Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

Iesu—Le Ala, le Upu Moni ma le Ola

 MATAUPU 110

Le Taimi Mulimuli o Iesu i le Malumalu

Le Taimi Mulimuli o Iesu i le Malumalu

MATAIO 23:25–24:2 MAREKO 12:41–13:2 LUKA 21:1-6

  • UA TOE TAʻUSALAINA E IESU TAʻITAʻI LOTU

  • O LE A FAATAMAʻIA LE MALUMALU

  • UA LAFO E SE FAFINE MATIVA UA OTI LANA TANE TUPE ITI E LUA

Ua faaauau ona faaalialia e Iesu uiga lē lelei o le ʻautusiupu ma le ʻau Faresaio, ma faailoa atu i luma o tagata lo latou faafiaamiotonu. Ua ia fetalai atu i se auala faafaatusa e faapea: “Ua outou faamamā i tua o le ipu ma le tanoa, a o totonu ua tumu i mea faoa ma le matapeʻapeʻa. O oe lenā le Faresaio tauaso, ia faamamā muamua totonu o le ipu ma le tanoa, ona faatoʻā mafai lea ona faamamā ma tua.” (Mataio 23:25, 26) E faaeteete le ʻau Faresaio pe a oo i le tausisia o le tumamā ma foliga atu i fafo. Ae ua latou lē amanaʻia o latou tagata lilo i totonu, ma lē taulau i le faamamāina o o latou loto.

Ua faaalia foʻi lo latou faafiaamiotonu, i lo latou lotomalilie e fausia ma teuteu tuugamau mo le ʻauperofeta. Peitaʻi ua fetalai atu Iesu, ʻo i latou o atalii o ē na fasiotia le ʻauperofeta.’ (Mataio 23:31) Ua faamaonia lea manatu i a latou taumafaiga e fasioti Iesu.—Ioane 5:18; 7:1, 25.

Ua taʻua nei e Iesu le iʻuga o le a oo i nei taʻitaʻi lotu pe afai e latou te lē salamō: “O outou gata, o fanau a gata feʻai, e faapefea ona outou sosola ese mai le faasalaga i Kena?” (Mataio 23:33) O le uiga o le upu Kena o le “vanu o Hinoma.” E faaaogā lea vanu e susunu ai lapisi, ma o se ata manino lea o le faaumatiaga aʻiaʻi o le a oo i le ʻautusiupu ma le ʻau Faresaio amioleaga.

O le a fai soo o Iesu ma ona sui i le avea ai ma “perofeta, o tagata atamamai, ma faiaʻoga.” O le ā le auala o le a feutagaʻi ai taʻitaʻi lotu ma i latou? Ua fetalai atu Iesu i taʻitaʻi lotu: ʻO nisi o oʻu soo tou te fasiotia ma tutuʻi i luga o laau, ma o nisi o i latou tou te fasi faamoʻamoʻa i o outou sunako, ma sauāina mai lea aai i lea aai, ina ia i o outou luga toto o ē amiotonu lea na faamasaaina i le lalolagi, e amata mai i le toto o le tagata amiotonu o Apelu e oo atu i le toto o Sakaria, o lē na outou fasiotia.’ Ua lapataʻi atu Iesu: “O le mea moni, ou te fai atu iā te outou, O mea uma na e oo i lenei tupulaga.” (Mataio 23:34-36) O le tulaga lenā o le a iai i le 70 T.A., pe a faaumatia e ʻautau a Roma Ierusalema ma fano ai le faitau afe o tagata Iutaia.

