Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

Iesu—Le Ala, le Upu Moni ma le Ola

 MATAUPU 104

Po o le a Faatuatua Tagata Iutaia i le Atua?

Po o le a Faatuatua Tagata Iutaia i le Atua?

IOANE 12:28-50

  • UA FAALOGO LE TOʻATELE I LE SIʻUFOFOGA O LE ATUA

  • LE FAAVAE MO LE FAAMASINOINA O TAGATA

O loo iai Iesu i le malumalu i le Aso Gafua, Nisani 10, ma ua ia fetalai atu e faatatau i lona maliu lea ua toeitiiti oo i ai. O lona manatu mamafa i le aafiaga o le a iai i le suafa o le Atua, ua ia fetalai atu ai: “Loʻu Tamā e, ia faamamaluina lou suafa.” Ua tali mai se siʻufofoga malosi mai i le lagi: “Ua ou faamamaluina loʻu igoa, ma ou toe faamamaluina ai.”—Ioane 12:27, 28.

Ua lē mautonu tagata o loo tutū ai i inā. Ua manatu nisi o se faititili lea ua latou faalogoina. Ae ua faapea ane nisi: “O se agelu lea ua fetalai mai iā te ia.” (Ioane 12:29) Peitaʻi, o le siʻufofoga o Ieova lea ua sau mai i le lagi. E lē o le taimi muamua lea ua faalogo ai tagata i le siʻufofoga o le Atua o fetalai mai e faatatau iā Iesu.

I le tolu ma le ʻafa tausaga ua mavae i le papatisoga o Iesu, na faalogo ai Ioane le Papatiso o fetalai mai le Atua e uiga iā Iesu e faapea: “O loʻu Atalii pele lenā, o lē ua malie i ai loʻu loto.” Mulimuli ane ina ua mavae le Paseka i le 32 T.A., sa faaliliuina faavavega ai Iesu i luma o Iakopo, Ioane ma Peteru. Na faalogo i latou i le siʻufofoga o le Atua o fetalai mai: “O loʻu Atalii pele lenā, o lē ua malie i ai loʻu loto; ia faalogo iā te ia.” (Mataio 3:17; 17:5) Ae o le taimi la lenei, o lea ua fetalai mai Ieova i se auala ua mafai ona faalogo i ai le toʻatele o tagata.

Ua fetalai atu Iesu: “Ua oo mai lenei siʻufofoga e lē ona o aʻu, ae ona o outou.” (Ioane 12:30) O le faamaoniga lea e iloa ai o Iesu o le Alo moni lava lea o le Atua, ma o ia o le Mesia na valoia.

O le soifuaga faamaoni o Iesu, ua faataʻitaʻia mai ai le auala e tatau ona ola ai tagata, ma faamautinoa mai ai e tatau ona faaumatia Satani le Tiapolo le pule o le lalolagi. Ua fetalai atu Iesu: “O lenei, ua faamasinoina le lalolagi, ma o le a tuliesea le pule o lenei lalolagi.” O le a avea le maliu o Iesu o se manumalo nai lo o se toʻilalo. I le ā le itu? Ua ia fetalai atu: “Afai e siitia aʻu mai i le eleele, o le a tosina mai tagata eseese iā te aʻu.” (Ioane 12:31, 32) O le maliu o Iesu i luga o le laau, o le a tosina atu ai tagata iā te ia ma tatala ai le avanoa mo le ola e faavavau.

E tusa ai o le fetalaiga a Iesu e faatatau i le “siitia,” ua tali atu le motu o tagata e faapea: “Ua matou faalogo i le Tulafono e faapea, e tumau e faavavau le Keriso; ae faapefea ona e fai mai e tatau ona siitia i luga le Atalii o le tagata? O ai lenei Atalii o le tagata?” (Ioane 12:34) E ui i faamaoniga uma e aofia ai ma le faalogoina o le siʻufofoga o le Atua, ae e toetoe o tagata uma e lē o taliaina Iesu o ia moni o le Atalii o le tagata, le Mesia na folafolaina mai.

E pei ona sa ia faia i le taimi ua teʻa, ua fetalai Iesu o ia “o le malamalama.” (Ioane 8:12; 9:5) Ua ʻaiʻoi atu o ia i le motu o tagata: ʻO le a iai iā te outou le malamalama mo sina taimi. Ia outou savavali a o iā te outou le malamalama, ina neʻi manumalo le pōuliuli iā te outou. Inā faatuatua ia i le malamalama manū o iā te outou le malamalama, ina ia avea outou ma atalii o le malamalama.’ (Ioane 12:35, 36) Mulimuli ane, ona alu ese ai lea o Iesu mai i inā auā e lē o Nisani 10 le aso e tatau ona maliu ai o ia. O le Paseka iā Nisani 14 e tatau ona “siitia” pe tutuʻiina ai o ia i luga o le laau.—Kalatia 3:13.

Pe a toe tomānatu i le faiva a Iesu, ua manino mai ai le faataunuuga o valoaga ina ua lē faatuatua tagata Iutaia iā Iesu. Na valoia e Isaia o le a faatauasoina mata o tagata ma faamaaaina o latou loto, lea ua lē mafai ai ona latou liliu atu ma faamālōlōina ai i latou. (Isaia 6:10; Ioane 12:40) O le mea moni, e toetoe o tagata Iutaia uma e mumusu e talitonu o Iesu o lē na folafolaina mai e Laveaʻia i latou, ma o le ala lea i le ola.

Peitaʻi, “ua faatuatua” Nikotemo, Iosefa mai i Arimataia ma le toʻatele o isi taʻitaʻi iā Iesu. Ae po o le a latou gaoioi e tusa ai ma lo latou faatuatua pe e leai, ona o lo latou fefefe ina neʻi tutuliesea i latou mai i le sunako, pe ona o lo latou “naunau i le viiga mai i tagata”?—Ioane 12:42, 43.

Ua faamatala e Iesu mea e aofia ai i le faatuatua iā te ia: “O lē e faatuatua mai iā te aʻu, e lē na o aʻu ua faatuatua i ai, a o lē na auina mai aʻu; ma o lē ua vaai mai iā te aʻu, ua vaai foʻi o ia i lē na auina mai aʻu.” O le tāua tele o upu moni na faatonu e le Atua Iesu e aʻoaʻo atu ma o loo faaauau pea ona ia aʻoaʻoina atu, ua mafai ai ona ia fetalai atu e faapea: “O sē e manatu māmā iā te aʻu ma e lē talia aʻu upu, e iai lē e na te faamasinoina o ia. O le upu ua ou fai atu ai, e faamasinoina ai o ia i le aso mulimuli.”—Ioane 12:44, 45, 48.

Ona faaiʻu lea o upu a Iesu e faapea: “Ou te lē tautala atu i oʻu lava manatu, a o le Tamā o lē na auina mai aʻu, ua ia tuuina mai le poloaʻiga e tusa ma le mea e taʻu atu ma tautala atu ai. Ua ou iloa foʻi, o lana poloaʻiga o le ola lea e faavavau.” (Ioane 12:49, 50) Ua silafia e Iesu e lē o toe umi ona faamaligiina lea o lona lava toto, e fai ma taulaga mo tagata e faaalia le faatuatua iā te ia.—Roma 5:8, 9.