Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

Iesu—Le Ala, le Upu Moni ma le Ola

 MATAUPU 105

Se Lesona i le Faatuatua Mai i le Laau o le Mati

Se Lesona i le Faatuatua Mai i le Laau o le Mati

MATAIO 21:19-27 MAREKO 11:19-33 LUKA 20:1-8

  • SE LESONA E FAATATAU I LE FAATUATUA MAI I LE LAAU O LE MATI UA MAMAE

  • UA LUʻIA LE PULE A IESU

Ua tuua nei e Iesu Ierusalema i le aoauli o le Aso Gafua ae alu atu i Petania, lea o loo i le itu i sasaʻe o le mauga o Olive. Atonu ua ia mālōlō ai i inā mo le pō i le fale o ana uō o Lasalo, Maria ma Mareta.

Ua oo nei i le taeao o Nisani 11, ma ua toe malaga atu Iesu ma ona soo i Ierusalema. O le taimi mulimuli lea ua asiasi atu ai Iesu i le malumalu. O le aso mulimuli foʻi lea o lana faiva i le lalolagi a o ia leʻi faamanatuina le Paseka, faavaeina le Faamanatuga o lona maliu, ma tuuina atu o ia i le faamasinoga ma fasiotia.

A o latou malaga mai i Petania e ui atu i le mauga o Olive ma agaʻi atu i Ierusalema, ua iloa atu e Peteru le laau lea sa fetuu e Iesu i le taeao o le aso ua tuanaʻi, ma ua ia faapea atu iā te ia: “Le Aʻoaʻo e, silasila foʻi, ua mamae le mati lea na e fetuuina.”—Mareko 11:21.

Ae aiseā na fetuu ai e Iesu lenei laau ina ia mamae? Ua ia faailoa atu le māfuaaga: “E moni ou te fai atu iā te outou, Afai tou te faatuatua ae lē masalosalo, e lē gata tou te faia e pei ona ou faia i le mati, ae tou te fai atu foʻi i lenei mauga, ʻIa siitia ia ma lafo i le sami,’ ona faia lava lea. O mea uma tou te talosaga atu ai i le tatalo ma le faatuatua, tou te maua lava.” (Mataio 21:21, 22) O lea ua toe taʻua e Iesu le manatu sa ia faamatalaina i le taimi ua teʻa, e faatatau i le mafai e sina faatuatua itiiti ona siitia ai se mauga.—Mataio 17:20.

O le fetuuina la e Iesu o le laau o le mati ina ia mamae, ua ia aʻoaʻoina atu ai se lesona, e tatau ona faatuatua ona soo i le Atua. Ua fetalai atu o ia: “O mea uma lava tou te talosaga atu ai i le tatalo, ia outou faatuatua e pei lava ua outou mauaina, ma o le a outou mauaina lava.” (Mareko 11:24) Maʻeu se lesona tāua mo soo uma o Iesu! E tāua tele lenei lesona mo le ʻauaposetolo, auā e lē o toe umi ona latou fesagaʻia lea o tofotofoga faigatā. Ae e iai foʻi se isi lesona e faatatau i le faatuatua, e aʻoaʻoina mai i le laau o le mati ua mamae.

E pei le nuu o Isaraelu o le laau o le mati, ua faaalia mai ai se vaaiga taufaasesē. Ua iai lenei nuu i se feagaiga ma le Atua, ma atonu o loo faafoliga atu o loo latou tausia lana Tulafono. Peitaʻi, e toetoe o le nuu atoa e lē o faaalia le faatuatua, ma e latou te lē o fuaina mai foʻi ni fua lelei. Ua latou teena foʻi e oo lava i le Alo o le Atua. O lea, o le fetuuina e Iesu o le laau o le mati e lē fua mai ina ia mamae, ua ia faataʻitaʻia mai ai le iʻuga o le a oo i lenei nuu e lē faatuatua, ma e lē o fuaina mai ni fua lelei.

E leʻi umi ae taunuu Iesu ma ona soo i Ierusalema. E pei o lana masani, ua alu atu o ia i le malumalu ma amata ona aʻoaʻo atu. Peitaʻi ua luʻia o ia e le ʻaufaitaulaga sili ma le ʻautoeaina e faapea: “O le pule a ai ua e faia ai lenei mea? po o ai ua na tuuina atu le pule iā te oe e faia ai nei mea?” (Mareko 11:28) Atonu ua latou fesili atu, ona o loo latou manatua pea le gaoioiga sa faia e Iesu i tagata suitupe.

Ua tali atu Iesu: “E tasi lava le mea lea ou te fia fesili atu ai. Afai tou te taʻu maia le tali, ona ou taʻuina atu foʻi lea po o le pule a ai ua ou faia ai nei mea. Pe e mai i le lagi ea pe e mai i tagata le papatisoga a Ioane? Ia tali mai iā te aʻu.” O lea la ua luʻia e Iesu le ʻaufaitaulaga ma le ʻautoeaina, ma ua faapea ane le tasi i le isi: “Afai tatou te fai atu, ʻE mai i le lagi,’ ona ia faapea mai lea, ʻAiseā la ua outou lē talitonu ai iā te ia?’ Ae e lē mafai foʻi ona tatou faapea atu, ʻE mai i tagata’?” Ua latou fetalanoaaʻi faapea, ona o le matataʻu i le motu o tagata lea ʻe manatu o Ioane o se perofeta.’—Mareko 11:29-32.

Ua lē iloa e i latou o loo tetee atu iā Iesu le auala e tali atu ai iā te ia. O lea ua latou faapea ane ai: “Matou te lē iloa.” Ua fetalai atu Iesu iā i latou: “Ou te lē taʻuina atu foʻi la iā te outou, po o le pule a ai ua ou faia ai nei mea.”—Mareko 11:33.