʻi e ʻalofia le iloaina o i latou e isi.

Ua iloa e Pilato e lē o taulau ana taumafaiga malolosi, ma ua atili ai ona vāvāō tagata. O lea ua ia aumaia ai le vai ma fafano ai ona lima i luma o le motu o tagata, ma faapea atu: “E mamā aʻu mai le toto o lenei tagata. Faitalia outou.” Peitaʻi e lē suia ai manatu o tagata. Ua latou tali mai iā Pilato: “Ia i luga o i matou ma a matou fanau lona toto.”—Mataio 27:24, 25.

Ua sili atu i le kovana o Pilato le faamalie o le manaʻo o tagata, nai lo o le faia o le mea saʻo. O lea, ua ia faasaʻoloto ai Parapa, ma faatonuina le aveesea o ofu o Iesu ma sasa tigāina o ia.

Ua uma nei ona sasa faamoʻamoʻa Iesu, ona toe ave lea o ia e fitafita i totonu o le maota o le kovana. Ua faapotopoto fitafita uma ma faaauau ona taufaifai iā Iesu. Ua latou fili se pale tuitui ma oomi faamalosi i lona ao. Ua latou tuu atu foʻi le ū i lona aao taumatau, ma faaofu o ia i le ofu mūmū sesega, e pei ona ofuina e tagata o le aiga tupu. Ua latou taufaifai atu iā te ia: “Talofa le Tupu o tagata Iutaia!” (Mataio 27:28, 29) Ua latou tuufeanu atu foʻi iā te ia, ma faaauau ona tapō ona foliga. Ua latou fetagofi i le ū ma tā ai lona ao, ma ua atili ai ona goto ifo le “pale” tuitui i lona ao.

O le toʻa ma le malosi o Iesu a o faileagaina o ia, ua matuā ofo ai lava Pilato. Ua toe taumafai e Pilato se isi auala e ʻalofia ai le tuuaʻia o ia i le mea o le a tupu. Ua ia faapea atu: “Vaai! Ua ou aumaia o ia i fafo iā te outou ina ia outou iloa ai, ou te lē iloa se mea sesē ua ia faia.” Pe e manatu Pilato o le a suia manatu o tagata, pe afai e avatu Iesu i o latou luma ua faamanuʻalia ma ua tafetotoi mai lona tino? A o tū Iesu i luma o nei tagata lē alolofa, ua faapea atu Pilato iā i latou: “Faauta! O le tagata!”—Ioane 19:4, 5.

E ui lava ina tigāina ma faamanuʻalia Iesu, ae ua ia faaalia pea le toʻa. Ua amanaʻia e Pilato lenā tulaga, auā o ana faaupuga e ono faaalia mai ai lona tigā alofa ma lona faaaloalo.