Skip to content

Skip to secondary menu

Skip to table of contents

Molimau a Ieova

Faa-Samoa

Iesu—Le Ala, le Upu Moni ma le Ola

 MATAUPU 103

Ua Toe Faamamāina le Malumalu

Ua Toe Faamamāina le Malumalu

MATAIO 21:12, 13, 18, 19 MAREKO 11:12-18 LUKA 19:45-48 IOANE 12:20-27

  • UA FETUU E IESU LE LAAU O LE MATI MA FAAMAMĀ LE MALUMALU

  • INA IA FOAʻI ATU LE OLA I LE TOʻATELE, E TATAU ONA MALIU IESU

E tolu pō sa nonofo ai Iesu ma ona soo i Petania talu ona latou ō ese mai i Ieriko. Ua oo nei i le taeaopō o le Aso Gafua Nisani 10, ma ua latou agaʻi atu i Ierusalema. Ua lagona e Iesu le fia taumafa. O lea, ina ua ia vaai atu i le laau o le mati ona ia alu atu lea i ai. Pe e iai ni fua o lenei laau?

O lea faatoʻā oo i le faaiʻuga o le masina o Mati. Peitaʻi, ua vave ona tutupu lau o le mati, ae o lea e leʻi oo iā Iuni i le taimi o lona fuata. Atonu la ua manatu Iesu o le a ia maua ai ni fua o le laau. Peitaʻi, e na te leʻi maua se mea. Ua faaalia mai e lau o le laau se vaaiga taufaasesē. O lea ua fetalai atu ai Iesu: “Aua neʻi toe ʻaina e se tasi ni ou fua e oo i le faavavau.” (Mareko 11:14) O le taimi lava lea ua amata ai ona mamae le laau o le mati. E faatoʻā iloa le uiga o lenā mea i le taeao e sosoo ai.

E leʻi umi ae taunuu Iesu ma ona soo i Ierusalema. Ua maliu atu o ia i le malumalu, lea na asiasi atu i ai i le aoauli o le aso ua tuanaʻi. Ae o le taimi la lenei e lē na o se asiasiga lea ua faia e Iesu. Ua ia faia se gaoioiga e pei o le mea sa ia faia i le tolu tausaga ua mavae i le Paseka i le 30 T.A. (Ioane 2:14-16) Ua ia tutuli i fafo ʻo ē uma o fai fefaatauaʻiga i le malumalu.’ Ua ia ʻfuli foʻi laulau a tagata suitupe, ma nofoa o le ʻaufaatau lupe.’ (Mareko 11:15) Ua ia faasāina foʻi se tasi ona ui atu i le lotoā o le malumalu ma se avega, e ave i le isi itu o le aai.

Aiseā ua faia ai e Iesu nei gaoioiga maumauaʻi i tagata suitupe, ma i latou o loo faatauina manu i totonu o le malumalu? Ua fetalai o ia: “Pe e lē o tusia ea, ʻE taʻua loʻu fale o le fale tatalo mo nuu uma’? A ua outou faia ma ana o ē e faomea.” (Mareko 11:17) Ua ia taʻua nei tagata o ē e faomea, ona e latou te soona faataugatā le tau o manu, lea o loo fia faatauina e tagata mo a latou taulaga. I le manatu o Iesu, e tusa o le faomea po o le gaoi nei ituaiga o faiga faapisinisi.

Ua faalogo le ʻaufaitaulaga sili, le ʻautusiupu ma alii o le nuu i gaoioiga ua faia e Iesu, ma ua latou toe taumafai foʻi e fasioti o ia. Ae o le itu e faigatā ai, e latou te lē iloa pe faapefea, auā ua lolofi atu tagata e faalogologo iā te ia.

E lē na o tagata Iutaia moni ua ō atu i le Paseka. O loo auai ai foʻi i latou ua liliu i le lotu a tagata Iutaia, lea e aofia ai ma tagata Eleni. Ua ō atu nei tagata Eleni iā Filipo, ma talosaga i ai e latou te fia feiloaʻi iā Iesu. Atonu ua māfua ona latou ō atu iā Filipo ona o lona igoa o se igoa Eleni. Peitaʻi, atonu e lē o mautinoa Filipo pe e talafeagai lenei feiloaʻiga. O lea ua ia talanoa ai iā Aneterea e faatatau i lenei mataupu. Ona la ō atu ai lea iā Iesu, lea e foliga mai o loo iai pea i le malumalu.

Ua silafia e Iesu ua toe o ni nai aso ona oo lea i lona maliu. O lea, e lē o le taimi lenei e faamalie ai le fia iloa o tagata pe saʻili ai foʻi sona lava viiga. Ua ia tali atu iā Filipo ma Aneterea e ala i se talafaatusa e faapea: “Ua oo mai le itula e faamamaluina ai le Atalii o le tagata. E moni, e moni, ou te fai atu iā te outou, Afai e lē paʻū le fatu o le saito i le eleele ma pala ai, e tumau pea o se fatu saito; ae afai e pala, ona fua tele mai ai lea.”—Ioane 12:23, 24.

E foliga mai e itiiti le tāua o se fatu saito e tasi. Ae afai e paʻū lenei fatu i le eleele ma “pala” ai, e mafai ona tupu aʻe ma avea ai o se laau e fuatele mai. I se tulaga talitutusa, o Iesu o se tagata e lelei atoatoa e toʻatasi. Ae o lona tumau ma le faamaoni i le Atua seʻia oo i lona maliu, ua avea ai o ia ma ala e maua ai e le toʻatele o ē faaalia foʻi le agaga faataulagaina, le ola e faavavau. O lea ua fetalai atu ai Iesu: “O lē e faapelepele i lona ola, e faaumatia ai, a o lē e ʻinoʻino i lona ola i lenei lalolagi, e faasaoina ai mo le ola e faavavau.”—Ioane 12:25.

E lē o manatu Iesu mo lona lava lelei, auā ua ia fetalai atu: “Afai e fia auauna mai se tasi iā te aʻu, inā mulimuli mai ia o ia iā te aʻu, ma o le mea ou te iai, e iai foʻi laʻu auauna. Afai e auauna mai se tasi iā te aʻu, e viia o ia e le Tamā.” (Ioane 12:26) Maʻeu se taui matagofie! O le a avea i latou e viia e le Tamā ma pule lagolago faatasi ma Keriso i le Malo.

O le manatunatu o Iesu i puapuaga ma le maliu tigā o le a oo iā te ia, ua ia fetalai atu ai: “O lenei, ua popole tele loʻu loto, ma o le ā saʻu upu e fai atu? Loʻu Tamā e, ia e faaola mai iā te aʻu i lenei itula.” E lē faapea e lē o manaʻo Iesu e faataunuu le finagalo o le Atua. Ua toe fetalai atu o ia: “Ae ui i lea, o le mea lava lenei ua ou oo mai ai i lenei itula.” (Ioane 12:27) Ua lotomalie Iesu e faataunuu mea uma ua finagalo i ai le Atua, e aofia ai ma lona maliu faataulagaina.