Skip to content

Skip to secondary menu

Skip to table of contents

Molimau a Ieova

Faa-Samoa

Iesu—Le Ala, le Upu Moni ma le Ola

 MATAUPU 24

Ua Faateleina Lana Faiva i Kalilaia

Ua Faateleina Lana Faiva i Kalilaia

MATAIO 4:23-25 MAREKO 1:35-39 LUKA 4:42, 43

  • O LE TALAʻIGA FAATAAMILO A IESU MA ONA SOO E TOʻAFĀ I KALILAIA

  • UA ILOA E LE TOʻATELE LE TALAʻIGA MA GALUEGA A IESU

E tele galuega ua faia e Iesu ma ona soo e toʻafā i Kapanaumi. I le afiafi, ua aumaia e tagata Kapanaumi o latou tagata mamaʻi ina ia faamālōlōina e Iesu, ma ua tau lē maua ai se taimi mo ia lava.

Ua oo nei i le taeao e sosoo ai, ua tulaʻi Iesu ma alu i fafo e ui e leʻi malamalama lelei. Ua alu o ia i se nofoaga tuufua ina ia mafai ai ona tatalo atu i lona Tamā. E lē umi se taimi ua iai na o Iesu i inā. Ina ua iloa e “Simona [Peteru] ma i latou ua faatasi ma ia” e lē o iai Iesu, ona latou ō atu lea e saʻili iā te ia. Atonu o Peteru lea o loo taʻitaʻia i latou nei, auā o lona fale lea sa iai Iesu.—Mareko 1:36; Luka 4:38.

Ua latou maua atu Iesu, ona faapea atu lea o Peteru: “O loo saʻili tagata uma iā te oe.” (Mareko 1:37) E mananaʻo tagata Kapanaumi e nofo ai pea Iesu i lo latou nuu. E latou te matuā talisapaia mea ua faia e Iesu, ma o lea ua latou ʻtaumafai ai e taofi o ia ina neʻi alu ese mai iā i latou.’ (Luka 4:42) Ae pe e na o le pau le māfuaaga na afio mai ai Iesu i le lalolagi, ina ia faia faamālōlōga faavavega? Pe e na o le aai o Kapanaumi e tatau ona faia ai lana talaʻiga ma ana vavega? O le ā le fetalaiga a Iesu e faatatau i lenei mea?

Ua faapea atu Iesu i ona soo: “Seʻi tatou ō atu ia i se isi nofoaga, i aai o loo latalata mai, ina ia ou talaʻi atu ai, auā o le mea lea na ou sau ai.” Ua ia fetalai atu foʻi i tagata Kapanaumi: “E tatau ona ou folafola atu le tala lelei o le malo o le Atua i isi foʻi aai, auā o le mea lea na auina mai ai aʻu.”—Mareko 1:38; Luka 4:43.

O se tasi o māfuaaga autū ua afio mai ai Iesu i le lalolagi, o le talaʻi atu lea o le Malo o le Atua. O lenā Malo o le a faapaiaina ai le suafa o lona Tamā, ma aveesea e faavavau faafitauli uma o loo aafia ai tagata. Ua faamaonia e Iesu na auina mai o ia e le Atua, e ala i le faia o faamālōlōga faavavega. E faapena foʻi i senituri na muamua atu, na faia ai e Mose vavega ofoofogia e faamaonia ai na auina mai o ia e le Atua.—Esoto 4:1-9, 30, 31.

Ua tuua nei e Iesu ma ona soo Kapanaumi, ae ō atu i isi aai e talaʻi ai. O nei soo e toʻafā, o Peteru ma lona uso o Aneterea, faapea Ioane ma lona uso o Iakopo. I le vaiaso na muamua atu, na valaaulia ai i latou ina ia avea ma tagata muamua e malaga ma galulue faatasi ma Iesu.

E iai iʻuga lelei o le talaʻiga lenei a Iesu ma ona soo e toʻafā i Kalilaia. Ua salalau atu tala e faatatau iā Iesu i le tele o vaipanoa, ma ʻua oo atu i Suria atoa’ ma aai e sefulu ua taʻua o le Tekapoli, faapea le isi itu o Ioritana. (Mataio 4:24, 25) Ua mulimuli atu iā Iesu ma ona soo le motu o tagata e toʻatele mai i nei vaipanoa, atoa ma tagata mai i Iutaia. E toʻatele ua ō atu iā Iesu ma avatu tagata mamaʻi. Ua fesoasoani atu Iesu e ala i le faamālōlōina o i latou, ma tuliesea temoni mai i ē ua aafia ai.

Faitau Atili

TALIINA O FESILI FAALE-TUSI PAIA

O le ā le Malo o le Atua?

Iloilo pe aiseā e silisili ai le pulega a le Atua nai lo isi pulega uma faaletagata.