Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

Iesu—Le Ala, le Upu Moni ma le Ola

 MATAUPU 38

Ua Naunau Ioane e Faalogo Atu i se Faamatalaga Mai iā Iesu

Ua Naunau Ioane e Faalogo Atu i se Faamatalaga Mai iā Iesu

MATAIO 11:2-15 LUKA 7:18-30

  • UA FESILI IOANE LE PAPATISO E FAATATAU I LE MATAFAIOI A IESU

  • UA VIIVIIA E IESU IOANE

Ua pe ā nei ma le tausaga o faafalepuipuiina pea Ioane le Papatiso. Ae o loo faaauau pea ona ia mauaina tala e faatatau i galuega ofoofogia a Iesu. Seʻi mafaufau i ona faalogona ina ua taʻu atu e ona soo iā te ia, ua toe faatūina e Iesu le tama a le fafine Naina ua oti lana tane. Ua naunau lava Ioane e maua se faamatalaga mai iā Iesu, po o ia o le Mesia. O lea ua ia valaau ai i ona soo e toʻalua, ina ia o la fesili atu iā Iesu: “Po o oe ea o Lē e maliu mai, pe e matou te faatali i se isi tagata?”—Luka 7:19.

E foliga mai o se fesili uigaese lenei fesili, auā o Ioane o se tane faamaoni. I le toetoe lua tausaga ua mavae, na ia vaaia ai le agaga paia o le Atua o alu ifo i luga o Iesu, ma faalogoina le siʻufofoga mai le Atua e faamaonia ai o lona Alo lea. E leai la se māfuaaga e tatou te faapea ai, ua amata ona vaivai le faatuatua o Ioane. Pe ana faapea o le tulaga lenā, semanū e lē tautala faaviivii Iesu e faatatau iā te ia. Peitaʻi, afai e lē o tau masalosalo Ioane, aiseā la ua ia lāgā ai lenei fesili e faatatau iā Iesu?

Atonu o loo manaʻo Ioane i se faamautinoaga mai iā Iesu, e iloa ai o ia moni o le Mesia. O le iloaina o lenei mea, e mafai ona faamalosia ai Ioane a o fesagaʻi ma tulaga faigatā i le falepuipui. E iai foʻi se isi uiga o le fesili a Ioane. Ua malamalama lelei o ia i valoaga a le Tusi Paia e faatatau i Lē ua Faauuina a le Atua. O ia lea o le a avea ma tupu ma laveaʻia tagata. Peitaʻi, o lea ua mavae le tele o masina talu le papatisoga o Iesu, ae o loo faafalepuipuiina pea Ioane. O le māfuaaga la lea ua fesili ai Ioane, pe e iai se isi e ese mai iā Iesu o le a afio mai, po o se tasi e sosoo iā Iesu, e na te faataunuuina atoatoa mea sa valoia mai o le a faataunuuina e le Mesia.

Nai lo o le faapea atu o Iesu i soo o Ioane, ʻIoe o aʻu o Lē e maliu mai,’ ae ua ia avatu faamaoniga e iloa ai o loo lagolagoina o ia e le Atua, e ala i le faamālōlōina o maʻi eseese. Ua ia fetalai atu iā i laʻua: “Ia oulua ō ma faamatala atu iā Ioane mea ua oulua faalogo ma vāai i ai: Ua toe pupula tauaso, ua savavali pipili, ua faamamāina lepela, ua faalogo o ē e tutuli, ma ua toetutū mai tagata oti. Ua folafola atu foʻi le tala lelei i ē e matitiva.”—Mataio 11:4, 5.

Atonu o loo fesili atu Ioane ma le faamoemoe o le a sili atu mea o le a faia e Iesu nai lo o mea o loo ia faia i lenā lava taimi, ma atonu o le a ia faasaʻolotoina o ia mai i le falepuipui. Peitaʻi, ua fetalai atu Iesu iā Ioane e lē tatau ona ia faatalitalia ni vavega e sili atu i lo o vavega o loo Ia faia.

Ina ua ō ese soo o Ioane, ona faamautinoa atu lea e Iesu i le motu o tagata, o Ioane e lē na o se perofeta. O ia “o le avefeʻau” a Ieova lea na valoia mai i le Malaki 3:1, ma o ia foʻi o le perofeta o Elia lea na valoia mai i le Malaki 4:5, 6. Ua fetalai atu Iesu: “E moni ou te fai atu iā te outou, e leʻi tū mai i ē na fananau mai i fafine sē e sili iā Ioane le Papatiso; a o lē e faatauvaa i le malo o le lagi e sili o ia iā te ia.”—Mataio 11:11.

O le faapea mai o Iesu o lē e faatauvaa i le lagi e sili atu o ia iā Ioane, ua faaalia ai e lē iai Ioane i le Malo i le lagi. Na saunia e Ioane le ala mo Iesu, peitaʻi, na maliu o ia a o leʻi tatalaina e Iesu le ala i le lagi. (Eperu 10:19, 20) E ui i lea, o Ioane o se perofeta faamaoni a le Atua, ma o le a avea o ia o se tagatānuu i le lalolagi o le Malo o le Atua.