E tigā le finagalo o Iesu pe a mafaufau i lenei mea mataʻutia o le a tupu. Ua ia faapea atu ma le faanoanoa: “Ierusalema e, Ierusalema e, o lē na fasiotia le ʻauperofeta ma fetogi i maa o ē na aauina atu iā te ia. Ua tele lava loʻu manaʻo e faapotopoto faatasi lau fanau, e pei ona ofaofataʻi e se moa lana toloaʻi i lalo o ona apaʻau! Ae peitaʻi ua outou lē mananaʻo i ai. Faauta! Ua tuulafoaʻiina lo outou fale iā te outou.” (Mataio 23:37, 38) Atonu ua taumānatu i latou o loo faalogologo atu, po o le ā le “fale” o loo faasino atu i ai fetalaiga a Iesu. Faamata o loo ia faasino atu i le malumalu matagofie i Ierusalema, lea e foliga mai o loo puipuia e le Atua?

Ua toe fetalai atu o ia: “Ou te fai atu iā te outou, tou te lē toe vāai mai iā te aʻu seʻia oo ina outou faapea ane, ʻE manuia o ia o lē ua maliu mai i le suafa o Ieova!’” (Mataio 23:39) O loo sii atu e Iesu upu faavaloaga o loo i le Salamo 118:26: “Ia manuia Lē e afio mai i le suafa o Ieova; e matou te faamanuia atu foʻi iā te outou le nuu mai i le fale o Ieova.” Ua manino mai la, o le taimi lava e faatamaʻia ai lenei malumalu, e lē toe iai se tasi e toe alu atu i ai i le suafa o le Atua.

Ua maliu atu nei Iesu i le vaega o le malumalu lea o loo iai pusa e teu ai tupe. O nei pusa e lauiti pito i luga ae lautetele pito i lalo, ma e iai ni tamaʻi pū i le pito i luga e lafo i ai e tagata a latou tupe. Ua silasila atu Iesu o loo lafo e le toʻatele o tagata Iutaia a latou tupe i nei pusa. O loo lafo ai foʻi e tagata mauʻoa “le tele o tupe.” Ona ia iloa atu lea o se fafine mativa ua oti lana tane, o loo lafo i nei pusa “ni tupe iti se lua.” (Mareko 12:41, 42) E mautinoa ua silafia e Iesu le faamalieina o le finagalo o le Atua, i le meaalofa ua foaʻi atu e lenei fafine.

Ua valaau Iesu i ona soo, ma ua ia fetalai atu: “E moni ou te fai atu iā te outou, e sili atu mea ua lafo e lenei fafine mativa ua oti lana tane, nai lo o i latou uma ua lafo a latou tupe i mea e teu ai tupe.” E faapefea ona moni lenei tulaga? Ua faaauau le faamatalaga a Iesu: “O i latou uma, ua lafo atu nisi o mea mai i a latou tupe e tele, a o le fafine mativa, ua ia lafo tupe uma ua iā te ia e ola ai.” (Mareko 12:43, 44) Maʻeu le eseese o le auala e manatu ma gaoioi ai lenei fafine mai i taʻitaʻi lotu!

A o faagasolo Nisani 11, ua maliu ese Iesu mai i le malumalu mo le taimi mulimuli. Ua faapea atu se tasi o ona soo: “Le Aʻoaʻo e, silasila foʻi, maʻeu le tetelē o nei maa ma nei fale!” (Mareko 13:1) O nisi o maa o le malumalu e sili ona tetelē ma ua atili malosi ai lona faavae. Pe a fua i le malosi o le fausaga o le malumalu, e matuā ese lava la mai i le fetalaiga a Iesu e faapea: “Po ua e vaai atu ea i nei fale tetele? E lē toe tiʻetiʻe se tasi maa i luga o se isi maa, ae o le a soloia i lalo.”—Mareko 13:2.

Ua uma ona faamatala atu e Iesu o nei mea, ona latou sopo atu lea ma ona aposetolo i le ālia o Ketarono ma āʻea le mauga o Olive. I se tasi taimi, ua iai na o ia ma ona aposetolo e toʻafā o Peteru, Aneterea, Iakopo ma Ioane. Ua latou tutū i se vaega o le mauga o Olive, ma vaavaai ifo i le malumalu matagofie.