Skip to content

Skip to secondary menu

Skip to table of contents

Molimau a Ieova

Faa-Samoa

Iesu—Le Ala, le Upu Moni ma le Ola

 MATAUPU 113

Se Lesona i le Galue Mamafa Mai i le Talafaatusa i Taleni

Se Lesona i le Galue Mamafa Mai i le Talafaatusa i Taleni

MATAIO 25:14-30

  • UA FAAMATALA E IESU LE TALAFAATUSA I TALENI

Ua toe faamatala atu e Iesu se isi talafaatusa i ona aposetolo e toʻafā, a o latou iai i luga o le mauga o Olive. I ni nai aso na muamua atu a o iai o ia i Ieriko, na ia faamatala ai le talafaatusa e faatatau i mina, e faaalia ai e umi se taimi ona faatoʻā faavae lea o le Malo. Ae o le talafaatusa lea ua faamatalaina atu nei e Iesu, e tele vala e talitutusa ai ma le talafaatusa e faatatau i mina. O se vaega lenā o lana tali i le fesili e faatatau i lona faatasi mai, ma le taufaaiʻuiʻuga o lenei faiga o mea. Ua faamatilatila ai le tatau i ona soo ona galulue mamafa e tusa ai ma mea ua tuuina atu iā i latou.

Ua amata le faamatalaga a Iesu e faapea: “E pei lava o le tagata na faimalaga i nuu mamao, na ia aami ana pologa ma tuuina atu iā i latou ana mea.” (Mataio 25:14) Talu ai ua uma ona faatusaina e Iesu o ia i le tamāloa na alu malaga “ina ia fai o ia ma tupu,” ua faigofie foʻi la ona iloa e aposetolo o loo faasino atu iā te ia le “tagata” o loo taʻua i le talafaatusa.—Luka 19:12.

A o leʻi alu malaga le tagata o loo i le talafaatusa, ua ia tuuina atu i ana pologa ana ʻoa tautele. A o faagasolo le tolu ma le ʻafa tausaga o le faiva a Iesu, na ia taulaʻi atu i le talaʻia o le tala lelei o le Malo o le Atua, ma sa ia toleniina ona soo ina ia faia lenei galuega. O lea, e alu o ia ma le mautinoa o le a faaauau pea ona faia e ona soo le galuega talaʻi.—Mataio 10:7; Luka 10:1, 8, 9; faatusatusa i le Ioane 4:38; 14:12.

Ua faapefea ona tufatufaina atu e le tagata i le talafaatusa ana mea? Ua faamatala e Iesu: “Na ia avatu taleni e lima i le tasi, ae lua i le tasi, ma le tasi i le isi, ua faatatau i le mea e mafaia e le tagata, ona ia malaga lea i nuu mamao.” (Mataio 25:15) O le ā o le a faia e nei pologa i mea ua tuuina atu iā i latou? Po o le a latou galulue mamafa e faaaogā nei mea mo le lelei o lo latou matai? Ua fetalai atu Iesu i aposetolo e toʻafā:

“Ona alu loa lea o lē na avatu i ai taleni e lima ma faaaogā i se pisinisi, ma maua mai ai isi taleni e lima. E faapena foʻi lē na avatu i ai taleni e lua, na maua mai ai le isi lua. A o lē na avatu i ai le taleni e tasi, na alu o ia ma eli le palapala ma nanā ai le tupe siliva a lona matai.” (Mataio 25:16-18) O le ā o le a tupu pe a toe foʻi mai le matai?

Ua faaauau le faamatalaga a Iesu e faapea: “Ina ua mavae se taimi umi, ona sau ai lea o le matai o na pologa ina ia toe totogi atu ana tupe na iā i latou.” (Mataio 25:19) Sa filigā ma galulue mamafa pologa muamua e toʻalua, e faaaogā taleni na tuuina atu iā i laʻua e tusa ai o “le mea e mafaia e le tagata,” ma sa iai iʻuga lelei o a la galuega. Sa galue malosi lē na tuuina atu i ai taleni e lima, ma na ia maua mai ai isi taleni e lima. E faapena foʻi i le pologa sa tuuina atu i ai taleni e lua. Sa galue malosi o ia ma toe maua mai ai isi taleni e lua. (I na aso, e pe ā ma le 19 tausaga e tatau ona galue ai se tagata ina ia maua le totogi e tutusa ma le taleni e tasi.) E tutusa le faamālō ua avatu e le matai i pologa nei e toʻalua: “Malo lava le pologa lelei ma le faamaoni! Na e faamaoni i mea iti, ou te tofia oe e vaaia mea e tele. Inā olioli ia faatasi ma lou matai.”—Mataio 25:21.

Ae e ese mai ai la le pologa lea na tuuina atu i ai le taleni e tasi. Ua ia faapea atu i lona matai: “Lau susuga e, na ou iloa o oe o se tagata e tagisā, ua e selesele i mea e te leʻi lūlūina, ma ua e aoaoina mea e te leʻi faataapeapeina. O le mea lea, na ou fefe ai ma ou alu atu ma nanā lau taleni i le palapala. Ia, o lau taleni lea.” (Mataio 25:24, 25) E leʻi avatu foʻi e lenei pologa le tupe e teuina e le ʻau teutupe, ina ia maua mai ai se polofiti mo lona matai. O le mea moni, e leʻi galue mamafa lenei pologa mo le lelei o lona matai.

Ua talafeagai la ona taʻua o ia e lona matai o “le pologa leaga ma le paiē.” Ua aveese mai iā te ia le taleni, ma avatu i le pologa lea na lotomalie e galue mamafa. Ua faailoa atu nei e le matai lana faatulagaga e faapea: “O lē e iai mea, e tuuina atu iā te ia isi mea ina ia atili ai ona tele o ana mea; a o lē e leai ni ana mea, e aveesea mea ua iā te ia.”—Mataio 25:26, 29.

E tele mea ua tatau ona manatunatu loloto i ai soo o Iesu, e aofia ai foʻi ma lenei talafaatusa. Ua mafai ai ona latou iloa, o le faaeaga tautele ua ia tuuina atu iā i latou o le faia o isi ma soo, o se vala e sili ona tāua ma aogā. E faatalitalia foʻi la e Iesu o le a latou galulue malolosi i le faataunuuina o lenei faaeaga. E silafia e Iesu e lē tutusa mea e mafai ona faia e tagata, a o latou faataunuuina le galuega talaʻi. E pei ona taʻua i le talafaatusa, e galue le tagata e tusa ai o ʻle mea e na te mafaia.’ E lē o le uiga o lenei faamatalaga e faapea, e fiafia Iesu pe a “paiē” se tasi ma lē faia ai le mea e na te mafaia i le faateleina o mea a lona Matai.

Maʻeu le matuā fiafia o aposetolo i le faamautinoaga lenei: “O lē e iai mea, e tuuina atu iā te ia isi mea”!

Faitau Atili

LE OLOMATAMATA (LOMIGA MO SU‘ESU‘EGA)

Lesona Mai i le Talafaatusa i Taleni

O lenei mataupu ua toe fetuunaʻi ai lo tatou malamalamaga i le talafaatusa i taleni.