Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

Iesu—Le Ala, le Upu Moni ma le Ola

 MATAUPU 135

Ua Faaali Atu Iesu o Lē ua Toe Faatūina i le Toʻatele

Ua Faaali Atu Iesu o Lē ua Toe Faatūina i le Toʻatele

LUKA 24:13-49 IOANE 20:19-29

  • UA FAAALI ATU IESU I NISI O SOO I LE AUALA I EMAU

  • UA FAAMATALA ATU PEA E IESU TUSITUSIGA PAIA I ONA SOO

  • UA LĒ TOE MASALOSALO TOMA

O loo faagasolo pea le Aso Sa Nisani 16, ma o loo mafatia pea soo o Iesu. E latou te lē o malamalama i le uiga o le tuugamau ua avanoa. (Mataio 28:9, 10; Luka 24:11) I lenā lava aso, ua tuua ai e Kaleopa ma se isi soo Ierusalema ae agaʻi atu i Emau, lea e pe ā ma le fitu maila (11 km) le mamao.

A o la savavali i le ala, ua la talatalanoa i mea ua tutupu. Peitaʻi, ua faalatalata atu se tagata ese iā i laʻua ma fesili atu: “O ā ea mea o lua talatalanoa i ai a o lua savavali?” Ua tali mai Kaleopa: “Po o oe o se tagata ese i Ierusalema ua e lē iloa ai mea ua tutupu i nei aso?” Ua toe fesili atu le tagata ese: “O ā mea?”—Luka 24:17-19.

Ua la tali mai: ʻO mea e faatatau iā Iesu le Nasareta. Na matou faamoemoe o lenei tagata na filifilia e laveaʻiina Isaraelu.’—Luka 24:19-21.

Ua faamatala atu e Kaleopa ma le isi soo mea na tutupu i lenā lava aso. Ua la faapea atu, na taunuu atu nisi o fafine i le tuugamau ae ua leai se tino maliu o Iesu, ma sa latou vaaia foʻi se mea ofoofogia, o agelu o ē na faapea mai ua toetū Iesu. Na ō atu foʻi nisi i le tuugamau ma “maua ai mea e pei ona faamatalaina e fafine.”—Luka 24:24.

Ua manino mai, e matuā lē malamalama lava nei soo e toʻalua i le uiga o mea ua tutupu. Ua aafia ai o la loto i o la manatu sesē. O lea, ua tali atu ai ma le mautinoa le tagata ese ina ia faasaʻo ai o la manatu: “Pagā oulua o tagata lē faautauta ma o ē e talitonugatā i mea na taʻua e perofeta! Pe e lē tatau ea ona tigāina le Keriso i nei mea uma ma ulu atu i lona mamalu?” (Luka 24:25, 26) Ua faamatala atu e le tagata ese i nei soo e toʻalua, le tele o faamatalaga mai i Tusitusiga Paia e faatatau i le Keriso.

Ua taunuu atu nei i latou e lata i Emau. Peitaʻi, o loo fia faalogologo atu pea nei soo e toʻalua i le tagata ese. O lea ua la tauanau ai o ia e faapea: “Tatou nonofo auā ua leva le aso ma o le a pō.” O lea, ua nofo ai lenei tagata ese e taumafa faatasi ma i laʻua. Ae a o ia faia le tatalo, vaevae le falaoa ma tufatufa atu iā i laʻua, ua la iloa o ia. Peitaʻi ua mou ese o ia. (Luka 24:29-31) O lea la ua mautinoa e nei soo ua toetū Iesu.

O le fiafia tele o nei soo, ua faapea ane ai le tasi i le isi: “Pe e leʻi mū ea o ta loto a o fetalai mai o ia iā i taʻua i le auala, ma faamatala mai Tusitusiga Paia?” (Luka 24:32) Ua la toe faanatinati atu nei i Ierusalema, ma ua la maua ai le ʻauaposetolo ma ē o loo latou faatasi. Ae a o leʻi fai atu se la faamatalaga, ua faapea atu nisi: “E moni, ua toetū le Alii ma na faaali atu o ia iā Simona!” (Luka 24:34) O lea, ua la faamatala atu ai loa le auala na faaali atu ai Iesu iā i laʻua. Ioe, o i laʻua foʻi o ni ē na molimauina ua toe faatūina mai Iesu.

