Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

Iesu—Le Ala, le Upu Moni ma le Ola

 MATAUPU 125

Ua Taʻitaʻi Atu Iesu iā Ana Ona Avatu ai Lea iā Kaiafa

Ua Taʻitaʻi Atu Iesu iā Ana Ona Avatu ai Lea iā Kaiafa

MATAIO 26:57-68 MAREKO 14:53-65 LUKA 22:54, 63-65 IOANE 18:13, 14, 19-24

  • UA TAʻITAʻI ATU IESU IĀ ANA, O LĒ SA AVEA MA OSITAULAGA SILI

  • UA FAIA E LE SANITERINI SE FAAMASINOGA E LĒ TUSA AI MA LE TULAFONO

Ina ua uma ona saisaia Iesu e pei o se tagata solitulafono, ona taʻitaʻi atu lea o ia iā Ana. Sa avea Ana ma ositaulaga sili, i le taimi na maofa ai aʻoaʻo i le malumalu i fesili a Iesu ina ua 12 ona tausaga. (Luka 2:42, 47) Na mulimuli ane avea nisi o atalii o Ana ma ositaulaga sili. Ae o le taimi lenei, o lea ua avea Kaiafa le toʻalua o le afafine o Ana ma ositaulaga sili.

A o iai Iesu i le maota o Ana, ua maua ai e Kaiafa se taimi e faapotopoto ai le Saniterini. E toʻa 71 sui o le Saniterini (le Faamasinoga Sili), lea e aofia ai le ositaulaga sili ma isi foʻi sa avea muamua ma ositaulaga sili.

Ua fesili atu Ana iā Iesu “e uiga i ona soo ma ana aʻoaʻoga.” Ua tali mai Iesu: “Ua ou tautala atu i luma o tagata i le lalolagi. E masani foʻi ona ou aʻoaʻo atu i sunako ma i le malumalu, o i inā e ō mai uma i ai tagata Iutaia; ma ou te leʻi tautala faalilolilo foʻi i se mea. Aiseā ua outou fesili mai ai iā te aʻu? Fesili atu iā i latou o ē na faalogo i mea na ou tautala atu ai iā i latou.”—Ioane 18:19-21.

Ua uma ona fetalai atu o Iesu i nei mea, ona pō ai lea o ona fofoga e se leoleo o loo tū ai i inā ma faapea atu: “E te tautala ea faapena i le faitaulaga sili?” Ae ua silafia e Iesu e na te leʻi faia se mea leaga. O lea ua tali atu ai o ia: “Afai ua sesē saʻu upu, ia taʻu mai le mea ua sesē ai, ae afai ua saʻo, aiseā la ua e pō mai ai iā te aʻu?” (Ioane 18:22, 23) Ina ua māeʻa lenā, ona faatonuina lea e Ana ina ia taʻitaʻi atu Iesu iā Kaiafa.

O le taimi lea ua faapotopoto uma ane ai i le maota o Kaiafa, i latou ua faia aʻe ai le Saniterini: o lē o loo avea ma ositaulaga sili, ʻautoeaina o le nuu ma le ʻautusiupu. E tusa ai ma le Tulafono, e lē tatau ona faia se faamasinoga faapea i le pō o le Paseka. Peitaʻi, e lē o taofia ai i latou mai i le faataunuuina o la latou faufauga leaga.

E toetoe lava o sui uma o le Saniterini e tutusa o latou manatu e uiga iā Iesu. Ina ua uma le toe faatūina e Iesu o Lasalo, na filifili le Saniterini e tatau ona fasiotia Iesu. (Ioane 11:47-53) E leʻi leva tele atu foʻi, na taupulepule ai taʻitaʻi lotu e puʻe Iesu ma fasioti o ia. (Mataio 26:3, 4) O le mea moni, e tusa ua leva ona faia e le Saniterini le faaiʻuga e faasalaina Iesu i le oti, a o leʻi faia lona faamasinoga.

E lē gata e lē faaletulafonoina lenei feiloaʻiga, ae ua taumafai foʻi le ʻaufaitaulaga sili ma isi o le Saniterini e saʻili mai ni molimau, ina ia avatu ni faamatalaga sesē ma maua ai se mea e molia ai Iesu. Ua latou maua le toʻatele o molimau, peitaʻi, e lē tutusa a latou faamatalaga. Mulimuli ane, ua ō mai ni molimau se toʻalua ma taʻutino atu: “Na matou faalogo na faapea mai o ia, ʻOu te talaina i lalo lenei malumalu na faia e lima, ma ou te toe fausia i aso e tolu se isi malumalu e lē faia e lima.’” (Mareko 14:58) Peitaʻi, e lē tutusa foʻi molimau a i laʻua nei.

Ua fesili atu Kaiafa iā Iesu: “Aiseā ua e lē tali mai ai? O le ā lenei mea ua latou molia ai oe?” (Mareko 14:60) Ua lē tali atu Iesu e tusa ai o nei moliaga sesē ua faia e tagata e lē tutusa a latou faamatalaga. O lea, ua sui ai e le ositaulaga sili o Kaiafa se isi auala e faaaogā.

Ua iloa e Kaiafa e matuā lē fiafia lava tagata Iutaia i se tasi e faapea mai o ia o le Alo o le Atua. I se taimi muamua atu, na faapea atu ai Iesu o le Atua o lona Tamā. O lea, na mananaʻo ai tagata Iutaia e fasioti o ia, ona ua latou faapea ane ʻua ia faatutusa o ia ma le Atua.’ (Ioane 5:17, 18; 10:31-39) O le iloaina e Kaiafa o nei mea, ua ia faatonuina ai Iesu: “Ou te fai atu iā te oe, ia e tautō i le Atua soifua e te tautala i le mea moni, ma taʻu mai iā i matou po o oe o le Keriso, le Alo o le Atua!” (Mataio 26:63) O le mea moni, sa faailoa atu e Iesu o ia o le Alo o le Atua. (Ioane 3:18; 5:25; 11:4) Pe afai la e na te lē faailoa atu lenā mea i le taimi lenei, e ono foliga atu ai ua ia teena o ia o le Alo o le Atua ma o le Keriso. O lea ua fetalai atu ai Iesu: “O lea lava; ma o le a outou vāai i le Atalii o le tagata o loo nofo i le itu taumatau o Lē e Malosi, ma e sau foʻi o ia i ao o le lagi.”—Mareko 14:62.

O le taimi lava lea ua saeia ai e Kaiafa ona ofu tele, ma faapea atu: “Ua upuleaga o ia i le Atua! O le ā le aogā o nisi molimau iā i tatou? O lenā ua outou faafofoga i ana upuleaga i le Atua. O le ā so outou finagalo?” Ua faia e le Saniterini se faamasinoga e lē tonu e ala i le tali mai: “E tatau ona oti o ia.”—Mataio 26:65, 66.

O lea ua latou tauemu ai iā Iesu ma tatuʻi o ia. Ua tapō e isi ona foliga ma tuufeanu iā te ia. Ua latou ufiufi foʻi i ona fofoga ma tapō o ia, ma faapea atu faaʻamuʻamu: “Afai o oe o se perofeta, ia taʻu mai po o ai na ia pō atu iā te oe?” (Luka 22:64) Pagā le leaga o le auala ua faileagaina ai le Alo o le Atua, i lenei faamasinoga ua faia i le pō o le Paseka, o se taimi e lē tusa ai ma le tulafono!