Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

Iesu—Le Ala, le Upu Moni ma le Ola

 MATAUPU 41

O le Mana o Ai ua Faia ai Vavega?

O le Mana o Ai ua Faia ai Vavega?

MATAIO 12:22-32 MAREKO 3:19-30 LUKA 8:1-3

  • UA AMATA LE TALAʻIGA FAATAAMILO LONA LUA A IESU

  • TULIESEA TEMONI

  • LAPATAʻIGA E FAATATAU I LE AGASALA E LĒ MAFAI ONA FAAMAGALOINA

E leʻi umi talu ona mavae atu le taimi na talanoa ai Iesu e faatatau i le lotofaamagalo, a o iai i le fale o Simona le Faresaio, ae amata loa lana talaʻiga faataamilo lona lua i Kalilaia. Ua faasolo nei i le lua tausaga o faia le faiva a Iesu, ma o loo faatasi ma ia ona aposetolo e toʻa 12, faapea nisi o fafine “na ia faamālōlōina mai agaga leaga ma maʻi.” (Luka 8:2) E aofia ai iā i latou nei Maria le Makatala, o Susana, ma Ioana le avā a se tasi o alii tāua a le tupu o Herota Anetipa.

A o faasolo ina tele mea ua aʻoaʻoina e tagata e faatatau iā Iesu, o le faateteleina foʻi lenā o fefinauaʻiga e faatatau i ana galuega. Ua faamaonia le moni o lenā mea, ina ua faamālōlōina e Iesu se tamāloa e tauaso ma gūgū ma ua uluitinoina foʻi e temoni. Ua tuliesea nei le temoni, ma ua mafai e le tamāloa ona toe pupula ma tautala. Ua maofa tagata ma latou faapea ane: “Pe lē o le Atalii ea lenei o Tavita?”—Mataio 12:23.

Ua potopoto mai nei le motu o tagata i le fale o loo iai Iesu, ma ona o lo latou toʻatele ua lē mafai ai ona aai Iesu ma ona soo. Peitaʻi, e lē o tagata uma e manatu o Iesu o le ʻAtalii lea o Tavita’ na folafolaina mai. Ua malaga mamao mai nisi o tusiupu ma le ʻau Faresaio mai i Ierusalema, e lē ina ia aʻoaʻoina i latou e Iesu pe lagolagoina o ia. Nai lo lea, ua latou taʻu atu i tagata ʻua iā Iesu Pelesepulo’ lea “ua mafai ai ona ia tutuli temoni.” (Mareko 3:22) Ina ua faalogo le aiga o Iesu i le mea ua tupu, ona latou ō mai ai lea ma taumafai e puʻe iā te ia. Aiseā?

Manatua foʻi, e oo lava i uso o Iesu e latou te lē o talitonu o ia o le Alo o le Atua. (Ioane 7:5) E lē o Iesu lea sa latou iloa ma feola faatasi aʻe i Nasareta. Ua latou faapea ane: “Ua faalētonu lona mafaufau.”—Mareko 3:21.

Ae o le ā ua faaalia mai i faamaoniga? O lea faatoʻā uma ona faamālōlōina e Iesu se tamāloa na uluitinoina e temoni, ma ua mafai ona toe pupula ma tautala. E lē mafai ona faapea atu e leʻi tupu moni lenā mea. O lea, o loo taumafai le ʻautusiupu ma le ʻau Faresaio e taʻuleagaina Iesu e ala i tuuaʻiga sesē. Ua latou faapea atu i tagata: “O Pelesepulo le pule o temoni ua mafai ai ona tutuli e lenei tagata o temoni.”—Mataio 12:24.

Ua silafia lelei e Iesu manatunatuga o le ʻautusiupu ma le ʻau Faresaio. O le māfuaaga lea ua ia fetalai atu ai: “E faaumatia malo uma e fevaevaeaʻi, ma e lē tumau foʻi aai uma po o aiga e fevaevaeaʻi. E faapea foʻi Satani, afai e tulia e ia o ia lava, ua fevaevaeaʻi o ia, e faapefea la ona tumau o lona malo?”—Mataio 12:25, 26.

Maʻeu le talafeagai o lenā faamatalaga. E iloa lelei e le ʻau Faresaio, o loo tutuliese foʻi e nisi o tagata Iutaia temoni. (Galuega 19:13) O lea, ua fesili atu ai Iesu: “Afai o Pelesepulo ua ou tulia ai temoni, o ai la ua tulia ai e o outou atalii temoni?” I nisi faaupuga, e faatatau atu foʻi iā i latou le tuuaʻiga ua latou faia. Ua toe faalautele atu e Iesu le manatu: “Pe afai ou te tulia temoni ona o le agaga o le Atua, ua oo mai lava iā te outou le malo o le Atua.”—Mataio 12:27, 28.

Ina ia faamaonia o lona tuliesea o temoni ua faaalia ai le sili atu o lona mana nai lo o Satani, ua faamatala atu ai e Iesu se talafaatusa: “E faapefea ona osofaʻia le fale o se tagata malosi ma ave ana meatotino, ae e leʻi fusifusia muamua o ia? Ona faatoʻā mafai ai lea ona ave o ana mea uma mai i lona fale. O sē e lē ʻau ma aʻu, e tetee mai iā te aʻu. O sē e lē faapotopoto faatasi ma aʻu, e faataapeape o ia.” (Mataio 12:29, 30) Ua matuā manino lava le tetee o le ʻautusiupu ma le ʻau Faresaio iā Iesu, ma ua faamaonia ai o i latou o sui o Satani. O loo latou faataapeapeina tagata ma faaliliuese i latou mai le Alo o le Atua, o lē o loo lagolagoina e le Atua.

Ua lapataʻi atu Iesu i nei tagata tetee: “E faamagaloina lava agasala uma a le fanau a tagata, atoa ma upuleaga ua latou upuleaga ai. Peitaʻi, o se tasi e fai upuleaga i le agaga paia, e lē faamagaloina lava o ia e faavavau, ae e nofosala o ia e faavavau i lenā agasala.” (Mareko 3:28, 29) O le agaga paia o le Atua na mafai ai e Iesu ona tutuli temoni, ae ua latou faapea mai o le mana o Satani na māfua ai. Seʻi manatu i le uiga o lenā mea mo i latou o loo tetee iā Iesu.