Skip to content

Skip to secondary menu

Skip to table of contents

Molimau a Ieova

Faa-Samoa

Iesu—Le Ala, le Upu Moni ma le Ola

 MATAUPU 31

Tauina o Saito i le Sapati

Tauina o Saito i le Sapati

MATAIO 12:1-8 MAREKO 2:23-28 LUKA 6:1-5

  • UA TAU E LE ʻAUSOO SAITO I LE SAPATI

  • O IESU O LE “ALII O LE SAPATI”

Ua oo nei i le vaitaimi o le tausaga e fua ai saito, ma ua malaga atu nei Iesu ma ona soo i le itu i mātū e agaʻi i Kalilaia. O le fia aai tele o soo o Iesu, ua latou tauina mai ai fuifui saito o loo i le fanua ma aai ai. Peitaʻi, o le aso o le Sapati lea o loo latou faia ai lenei gaoioiga, ma ua iloa atu i latou e le ʻau Faresaio.

Manatua foʻi, e iai tagata Iutaia i Ierusalema sa mananaʻo e fasioti Iesu, ma molia o ia i le solia o le Sapati. Ae o lea ua molia e le ʻau Faresaio le ʻausoo ona o la latou gaoioiga ua fai. Ua latou faapea atu iā Iesu: “Faauta! Ua faia e ou soo le mea e sā i le sapati.”—Mataio 12:2.

I le manatu o le ʻau Faresaio, o le tauina o saito ma mili i o latou lima e tutusa lea ma le seleseleina ma le soliina o saito. (Esoto 34:21) E tatau ona avea le Sapati o se taimi e fiafia ma faalaeiauina ai. Peitaʻi, ona o lo latou faamamafa naʻuā i o latou lava manatu o galuega e faasā i le Sapati, ua avea ai ma avega mamafa lenā aso. Ua faamaonia e Iesu le sesē o o latou manatu, i le avatu o faaaʻoaʻoga e faaalia ai e leʻi finagalo Ieova e tausia le Sapati i lenā auala.

O se tasi o faaaʻoaʻoga, o Tavita ma tagata sa latou faatasi. Ina ua latou fia aai, sa latou ō ane i le faleʻie paia ma aai ai i falaoa sa laulauina i luma o le Atua. O nei falaoa sa aveesea mai i luma o Ieova ae suia i falaoa fou, ma sa tuu ese e aai ai le ʻauositaulaga. Ae ona o tulaga o mea sa iai i lenā taimi, e leʻi taʻusalaina ai Tavita ma tagata sa latou faatasi ona o le aai i na falaoa.—Levitiko 24:5-9; 1 Samuelu 21:1-6.

Ua faamatala atu e Iesu le isi faaaʻoaʻoga e faapea: “Pe e tou te leʻi faitau ea foʻi i le Tulafono, e leʻi faamamaluina e ositaulaga i le malumalu le sapati i aso sapati, ae e leʻi taʻusalaina ai lava i latou?” O lona uiga, o loo faaauau pea ona fasimate e ositaulaga manu e fai ai taulaga, ma faia isi galuega i le malumalu i le Sapati. Ua fetalai Iesu: “Ae ou te fai atu iā te outou, o loo iai i inei se tasi e sili atu i lo le malumalu.” (Mataio 12:5, 6; Numera 28:9) I le avea ai ma ositaulaga sili a le Atua, e mafai e Iesu ona faataunuu lona tofiga e aunoa ma le solia ai o le Sapati.

Ua toe sii atu foʻi e Iesu manatu mai i Tusitusiga Paia e faapea: “Pe ana outou malamalama i le uiga o lenei faaupuga, ʻOu te loto i le alofa mutimutivale ae lē o le taulaga,’ po ua outou lē faasalaina tagata e lē sala.” Ua faaiʻu ana upu e faapea: “Auā o le Alii o le sapati, o le Atalii lea o le tagata.” O loo faasino atu Iesu i le taimi o le a pule ai lona Malo ma le filemu i le afe tausaga.—Mataio 12:7, 8; Hosea 6:6.

Ua loa tausaga o faapologaina e Satani le fanau a tagata, ma ua faatuputeleina faiga sauā ma faiga taua. Ae maʻeu le eseesega o le a iai i le taimi o le pulega a Keriso, lea o le a pei o se Sapati sili. A o faagasolo lenā pulega, o le a aumaia e Keriso le mapusaga ua leva ona tatou moomoo i ai!