Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

Iesu—Le Ala, le Upu Moni ma le Ola

 MATAUPU 64

E Manaʻomia Ona Faamagalo Atu

E Manaʻomia Ona Faamagalo Atu

MATAIO 18:21-35

  • PE E NA O LE FAAFITU TAIMI E TATAU ONA FAAMAGALO ATU AI?

  • TALAFAATUSA I LE POLOGA LĒ LOTOFAAMAGALO

Ua faalogo Peteru i le fautuaga a Iesu, i le auala e taulima ai se feeseeseaʻiga i le va o ni uso, e tau lava na o i laʻua. Peitaʻi, e foliga mai o loo fia iloa e Peteru pe e faafia ona faamagalo e le tasi le isi.

Ua fesili atu Peteru: “Le Alii e, e faafia ona agasala mai loʻu uso iā te aʻu ma ou faamagalo atu iā te ia? Pe e faafitu ea?” Ua aʻoaʻoina e nisi taʻitaʻi lotu e faatolu taimi e tatau ona faamagalo atu ai le tasi i le isi. O lea e ono manatu ai Peteru, o se gaoioiga agalelei pe afai “e faafitu” taimi e na te faamagalo atu ai i se tasi.—Mataio 18:21.

Peitaʻi, o le faitauina o taimi e faia ai e se tasi se gaoioiga e faatigā ai iā te oe, e lē ōgatusa lea ma aʻoaʻoga a Iesu. O lea, ua ia faasaʻo ai le manatu o Peteru e faapea: “Ou te fai atu iā te oe, e lē faafitu, ae e faafitu sefulu fitu.” (Mataio 18:22) I se isi faaupuga, o loo uiga atu Iesu e faapea, e leai se aofaʻiga patino o taimi e tatau ona faamagalo ai e le tasi le isi. O lea, e leai se mea e gata mai ai le faamagalo atu e Peteru o se tasi.

Ua faamatala atu nei e Iesu iā Peteru ma isi se talafaatusa e faamatilatila atu ai, o la latou tiute tauave o le faamagalo atu lea o isi. E faatatau lenei talafaatusa i se pologa e leʻi faataʻitaʻi i lona matai alofa mutimutivale. Ua manaʻo le tupu e totogi mai e ana pologa a latou aitalafu. Ua aumai iā te ia se tasi o pologa o loo nofo aitalafu i taleni e sefulu afe [60,000,000 tenari]. E mautinoa e lē mafai e lenei pologa ona toe totogi atu lenā aitalafu. O lea, ua poloaʻia ai e le tupu ina ia faatau atu lenei pologa, o lana avā, ma lana fanau ina ia toe totogi mai ai le aitalafu. Peitaʻi ua faapaʻū le pologa i vae o lona matai, ma augani atu iā te ia: “Ia e malie e tuu mai se avanoa, ou te toe totogi atu ai mea uma iā te oe.”—Mataio 18:26.

Ua alofa mutimutivale le tupu iā te ia, ma faamagalo i lana aitalafu telē. Peitaʻi, ua alu atu lenei pologa ma maua ai lona uso a pologa, o lē o loo aitalafu iā te ia i tenari e selau. Ua ia puʻe i lenei pologa ma titina o ia ma faapea atu: “Ia e toe totogi mai mea na e aitalafu ai iā te aʻu.” Ae ua faapaʻū lenei pologa i vae o le pologa o loo ia aitalafu ai, ma ʻaiʻoi atu: “Ia e malie e tuu mai se avanoa, ou te toe totogi atu ai laʻu aitalafu.” (Mataio 18:28, 29) Peitaʻi, ua ia ave lona uso a pologa o lē e itiiti lana aitalafu, ma faatonu e lafo o ia i le falepuipui seʻia toe totogi uma mai lana aitalafu. O lea, e lē o faataʻitaʻi lenei pologa i lona matai o lē na faamagaloina lana aitalafu.

Ua faamatala atili e Iesu e faapea, ina ua iloa e isi pologa lenei gaoioiga lē alofa, ona latou ō atu lea ma faamatala mea uma i lo latou matai. Ua matuā ita le matai ma ua ia valaau atu i lenei pologa, ma faapea atu: “O oe lenā le pologa leaga, na ou faamagaloina lau aitalafu ina ua e ʻaiʻoi mai iā te aʻu. Pe e lē tatau ea la ona e alofa mutimutivale i lou uso a pologa, e pei foʻi ona ou alofa mutimutivale iā te oe?” O le ita tele o le matai ua ia tuuina atu ai lenei pologa e lē lotofaamagalo i leoleo o le falepuipui, seʻia toe totogi uma mai mea na ia aitalafu ai. Ua faaiʻu le faamatalaga a Iesu e faapea: “E faia foʻi faapena e loʻu Tamā o i le lagi iā te outou, pe afai tou te lē faamagalo atu ma o outou lotoatoa i o outou uso.”—Mataio 18:32-35.

Maʻeu se lesona aogā ua tatou aʻoaʻoina e faatatau i le lotofaamagalo! O loo tatou nofo aitalafu i le Atua i le tele o agasala, ae o loo ia faamagaloina pea i tatou. Pe a faatusatusa la lenā mea i mea sesē e faia e o tatou uso Kerisiano iā i tatou, e matuā faatauvaa lava. E faitau afe foʻi taimi e faamagalo ai i tatou e Ieova. Pe e lē mafai la ona tatou faamagalo atu i so tatou uso i le tele o taimi, e tusa lava pe e iai se māfuaaga talafeagai e tatou te lē fiafia ai? E pei ona aʻoaʻoina e Iesu i lana Lauga i luga o le Mauga, o le a ʻfaamagalo mai e le Atua a tatou agasala e pei foʻi ona tatou faamagalo atu i ē o agasala mai iā i tatou.’—Mataio 6:12.