Skip to content

Skip to secondary menu

Skip to table of contents

Molimau a Ieova

Faa-Samoa

Iesu—Le Ala, le Upu Moni ma le Ola

 MATAUPU 115

Ua Latalata i le Paseka Mulimuli a Iesu

Ua Latalata i le Paseka Mulimuli a Iesu

MATAIO 26:1-5, 14-19 MAREKO 14:1, 2, 10-16 LUKA 22:1-13

  • UA TOTOGI IUTA LE SEKARA E FAALATAINA IESU

  • UA FAIA E APOSETOLO E TOʻALUA SAUNIUNIGA MO LE PASEKA

Ua māeʻa nei ona aʻoaʻo atu Iesu i ona aposetolo e toʻafā i luga o le mauga o Olive, ma tali ai la latou fesili e faatatau i lona faatasi mai i le lumanaʻi ma le taufaaiʻuiʻuga o lenei faiga o mea.

O se aso e matuā pisi tele Nisani 11. Atonu a o latou agaʻi atu i Petania e mālōlō ai i le pō, ua fetalai atu Iesu i ona aposetolo: “Ua outou iloa ua toe lua aso ona oo lea i le paseka, ma e tuuina atu ai le Atalii o le tagata ina ia tutuʻi i luga o le laau.”—Mataio 26:2.

Ua oo nei i le Aso Lulu, Nisani 12, ma ua iai nei na o Iesu ma le ʻauaposetolo. E foliga mai o loo mālōlō na o i latou. I le Aso Lua, na taʻusalaina ai e Iesu taʻitaʻi lotu ma faaalialia i lumāmea o latou uiga leaga. Ua latou saʻili nei e fasioti iā te ia. O lea, ua ia lē faailoa atu ai o ia i luma o le lautele. O lenei gaoioiga ua ʻalofia ai se mea e ono tupu, lea e taofia ai o ia mai le faamanatuina o le Paseka ma ona aposetolo, pe a mavae le goto o le lā i le afiafi o le aso e sosoo ai, a o amata Nisani 14.

Peitaʻi, e leʻi uma ai taumafaiga a le ʻaufaitaulaga sili ma le ʻautoeaina o le nuu a o leʻi oo i le Paseka. Ua latou faapotopoto i le lotoā o le maota o le ositaulaga sili o Kaiafa. Aiseā? E latou te lē o fiafia ona o le faaalialia e Iesu i lumāmea o latou uiga leaga. O lea ua latou taupulepule ai “e fai se togafiti ina ia puʻe ai Iesu ma fasiotia.” E faapefea ona latou faia lenei mea, ma o afea o le a latou faia ai? Ua faapea ane le tasi i le isi: “Aua le faia i le tausamiga ina neʻi vevesi tagata.” (Mataio 26:4, 5) Ua fefefe i latou, ona o le toʻatele o tagata e fiafia iā Iesu.

I lenā lava taimi, ua alu atu ai se tasi i taʻitaʻi lotu. Ua faateʻia i latou i le iloa ane, o lenei tagata o Iuta le Sekara o se tasi o aposetolo o Iesu. Ua totō e Satani iā Iuta se manatu leaga o le faalataina lea o lona Matai. Ua fesili atu Iuta iā i latou: “E fia se mea tou te aumaia iā te aʻu ou te faalataina ai o ia iā te outou?” (Mataio 26:15) Ua latou fiafia i lenei fuafuaga, ma ua latou ʻioe e avatu iā te ia tupe siliva.’ (Luka 22:5) O le aofaʻi ua latou avatu iā te ia e tolu sefulu tupe siliva. E tāua lenei mea, auā o le tau o le pologa e toʻatasi e 30 sekeli. (Esoto 21:32) O le faia faapea, ua faaalia ai le ʻinoʻino ma le manatu faatauvaa o taʻitaʻi lotu iā Iesu. O lea, ua amata ai loa ona “saʻili [e Iuta] se avanoa lelei e faalataina ai [Iesu] iā i latou, ae e lē o iai le motu o tagata.”—Luka 22:6.

E amata Nisani 13 pe a goto le lā i le Aso Lulu, ma o le pō mulimuli (pō lona ono) foʻi lea o Iesu i Petania. O le a faia i le aso e sosoo ai sauniuniga faaiʻu mo le Paseka. E tatau ona suʻe mai se tamaʻi mamoe, ona fasia lea ma tunu atoa pe a amata Nisani 14. O fea o le a latou faia ai lenei taumafataga, ma o ai o le a tapenaina? E leʻi faailoa atu e Iesu ni faamatalaga e faatatau i sauniuniga e faia mo le Paseka. O lea, ua lē mafai ai e Iuta ona faailoa atu ni faamatalaga i le ʻaufaitaulaga sili.

Ua oo nei i le aoauli o le Aso Tofi, ma ua aauina atu e Iesu Peteru ma Ioane ma faapea atu iā i laʻua: “Ia oulua ō ma sauni se mea tatou te aai ai le paseka.” Ua la fai ane iā te ia: “O fea e te finagalo ma te saunia ai le paseka?” Ua fetalai atu Iesu: “Pe a oulua ō atu i le aai, e faafetaui oulua e se tamāloa o loo ave se faguvai. Ia mulimuli atu iā te ia i le fale e ulu atu i ai. Ia oulua fai atu i le matai o le aiga, ʻUa faapea mai le Aʻoaʻo iā te oe: “O fea le potu e tali ai mālō ou te ʻai ai le paseka ma oʻu soo?”’ Ona ia faasino atu lea iā te oulua se potu tele i luga ua uma ona teu lelei. Ia saunia mea uma i inā.”—Luka 22:8-12.

E mautinoa o se soo o Iesu le matai o le aiga. Atonu o loo ia faatalitalia le talosaga a Iesu, ina ia faaaogā lona fale mo lenei sauniga faapitoa. Ina ua taunuu atu nei aposetolo e toʻalua i Ierusalema, ua la maua ai mea uma e pei ona fetalai ai Iesu. Ua la faamautinoa ua saunia le tamaʻi mamoe, faapea isi tapenapenaga mo le Paseka. O lea, ua saunia mea uma e manaʻomia e Iesu ma ona aposetolo e toʻa 12, mo le faamanatuina o le Paseka.