Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

Iesu—Le Ala, le Upu Moni ma le Ola

 MATAUPU 27

Ua Valaauina Mataio

Ua Valaauina Mataio

MATAIO 9:9-13 MAREKO 2:13-17 LUKA 5:27-32

  • UA VALAAUINA E IESU MATAIO, LE AOLAFOGA

  • UA FAIFAIMEA FAATASI IESU MA Ē AGASALA E FESOASOANI IĀ I LATOU

Ua mavae sina taimi talu ona faamālōlōina e Iesu le tamāloa na pē le tino, ma o loo iai pea o ia i Kapanaumi lea e lata i le sami o Kalilaia. Ua toe lolofi ane foʻi le motu o tagata ma ua amata ona aʻoaʻo atu Iesu iā i latou. A o savali atu Iesu, ua ia iloa ai Mataio o lē ua igoa foʻi iā Levi, o loo nofo i le ofisa aolafoga. Ua faasafua atu e Iesu iā te ia se valaaulia faapitoa e faapea: “Ia e mulimuli mai iā te aʻu.”—Mataio 9:9.

E foliga mai ua masani lelei Mataio i aʻoaʻoga a Iesu ma galuega sa ia faia i Kapanaumi, e pei foʻi o Peteru, Aneterea, Iakopo ma Ioane. Ua talia foʻi e Mataio le valaaulia, ma e pei ona ia faamatalaina i lana Evagelia, ua ia ʻtū i luga ma mulimuli atu iā Iesu.’ (Mataio 9:9) Ua tuua nei e Mataio lana galuega o se aolafoga, ae avea ma soo o Iesu.

Mulimuli ane, ua faia e Mataio se faigaʻai tele i lona fale, atonu ina ia faailoa atu ai lona talisapaia o lenei valaaulia faapitoa mai iā Iesu. O ai isi tagata ua valaaulia i lenei faigaʻai e ese mai iā Iesu ma ona soo? O loo iai le toʻatele o isi aolafoga sa galulue faatasi ma Mataio. E latou te aoina lafoga mo taʻitaʻi inosia o Roma, lea e aofia ai lafoga mo vaa, lafoga mo oloa e felaʻuaʻi i luga o auala tetele, faapea lafoga mo oloa e aumai i totonu o le atunuu. O le ā le vaaiga a tagata Iutaia i na tagata aolafoga? E latou te ʻinoʻino i ai ona o lo latou lē faamaoni, i le tāpā lea o tupe faasili mai i tagata nai lo o lafoga masani. O loo iai foʻi i le faigaʻai ʻtagata agasala,’ o ē ua iloga i le faia o mea leaga.—Luka 7:37-39.

Ua vāai atu le ʻau Faresaio faafiaamiotonu i lenei mea, ona latou fesili atu lea i soo o Iesu: “Aiseā ua aai faatasi ai lo outou aʻoaʻo ma le ʻauaolafoga ma ē e agasala?” (Mataio 9:11) Ua lagona atu e Iesu a latou faamatalaga, ona ia fetalai atu lea: “E lē manaʻomia e tagata malolosi se fomaʻi, ae na o ē mamaʻi. Ia outou ō ma aʻoaʻoina le uiga o nei upu, ʻOu te loto i le alofa mutimutivale, ae lē o le taulaga.’ Auā ua ou sau e valaau i ē agasala ae lē o ē amiotonu.” (Mataio 9:12, 13; Hosea 6:6) E leʻi faamaoni le ʻau Faresaio ina ua latou taʻua Iesu o le “aʻoaʻo.” E ui i lea, ua mafai ona latou aʻoaʻoina mai iā te ia se mea e faatatau i le faia o le mea tonu.

E foliga mai ua valaaulia e Mataio le ʻauaolafoga ma tagata agasala i lona fale, ina ia mafai ai ona latou faalogologo iā Iesu ma maua ai le faamālōlōga faaleagaga, ʻma o le toʻatele o i latou ua amata ona mulimuli atu iā te ia.’ (Mareko 2:15) E finagalo Iesu e fesoasoani iā i latou e maua se faiā lelei ma le Atua, ma e leʻi ʻinoʻino iā i latou e pei o le ʻau Faresaio faafiaamiotonu. Nai lo lea, ua uunaʻia o ia e lona tigā alofa ma lona alofa mutimutivale, e avea ai o se fomaʻi faaleagaga mo i latou uma o loo mamaʻi faaleagaga.

Ua faaalia e Iesu le alofa mutimutivale i le ʻauaolafoga ma tagata agasala, e faailoa atu ai ona faalogona māfana e pei ona ia faaalia i tagata mamaʻi, ae e lē faapea ai ua ia lē amanaʻia a latou agasala. Manatua foʻi le faaaʻoaʻoga i le tagata lepela. O le tigā alofa o Iesu na ia paʻi atu ai i le tamāloa lepela ma fetalai atu: “Ou te loto i ai. Inā mamā ia oe.” (Mataio 8:3) Pe e lē tatau foʻi ona tatou atiaʻe lenā lava uiga e tasi, ma fesoasoani iā i latou o loo pagatia aemaise lava i le itu faaleagaga?