Skip to content

Skip to secondary menu

Skip to table of contents

Molimau a Ieova

Faa-Samoa

Iesu—Le Ala, le Upu Moni ma le Ola

 MATAUPU 20

O le Vavega Lona Lua a o Iai i Kana

O le Vavega Lona Lua a o Iai i Kana

MAREKO 1:14, 15 LUKA 4:14, 15 IOANE 4:43-54

  • UA TALAʻI ATU E IESU “UA LATALATA MAI LE MALO O LE ATUA”

  • UA FAAMĀLŌLŌINA E IESU LE ATALII O SE AUAUNA A LE TUPU I KAPANAUMI A O IAI O IA I KANA

Ua toe foʻi atu nei Iesu i lona nuu, ina ua mavae aso e lua o iai i Samaria. E tele le taimi na ia faaaluina e talaʻi ai i Iutaia, ma e tele foʻi oganuu na mafai ona ia oo atu i ai. A o lea ua ia toe foʻi atu nei i Kalilaia lea na ola aʻe ai, e lē ina ia mālōlō ae ina ia amata ai se isi galuega e sili atu lona tāua. Ua faatalitalia e Iesu o le a lē talileleia o ia, auā na ia fetalai: “E lē mamalu se perofeta i lona lava nuu.” (Ioane 4:44) E leʻi faatasi pea Iesu ma ona soo, nai lo lea, ua latou toe foʻi atu i o latou aiga ma galuega sa latou faia a o leʻi avea i latou ma soo.

O le ā le feʻau ua amata ona talaʻi atu e Iesu? “Ua latalata mai le malo o le Atua. O lea, ia outou salamō ai, ma ia faatuatua i le tala lelei.” (Mareko 1:15) O le ā le tali mai a tagata? Ua talileleia e le toʻatele o tagata Kalilaia Iesu, ma faamamaluina o ia. Peitaʻi, e lē na o le feʻau a Iesu le māfuaaga ua latou talileleia ai o ia. Na iai foʻi nisi o tagata Kalilaia i le Paseka lea sa faia i Ierusalema, ma na latou vāai ai i faailoga mataʻina sa faia e Iesu.—Ioane 2:23.

O fea le nuu o Kalilaia o le a amata ai le faiva lenei a Iesu? E foliga mai o lea ua amata i Kana, le aai lea sa ia faaliliuina ai le vai e avea ma uaina i se ʻaiga o se faaipoipoga. I le taimi la lenei, ua maua e Iesu se tala e faatatau i se tama talavou o loo matuā tigāina lava ma ua toeitiiti oti. O ia o le atalii o se tasi o auauna a le tupu o Herota Anetipa, lea na mulimuli ane vavaeeseina le ulu o Ioane le Papatiso. Ua faalogo lenei tagata ua tuua e Iesu Iutaia ae agaʻi atu i Kana. O lea, ua ia tuua ai loa lona aiga i Kapanaumi ae malaga atu i Kana e saʻili Iesu. Ua matuā ootia lenei tamāloa i le faanoanoa, ma ua ia augani atu iā Iesu: “Le Alii e, maliu ifo ia a o leʻi oti si oʻu atalii.”—Ioane 4:49.

Ua maofa le tamāloa ina ua tali atu Iesu e faapea: “Inā alu ia, ua ola lou atalii.” (Ioane 4:50) Ua talitonu lenei tamāloa i upu ua fetalai atu ai Iesu, ma ua toe foʻi i lona aiga. A o alu atu o ia, ua faafetaui o ia e ana pologa ma taʻu atu iā te ia se tala fiafia e faapea, ua ola lona atalii. Ua fesili atu le tamāloa iā i latou, po o le ā tonu le taimi na toe malosi ai o ia.

Ua latou tali mai: “O ananafi i le itula e fitu na teʻa ai lona fiva.”—Ioane 4:52.

Ua iloa e le tamāloa, o le itula tonu lava lea na fetalai atu ai Iesu: “Ua ola lou atalii.” O le iʻuga, ua talitonu lenei tamāloa mauʻoa, ma ua avea o ia ma i latou uma o i lona aiga ma soo o Keriso.

Ua lua nei vavega ua faia e Iesu i Kana. O le faaliliuina o le vai e avea ma uaina, ma le faamālōlōina o se tama talavou mai i se isi nofoaga pe tusa ma le 16 maila (26 km) le mamao. E lē na o le pau ai lea o vavega ua faia e Iesu. Peitaʻi, o se vavega mataʻina lona faamālōlōina o lenei talavou, ona ua faailoga ai lona toe foʻi mai i Kalilaia. Ua manino mai ai foʻi, o ia o se perofeta ua tofia e le Atua. Ae o le ā le umi e ʻfaamamaluina ai lenei perofeta i lona lava nuu’?

O le a manino lenā vala, a o toe foʻi Iesu i Nasareta. O le ā o le a tupu iā te ia i inā?