Peitaʻi ua faateʻia i latou uma, ina ua faaali atu Iesu iā i latou i totonu o le potu o loo latou iai. E faigatā ona latou talitonu e mafai ona tupu lenei mea, auā na latou lokaina faitotoʻa ona o le fefefe i tagata Iutaia. E ui i lea, ua tū Iesu i lo latou lotolotoi ma fetalai atu i se leo mālū: “Ia outou maua le filemu.” Peitaʻi ua fefefe i latou, ma “manatu o loo latou vāai atu i se agaga” e pei foʻi ona latou manatu i ai i le taimi ua teʻa.—Luka 24:36, 37; Mataio 14:25-27.

Ina ia faamautinoa atu e lē o ia o se agaga pe e na o se vaaiga, ae e iai lona tino faaletino, ua faaali atu e Iesu iā i latou ona lima ma ona vae ma faapea atu: “Aiseā ua outou atuatuvale ai ma masalosalo o outou loto? Ia vaavaai mai i oʻu lima ma oʻu vae; o aʻu lenei, ia paʻi mai ma vāai mai auā e leai se tino ma ni ivi o se agaga e pei ona outou vaavaai mai ai iā te aʻu.” (Luka 24:36-39) Ua matuā fiafia i latou ma taufaiofo i lenei mea. Peitaʻi, e faigatā lava ona latou talitonu e moni lenei mea ua tupu.

Ua taumafai e Iesu se isi auala e faamaonia atu ai iā i latou ua toe soifua moni o ia, e ala i le fesili atu: “Pe e iai sa outou meaʻai?” Ua latou avatu iā te ia se fasi iʻa tunu. Ua ia tago atu i ai ma taumafa, ona ia faamatala atu lea iā i latou o ana fetalaiga na fai atu a o leʻi oo i lona maliu, ma ʻe tatau ona faataunuuina o mea uma ua tusia i le tulafono a Mose, ma le ʻau Perofeta ma Salamo e faatatau iā te ia.’—Luka 24:41-44.

Sa fesoasoani Iesu iā Kaleopa ma le isi soo ina ia malamalama i Tusitusiga Paia. O le mea foʻi lenā ua ia faia mo i latou uma o loo faapotopoto i totonu o le potu. O lea, ua ia fetalai atu ai: “E pei ona tusia, e tigāina le Keriso ma toetū mai i le oti i le aso lona tolu, ma e ao ona talaʻi atu i atunuu uma le salamō mo le faamagaloina o agasala ona o lona suafa, e amata atu i Ierusalema, e fai foʻi outou ma molimau i nei mea uma.”—Luka 24:46-48.

E lē o iai le aposetolo o Toma i le taimi lea. I nai aso e mulimuli ane ai, ua faapea atu ma le fiafia isi soo iā te ia: “Ua matou vāai i le Alii!” Ua tali mai Toma: “Ou te lē talitonu seʻiloga lava ou te vaai i manuʻa i ona lima i mea na tutuʻi i fao, ma tuu loʻu tamatamaʻilima i manuʻa o mea na tutuʻi i fao, ma loʻu lima i lona itu.”—Ioane 20:25.

I le valu aso mulimuli ane ai, ua toe faapotopoto foʻi le ʻausoo i totonu o se fale o loo loka faitotoʻa, ma o lea ua iai ma Toma. Ua tū Iesu i lo latou lotolotoi, ua liutino tagata ma fetalai atu: “Ia outou maua le filemu.” Ua faliu atu o ia iā Toma ma faapea atu: “Tuu mai lou tamatamaʻilima i ī, ma vaai mai i oʻu lima, ma tuu mai lou lima i loʻu itu, ma soia e te masalosalo, a ia e talitonu mai.” Ua tali mai Toma: “Loʻu Alii e, ma loʻu Atua!” (Ioane 20:26-28) O lea, ua talitonu nei Toma o Iesu lea ua toe soifua mai o se foafoaga agaga malosi, ma ua fai ma sui o Ieova le Atua.

Ua fetalai atu Iesu iā te ia: “Po ua e talitonu mai ea ina ua e vaai mai iā te aʻu? E fiafia i latou e lē vāai mai ae talitonu mai pea.”—Ioane 20:29.