Skip to content

Skip to secondary menu

Skip to table of contents

Molimau a Ieova

Faa-Samoa

Iesu—Le Ala, le Upu Moni ma le Ola

 MATAUPU 124

Ua Faalataina Keriso ma Puʻea o Ia

Ua Faalataina Keriso ma Puʻea o Ia

MATAIO 26:47-56 MAREKO 14:43-52 LUKA 22:47-53 IOANE 18:2-12

  • UA FAALATAINA E IUTA IESU I LE FAATOʻAGA

  • UA TIPIESE E PETERU LE TALIGA O SE TASI TAMĀLOA

  • UA PUʻEA IESU

Ua teʻa le 12 i le pō. Ua māeʻa ona totogi e le ʻauositaulaga Iuta i tupe siliva e 30, ina ia mafai ai ona ia faalataina Iesu. Ua taʻitaʻi atu nei e Iuta se vaega e toʻatele o le ʻaufaitaulaga sili ma le ʻau Faresaio, ina ia saʻili iā Iesu. O loo faatasi ma i latou se vaega o fitafita Roma ma le alii e pule i ʻau.

Ina ua fetalai atu Iesu iā Iuta e alu ese mai i le potu sa faia ai le taumafataga o le Paseka, na alu atu saʻo o ia i le ʻaufaitaulaga sili. (Ioane 13:27) Na faapotopoto e le ʻaufaitaulaga sili a latou leoleo faapea se vaega o fitafita. Atonu sa taʻitaʻia muamua i latou e Iuta i le potu lea sa fai ai e Iesu ma ona aposetolo le taumafataga o le Paseka. Ae o lea ua latou ui atu nei i le ālia o Ketarono ma agaʻi atu i le faatoʻaga o Ketesemane. O lo latou naunau ina ia maua Iesu, ua latou ave ai auupega, sulu ma molī.

Ua mautinoa e Iuta le nofoaga o loo iai Iesu, a o ia taʻitaʻia atu lenei vaega o tagata i le mauga o Olive. E masani ona mālōlō Iesu ma ona aposetolo i le faatoʻaga o Ketesemane, a o latou femalagaaʻi i le va o Petania ma Ierusalema. Ae i lenei taimi, atonu ua lē iloa atu Iesu ona o le pogisa o le togāolive. E faapefea la ona iloa e fitafita Iesu, ae atonu e latou te leʻi vāai muamua iā te ia? Ina ia fesoasoani iā i latou, ua faailoa atu e Iuta se faailoga e faapea: “O lē ou te sogi i ai, o ia lenā; ia outou puʻe iā te ia ma taʻitaʻi ese atu e leoleo.”—Mareko 14:44.

Ua taʻitaʻi atu nei e Iuta lenei vaega o tagata i le faatoʻaga, ma ua iloa atu ai Iesu ma ona aposetolo. Ua savali saʻo atu o ia iā Iesu ma faapea atu: “Malo lava iā te oe le Aʻoaʻo e!” ma sogi lemū atu iā te ia. Ua tali mai Iesu: “Sole, o le ā le mea ua e sau ai?” (Mataio 26:49, 50) Ua toe tali lava e Iesu lana fesili e ala i le toe fesili atu: “Iuta e, e te faalata ea le Atalii o le tagata i le sogi?” (Luka 22:48) Ina ua māeʻa lenā, e leʻi toe uaʻi atu Iesu iā Iuta.

Ua sōsō atu Iesu i le malamalama ma fesili atu i le motu o tagata: “O ai o loo outou saʻilia?” Ua tali mai i latou: “O Iesu le Nasareta.” Ua faapea atu ma le lototele Iesu: “O aʻu lenei o ia.” (Ioane 18:4, 5) Ua faateʻia i latou ma lē mautinoa po o le ā le mea o le a tupu. O lea, ua latou paʻuʻū ai i le eleele.

Nai lo o le faaaogā e Iesu o le avanoa lea e sola ese ai, ae ua ia toe fesili atu po o ai o loo latou saʻilia. Ina ua latou toe faapea mai “o Iesu le Nasareta,” ona faapea atu lea o Iesu i se auala toʻafilemu: “Na ou fai atu, o aʻu lenei. Afai o aʻu lea o loo outou saʻilia, ia tuu atu i latou nei e ō.” E ui lava i lea taimi faigatā, ae o loo manatua pea e Iesu lana faamatalaga i le taimi ua teʻa e faapea, e leʻi iai lava se tasi ua leiloa. (Ioane 6:39; 17:12) O loo puipuia pea e Iesu ona soo faamaoni ma e leʻi iai ma se tasi o i latou ua leiloa, ʻseʻi vaganā ai Iuta le atalii o le faaumatiaga.’ (Ioane 18:7-9) O lea, ua ia talosaga atu ai ina ia tuu atu ona soo faamaoni e ō.

Ua tutulaʻi fitafita ma faalatalata atu iā Iesu, ma ua iloa atu e le ʻauaposetolo le mea o loo tupu. Ua latou fesili atu iā Iesu: “Le Alii e, pe matou te taia ea i latou i le pelu?” (Luka 22:49) A o leʻi tali mai Iesu, ua seʻi e Peteru se tasi o pelu o loo iai i le ʻauaposetolo, ma tipiese ai le taliga taumatau o Maliko, o se pologa a le ositaulaga sili.

Ua tago atu Iesu i le taliga o Maliko ma faamālōlō iā te ia, ona ia aʻoaʻo atu lea o se lesona tāua e ala i le poloaʻia o Peteru: “Ia toe sulu lau pelu i lona faamoega, auā o i latou uma e tago i le pelu, e faaumatia i le pelu.” Ua lotomalie Iesu ina ia puʻea o ia auā ua ia fetalai: “E faapefea la ona faataunuuina o mea ua tusia i Tusitusiga Paia e tatau ona tutupu?” (Mataio 26:52, 54) Ua faaauau lana fetalaiga e faapea: “Pe e lē tatau ea ona ou inu i le ipu ua tuuina mai e le Tamā iā te aʻu?” (Ioane 18:11) Ua lotomalie Iesu e gauaʻi i mea ua faafinagaloina e le Atua mo ia, e ui o le a oo ai iā te ia le oti.

Ua fesili atu Iesu i tagata: “Po ua outou ō mai ea ma a outou pelu ma pouvai e puʻe iā te aʻu, e pei o se tagata faomea? O aso taʻitasi na ou nofo ai i le malumalu ma aʻoaʻo atu, ae tou te leʻi puʻeina aʻu. Ae ua oo nei mea uma ina ia taunuu ai tusitusiga a le ʻauperofeta.”—Mataio 26:55, 56.

Ua aufaatasi fitafita, le alii e pule i ʻau, ma leoleo o tagata Iutaia e puʻe Iesu ma saisai o ia. Ua vāai atu le ʻauaposetolo i lenei mea, ona latou sosola ai lea. Peitaʻi, ua mulimuli atu pea iā Iesu “se tauleʻaleʻa” o loo i le motu o tagata, atonu o le soo lea o Mareko. (Mareko 14:51) Ua iloa o ia e le motu o tagata, ona latou taumafai ai lea e puʻe iā te ia. Peitaʻi, ua sola o ia ae tiaʻi ai lona ofu lino.