Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

Iesu—Le Ala, le Upu Moni ma le Ola

 MATAUPU 45

E Malosi Atu Nai lo o Temoni

E Malosi Atu Nai lo o Temoni

MATAIO 8:28-34 MAREKO 5:1-20 LUKA 8:26-39

  • UA ULUITINOINA SE LAFU PUAA E NI TEMONI

Ua taunuu atu nei le faigāmalaga fitā a le ʻausoo i le matafaga, ma ua latou vaaia ai se vaaiga mataʻutia. E toʻalua ni tamāloloa ua uluitinoina e temoni, ma ua matuā feʻai lava i laʻua. Ua ō mai i laʻua mai le fanuatanu ma taufetuli atu iā Iesu. O loo taulaʻi atu faamatalaga mai le Tusi Paia i se tasi o nei tamāloloa, auā ua sili atu lona sauā ma e foliga mai ua leva ona pulea e temoni.

Ua leva ona fealualuaʻi solo lenei tamāloa e lē lavalavā, ma “ua alaga pea o ia i pō ma ao i tuugamau ma mauga, ma selei iā te ia i maa.” (Mareko 5:5) O ona uiga taufaamataʻu ua palaaai ai tagata e uia lea auala. Ua taumafai foʻi nisi tagata e saisaia o ia, ae e lē mafai auā e na te motusia filifili ma talepe mea o loo nonoa ai ona vae. E leai lava ma se tagata e iai se malosi e mafai ai ona taofia o ia.

Ua faalatalata atu lenei tamāloa iā Iesu, ma ua ia faapaʻū i ona vae. Ua uunaʻia o ia e temoni o loo pulea o ia e alaga atu ma le leotele e faapea: “O oe na le Alo o le Atua Silisili Ese, aiseā ua e faalavelave mai ai iā te aʻu? Ou te fai atu iā te oe, ia e tautō mai i le Atua e te lē faapuapuagatiaina aʻu.” Ua faailoa atu e Iesu e iai lana pule i temoni i le fetalai atu: “Ia e alu i fafo mai i le tamāloa, o oe lenā le agaga leaga.”—Mareko 5:7, 8.

O le mea moni, e tele temoni o loo puleaina le tamāloa. Ina ua fesili atu Iesu, “O ai lou igoa?” ua tali mai o ia: “O loʻu igoa o Lekeono, auā e toʻatele i matou.” (Mareko 5:9) E faia aʻe se lekeono e tasi i le faitau afe o fitafita o le vaegaʻau a Roma. O lea, e toʻatele temoni o loo auaufaatasi e faapuapuagatia lenei tamāloa, ma ua latou fiafia foʻi i ona mafatiaga. Ua latou ʻaiʻoi atu iā Iesu “e aua neʻi auina atu i latou i le tō.” E foliga mai ua latou iloa le mea o le a tupu iā i latou ma lo latou taʻitaʻi o Satani.—Luka 8:31.

O le taimi lea, o loo aai ai se lafu puaa pe tusa ma le 2,000 e latalata ane iā i latou. E tusa ai ma le Tulafono, o nei manu e lē mamā, ma e lē tatau ona iai ni puaa a tagata Iutaia. Ua faapea atu temoni iā Iesu: “Ia e auina atu i matou i puaa, ina ia matou uluitino i ai.” (Mareko 5:12) Ua tuu atu i latou e Iesu e ō. Ua ō ese nei agaga leaga mai i le tamāloa ae ulu atu i le lafu puaa. O lea, ua taufetuli atu ai le lafu puaa i le tofē ma feosofi i le sami, ma malelemo uma ai.

Ua vāai atu i latou na tausia le lafu puaa i le mea ua tupu, ona latou faanatinati atu ai lea e logo i le aai ma nuu e lata ane e faatatau i lenei mea. Ua ō atu tagata e vāai, ae ua faateʻia i latou i le taunuu atu ma iloa ai, ua toe lelei le mafaufau o le tamāloa sa uluitinoina e temoni. Ua fai ona ofu ma o loo nofo i vae o Iesu.

Ua matataʻu i latou ua vāai pe faalogo i le mea ua tupu i le tamāloa, ma e latou te lē malamalama foʻi i le uiga o lenei mea mo i latou. Ua latou ʻaiʻoi atu iā Iesu ina ia maliu ese mai i lo latou itumalo. A o agaʻi atu Iesu i luga o le vaa, ua ʻaiʻoi atu le tamāloa sa uluitinoina e temoni, pe mafai ona la ō faatasi. Peitaʻi ua fetalai atu Iesu: “Ia e alu i lou fale i lou aiga, ma faamatala atu iā i latou mea uma ua faia e Ieova mo oe, ma lona alofa mutimutivale iā te oe.”—Mareko 5:19.

E masani ona faatonuina e Iesu tagata e na te faamālōlōina, e aua le taʻuina atu i isi vavega ua ia faia. O le māfuaaga, ona e lē manaʻo Iesu e faia e tagata ni faaiʻuga e faatatau iā te ia, e faavae mai i ni faamatalaga na latou faalogo i ai. Peitaʻi, o le faatagaina e Iesu o lenei tamāloa e taʻu atu i isi le vavega ua ia faia, ua avea lea ma faamaoniga maumaututū o le malosi o lona mana, ma avatu ai se molimau i tagata e lē mafai ona oo atu i ai Iesu. O lenei foʻi faamatalaga, e ono faaitiitia ai le lē fiafia o tagata ina ua faalogo i le mea ua tupu i le lafu puaa. O lea, ua alu ai lenei tamāloa ma amata ona talaʻi atu i Tekapoli le vavega na faia e Iesu iā te ia.

Faitau Atili

Pe e Iai ni Temoni?

O ai temoni? O fea na latou ō mai ai?