Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

Iesu—Le Ala, le Upu Moni ma le Ola

 MATAUPU 118

O se Finauga po o Ai e Sili

O se Finauga po o Ai e Sili

MATAIO 26:31-35 MAREKO 14:27-31 LUKA 22:24-38 IOANE 13:31-38

  • UA FAUTUA ATU IESU E FAATATAU I LE UIGA FIASILI

  • UA VALOIA LE FAAFITIA E PETERU O IESU

  • E ILOA SOO O IESU PE A FAAALIA LE ALOFA O LE TASI I LE ISI

O le pō mulimuli lenei o Iesu ma ona aposetolo, ma na ia aʻoaʻo atu ai se lesona matagofie e faatatau i le auauna atu ma le lotomaulalo, e ala i le mulumuluina o o latou vae. Aiseā ua talafeagai ai le faia e Iesu o lea gaoioiga? Talu ai sa iai se vaivaiga na aliaʻe mai i le ʻauaposetolo. E ui lava o loo latou auauna ma le faamaoni i le Atua, ae o loo popole lava po o ai o i latou e sili. (Mareko 9:33, 34; 10:35-37) Ua toe aliaʻe mai foʻi lenei vaivaiga i lea afiafi.

“Ua fefinauaʻi [le ʻauaposetolo] po o ai o i latou e sili.” (Luka 22:24) Pagā le faanoanoa o Iesu i le vaai atu ua latou toe fefinauaʻi foʻi. O le ā la le gaoioiga ua faia e Iesu?

Nai lo o le otegia o le ʻauaposetolo ona o o latou uiga ma amioga, ae ua ia faaalia le onosaʻi ma fetalai atu: ʻE pulepuletutū tupu o malo iā i latou, ma o ē e pule iā i latou ua taʻua o Ē e Limafoaʻi. Ae e lē faapena outou. O ai e sili, o lē o loo taoto e ʻai po o lē o loo auauna atu?’ Ona faamanatu atu lea e Iesu o le faaaʻoaʻoga ua ia faataatia mo i latou, e ala i le fetalai atu: “A o lenei ua ou auauna atu iā te outou.”—Luka 22:25-27.

E ui i o latou tulaga lē lelei atoatoa, ae e leʻi tuua lava e le ʻauaposetolo Iesu i le tele o taimi na ia feagai ai ma tulaga faigatā. O lea ua fetalai atu ai Iesu iā i latou: ʻUa ou osia se feagaiga ma outou, e pei lava ona osia e loʻu Tamā se feagaiga ma aʻu mo se malo.’ (Luka 22:29) O nei tane o ni soo faamaoni o Iesu. Ua faamautinoa atu e Iesu, o le a latou iai i le Malo ma pule faatasi ai ma ia, e ala i le feagaiga ua osia i lo latou va.

E ui lava ua maua e le ʻauaposetolo lenei faamoemoe matagofie, ae o loo iai pea i latou i le tino lē lelei atoatoa. Ua fetalai atu Iesu iā i latou: “Ua manaʻo Satani e lūlū iā te outou e pei o saito,” ia e taapeape solo pe a lūlūina. (Luka 22:31) Ua ia lapataʻi atu foʻi: “Tou te tuua aʻu i lenei pō, auā ua tusia, ʻOu te taia le leoleo mamoe ona taapeape ai lea o le lafu mamoe.’”—Mataio 26:31; Sakaria 13:7.

Ua tali atu Peteru ma le mautinoa: “E tusa lava pe tuua oe e i latou uma, ae ou te lē tuua lava oe!” (Mataio 26:33) Ua fetalai atu Iesu iā Peteru, a o leʻi vivini faalua le moa i lenā pō o le a ia faafitia o ia. Ua toe faaauau le faamatalaga a Iesu: “Ua ou faatoga atu mo oe, ina ia aua neʻi mou atu lou faatuatua; a o oe, pe a e toe foʻi mai, ia e faamalosi i ou uso.” (Luka 22:32) Peitaʻi ua tali atu Peteru ma le maumauaʻi: “E tusa lava po ou te oti faatasi ma oe, ou te lē faafitia lava oe.” (Mataio 26:35) O le tali atu foʻi lenā a isi aposetolo.

Ua fetalai atu Iesu i ona soo: “Ua lē o toe umi se taimi tatou te faatasi ai. Tou te saʻili mai iā te aʻu, ma e pei ona ou fai atu i tagata Iutaia, ou te fai atu ai nei foʻi iā te outou, ʻE lē mafai ona outou ō mai i le mea ou te alu i ai.’” Ua toe faaauau lana fetalaiga: “Ua ou tuuina atu iā te outou le poloaʻiga fou, ina ia outou alolofa o le tasi i le isi; e pei ona ou alofa atu iā te outou, ia outou alolofa foʻi o le tasi i le isi. O le mea lea e iloa ai e tagata uma o oʻu soo outou, pe afai ua outou alolofa o le tasi i le isi.”—Ioane 13:33-35.

Ina ua faalogo Peteru i le fetalaiga a Iesu e faapea e lē o toe umi se taimi e latou te faatasi ai, ona fesili atu lea o ia: “Le Alii e, o fea a e maliu i ai?” Ua tali mai Iesu: “O le mea ou te alu i ai, e lē mafai ona e mulimuli mai ai nei iā te aʻu, ae e mulimuli ane e te alu atu i ai.” E lē o malamalama Peteru i le tali a Iesu. O lea, ua ia faapea atu ai: “Le Alii e, aiseā e lē mafai ai nei ona ou mulimuli atu iā te oe? Ou te tuuina atu loʻu ola ona o oe.”—Ioane 13:36, 37.

Ua faasino atu nei Iesu i le taimi na ia aauina atu ai ona aposetolo e talaʻi i Kalilaia, e aunoa ma ni ato tupe po o ni taga meaʻai. (Mataio 10:5, 9, 10) Ua fesili atu o ia: “Pe na outou matitiva ai ea?” Ua latou tali mai: “E leai!” Ae o le ā la e tatau ona latou faia? Ua fetalai atu Iesu: “O lē ua iai se ato tupe, ia ave, faapea foʻi se taga meaʻai, a o lē ua leai se pelu, ia faatau atu lona ofu tele ma faatau mai ai sana pelu. Auā ou te fai atu iā te outou, e tatau ona faataunuuina iā te aʻu le mea ua tusia e faapea, ʻUa faitaulia faatasi o ia ma tagata solitulafono.’ Auā o loo faataunuuina mea ua tusia iā te aʻu.”—Luka 22:35-37.

O loo faasino atu Iesu i le taimi o le a tutuʻiina ai o ia i luga o le laau i autafa o tagata solitulafono. Mulimuli ane, o le a feagai ona soo ma sauāga ogaoga. Ua manatu i latou ua latou nofosauni. O lea, ua latou faapea atu ai iā Iesu: “Le Alii e, faauta! o pelu nei e lua.” Ua tali mai o ia: “Ua lava na.” (Luka 22:38) O le iai o pelu e lua iā i latou, o le a maua ai e Iesu le avanoa e aʻoaʻo atu ai se isi lesona tāua.