Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

Iesu—Le Ala, le Upu Moni ma le Ola

 MATAUPU 60

Le Liliuina Faavavega o Iesu—Se Vaaiga i le Keriso i Lona Mamalu

Le Liliuina Faavavega o Iesu—Se Vaaiga i le Keriso i Lona Mamalu

MATAIO 16:28–17:13 MAREKO 9:1-13 LUKA 9:27-36

  • O LE FAAALIGA I LE LILIUINA FAAVAVEGA O IESU

  • UA FAALOGOINA E LE ʻAUAPOSETOLO LE SIʻUFOFOGA O LE ATUA

O loo aʻoaʻo atu Iesu i tagata i le vaipanoa o Kaisareia Filipo, lea e pe ā ma le 15 maila (25 km) le mamao mai i le mauga o Heremoni. Ua ia fai atu nei se faamatalaga ua matuā faateʻia ai ona aposetolo: “E moni ou te fai atu iā te outou, e iai nisi o loo tutū mai i inei e lē oo i ai le oti, seʻiloga ua latou vāai muamua i le Atalii o le tagata ua sau i lona malo.”—Mataio 16:28.

Atonu ua taumānatu le ʻausoo po o le ā le uiga o le fetalaiga a Iesu. Ua mavae atu le vaiaso, ona ave lea e Iesu o ona aposetolo o Peteru, Iakopo ma Ioane, i luga o se mauga maualuga. E foliga mai o le taimi lea ua leva le pō, ona ua fia momoe i latou nei e toʻatolu. A o tatalo Iesu, ua liua o ia i o latou luma, ma ua pupula ona fofoga e pei o le lā, ua susulu foʻi ona ofu papaʻe e pei o le malamalama ma ua feʻilafi mai.

Peitaʻi, ua iloa atu e nei aposetolo ni tagata se toʻalua, “o Mose ma Elia.” O loo la talanoa iā Iesu e faatatau i lona “maliu ese atu mai i le lalolagi, lea e tatau ona faataunuuina i Ierusalema.” (Luka 9:30, 31) E faasino atu le maliu ese o Iesu, i lona maliu ma lona toetū lea sa ia taʻua muamua. (Mataio 16:21) O lenei talanoaga ua faaalia ai, o lona maliu tigā e lē o se mea e tatau ona ʻalofia e pei o le manatu sa iā Peteru.

Ua uaʻi totoʻa atu nei aposetolo i le mea ua tupu, ma ua matuā maofa i latou. E ui lava o se faaaliga le mea o loo latou vaaia, ae ua foliga mai e pei o se mea moni. O lea ua faapea atu ai Peteru: “Le Aʻoaʻo e, ua lelei ona ua tatou faatasi ai i inei, o lea, seʻi o matou faatūina ni faleʻie se tolu, o le tasi mo oe, o le tasi mo Mose, ma le isi mo Elia.” (Mareko 9:5) Po o naunau Peteru e faatutū ni faleʻie ina ia faaauau ai pea lenei faaaliga?

A o tautala atu Peteru, ua ufitia i latou i se ao pupula ma ua faapea mai se siʻufofoga mai i le ao: “O loʻu Atalii pele lenā, o lē ua malie i ai loʻu loto; ia faalogo iā te ia.” Ina ua faalogo nei aposetolo i le siʻufofoga o le Atua, ona latou faapaʻuʻū faō ai lea ona ua latou matuā fefefe lava. Peitaʻi ua fetalai atu Iesu iā i latou: “Tutū ia i luga ma aua tou te fefefe.” (Mataio 17:5-7) Ua tetepa aʻe nei aposetolo, ma ua latou iloa ai ua na o Iesu, auā ua māeʻa le faaaliga. Ina ua ao, ona latou ō ifo lea mai le mauga ma ua faatonuina i latou e Iesu: “Aua neʻi taʻua atu lenei faaaliga i se tasi, seʻiloga ua toe faatūina le Atalii o le tagata mai le oti.”—Mataio 17:9.

O le vaaia e nei aposetolo o Elia i le faaaliga, ua māfua ai ona latou fesili atu: “Aiseā ua fai mai ai le ʻautusiupu e tatau ona muaʻi sau o Elia?” Ua tali mai Iesu: “Ua uma ona sau o Elia ae latou te leʻi amanaʻia o ia.” (Mataio 17:10-12) O loo uiga atu Iesu iā Ioane le Papatiso, o lē e talitutusa a la matafaioi ma Elia. Sa saunia e Elia le ala mo Elisaia, ae sa saunia e Ioane le ala mo Keriso.

E mautinoa le matuā faamalosia o le faatuatua o Iesu ma ona aposetolo i lenei faaaliga. O lenei faaaliga o se faaataga o le mamalu o Keriso i lona Malo. Ioe, sa vaaia e nei soo “le Atalii o le tagata ua sau i lona malo,” e pei lava ona folafolaina atu e Iesu iā i latou. (Mataio 16:28) A o iai aposetolo e toʻatolu i luga o le mauga, sa latou ʻvāaitino ai i lona matagofie.’ E ui lava sa mananaʻo le ʻau Faresaio e avatu e Iesu se faailoga e faamaonia ai o ia o le Tupu tofia a le Atua, ae e na te leʻi faia faapea. Peitaʻi, o lea sa faatagaina soo vavalalata o Iesu e vāai i le liliuina faavavega o ia, e fai ma faamautinoaga o valoaga e faatatau i le Malo. O lea, ua tusi ai Peteru: “Ua atili ai ona matou mautinoa i upu faavaloaga.”—2 Peteru 1:16-19.

Faitau Atili

Sa Faamaoni Pea Peteru e ui i Tofotofoga

Na faapefea i le faatuatua ma le faamaoni o Peteru ona fesoasoani iā te ia e talia faasa‘oga mai iā Iesu?