Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

Iesu—Le Ala, le Upu Moni ma le Ola

 MATAUPU 109

Ua Taʻusalaina Taʻitaʻi Lotu Tetee

Ua Taʻusalaina Taʻitaʻi Lotu Tetee

MATAIO 22:41–23:24 MAREKO 12:35-40 LUKA 20:41-47

  • O SE ATALII O AI LE KERISO?

  • UA FAAALIALIA E IESU UIGA FAAFIAAMIOTONU O Ē TETEE

Ua lē taulau taumafaiga a taʻitaʻi lotu tetee e taʻuleagaina Iesu, pe maileia foʻi o ia i ana upu ma molia ai o ia i le kovana o Roma. (Luka 20:20) O loo iai pea Iesu i le malumalu iā Nisani 11, ma ua ia suia nei le tulaga o mea ma faailoa atu po o ai moni o ia. Ua tausolomua o ia i le fesili atu: “O le ā so outou manatu i le Keriso, o se atalii o ai?” (Mataio 22:42) Ua iloa e le toʻatele o le Keriso po o le Mesia e tupuga mai iā Tavita. O lea, ua latou tali atu ai o le Keriso o le Alo o Tavita.—Mataio 9:27; 12:23; Ioane 7:42.

Ua fesili atu Iesu: “E faapefea la ona taʻua o ia e Tavita o le ʻAlii’ ina ua osofia e le agaga, ma faapea mai, ʻUa fetalai ane Ieova i loʻu Alii: “Ia e nofo i loʻu itu taumatau seʻia oʻu tuuina ou fili i lalo o ou vae”’? Afai la na taʻua o ia e Tavita o le ʻAlii,’ e faapefea la ona avea o ia ma ona atalii?”—Mataio 22:43-45.

Ua lē magagana le ʻau Faresaio, auā o loo latou faatalitali i se pule faaletagata e tupuga mai iā Tavita, ma atonu o le a ia faasaʻolotoina i latou mai i le pulega a Roma. Peitaʻi, ua taʻua e Iesu upu a Tavita o loo i le Salamo 110:1, 2, lea e faamaonia mai ai o le Mesia e lē o se pule faaletagata, ae o ia o lē na taʻua e Tavita o lona Alii. Pe a māeʻa ona nofo o ia i le itu taumatau o le Atua, ona pule loa lea o ia. O le faamatalaga ua avatu e Iesu, ua matuā lē iloa ai e tagata tetee le auala e tali ane ai.

O loo faalogologo atu le ʻausoo ma le toʻatele o isi tagata iā Iesu. Ua taulaʻi atu nei Iesu iā i latou, ma lapataʻi atu e faatatau i le ʻautusiupu ma le ʻau Faresaio. ʻUa nonofo nei tane i le nofoa o Mose’ ma aʻoaʻo atu le Tulafono a le Atua. Ua timaʻi atu Iesu i lana ʻaufaalogologo: “O mea uma latou te fai atu ai iā te outou, ia outou faia ma tausi i ai, ae aua tou te faaaʻoaʻo i mea o loo latou faia, auā ua latou fai atu, ae latou te lē faia.”—Mataio 23:2, 3.

Ona avatu lea e Iesu o ni faaaʻoaʻoga e faatatau i o latou uiga faafiaamiotonu: “Ua latou faatetelē tamaʻi pusa e tuu ai tusitusiga paia ia e fusi i o latou tino, ina ia puipuia ai i latou.” E fusi e nisi o tagata Iutaia i o latou muāulu po o o latou ogālima nei tamaʻi pusa, lea o loo iai tusitusiga mai i le Tulafono. Ua faatetelē e le ʻau Faresaio nei pusa, ina ia manatu ai isi o i latou o ni tagata e maelega i le Tulafono. E latou te “faalautetele foʻi fele i pito o latou ofu.” Sa tatau ona faia e tagata Isaraelu ni fele i pito o o latou ofu. Ae na faamautinoa e le ʻau Faresaio e tetelē atu fele o o latou ofu. (Numera 15:38-40) Ua latou faia nei mea uma “ona o le vaaiga a tagata.”—Mataio 23:5.

E ono aafia foʻi soo o Iesu i lenei faanaunauga ina ia maua ni tulaga aloaʻia. O lea ua fautua atu ai Iesu: “Aua neʻi taʻua outou o Aʻoaʻo, auā e toʻatasi lo outou aʻoaʻo, auā o le ʻauuso uma outou. Aua foʻi neʻi taʻua se tasi i le lalolagi o lo outou tamā, auā e toʻatasi lo outou Tamā o Lē o i le lagi. Aua foʻi neʻi taʻua outou o ʻtaʻitaʻi,’ auā e toʻatasi lo outou Taʻitaʻi o le Keriso lea.” O le ā tonu la le auala e tatau ona manatu ma gaoioi ai le ʻausoo? Ua fetalai atu Iesu: “O lē sili iā te outou uma, e ao ona avea ma a outou auauna. O sē na te faaeaina o ia lava, e faamaulaloina lea, ae o sē e faamaulalo iā te ia lava, e faaeaina o ia.”—Mataio 23:8-12.

Ua sosoo nei ma le faailoa atu e Iesu o malaia o le a oo i le ʻautusiupu ma le ʻau Faresaio faafiaamiotonu: “Oi talofa iā te outou le ʻautusiupu ma le ʻau Faresaio faafiaamiotonu! auā ua outou punitia le malo o le lagi i tagata, auā e tou te lē ulu atu lava i ai, ma ua outou taofiofia foʻi o ē e ulu atu i ai.”—Mataio 23:13.

Ua taʻusalaina e Iesu le ʻau Faresaio ona o lo latou faatalalē i mea e sili ona tāua i le silafaga a Ieova, e pei ona faaalia mai i filifiliga ua latou faia lea e lē faavaeina mai i mataupu silisili. O se faataʻitaʻiga, e latou te faapea mai: “E lē afāina pe a tautō se tasi i le malumalu; peitaʻi a tautō se tasi i le auro i le malumalu, e tatau la ona ia faataunuuina.” Ua faaalia ai i inei lo latou tauaso faaleagaga, auā ua sili atu ona latou faatāua le auro i le malumalu, nai lo o le mea moni e faapea, o le nofoaga lea e tapuaʻi atu ai iā Ieova ma faalatalata atu ai iā te ia. ʻUa latou manatu māmā foʻi i mataupu e matuā tāua o le Tulafono, e pei o le faia o mea tonu, o le alofa mutimutivale, ma le faamaoni.’—Mataio 23:16, 23; Luka 11:42.

Ua taʻua e Iesu nei Faresaio o ʻtaʻitaʻi tauaso, o ē ua vai mamā ese le namu ae folo atoa le kamela.’ (Mataio 23:24) E latou te vai mamā ese le namu mai i a latou uaina, auā o lenei iniseti e lē mamā e tusa ai ma le Tulafono. Ae o lo latou manatu māmā i mataupu e matuā tāua o le Tulafono, ua peiseaʻī ai ua latou folo atoa le kamela, o se manu e lē mamā foʻi e tusa ai ma le Tulafono, ae e sili atu ona telē.—Levitiko 11:4, 21-24.

Faitau Atili

O Iesu Keriso, le Mesia na Folafolaina Mai

Na faataunuu uma e Iesu valoaga a le Tusi Paia e faatatau i le Mesia. Iloilo i lau lava Tusi Paia e faamaonia ai pe na faataunuuina faamatalaga auʻiliʻili uma o nei valoaga.