Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

Iesu—Le Ala, le Upu Moni ma le Ola

 MATAUPU 48

Ua Faia Vavega, ae ua Teena Foʻi i Nasareta

Ua Faia Vavega, ae ua Teena Foʻi i Nasareta

MATAIO 9:27-34; 13:54-58 MAREKO 6:1-6

  • UA FAAMĀLŌLŌINA E IESU Ē E TAUASO MA Ē E GŪGŪ

  • UA TEENA E TAGATA NASARETA IESU

O se aso pisi tele lenei mo Iesu. Ina ua toe taliu mai lana malaga mai i Tekapoli, na ia faamālōlōina ai se fafine na maua i le punatoto ma toe faatūina le afafine o Iairo. E leʻi uma le aso. Peitaʻi, o loo tele pea isi galuega e manaʻomia ona ia faia. A o agaʻi ese Iesu mai le fale o Iairo, ua mulimuli atu iā te ia ni tamāloloa tauaso se toʻalua, ma alalaga atu: “Le Alo e, o Tavita, ia e alofa mai iā i maʻua.”—Mataio 9:27.

O le faapea atu o nei tamāloloa o Iesu o le ʻAlo o Tavita,’ ua faailoa atu ai e la te talitonu o ia o le suli o le nofoālii o Tavita ma o ia o le Mesia. Peitaʻi, e foliga mai e lē o ano atu Iesu iā i laʻua. Atonu ua ia faia faapea ina ia tofotofoina ai pe e moni lo la faatuatua. Ua ulu atu nei Iesu i se tasi o fale, ae o loo faaauau pea ona mulimuli atu iā te ia nei tamāloloa. Ua fesili atu Iesu iā i laʻua: “Pe e te lua faatuatua e mafai ona ou faia o lenei mea?” Ua la tali mai ma le mautinoa: “O lea lava, le Alii e.” O lea, ua paʻi atu ai Iesu i o la mata ma faapea atu: “Ia faapea lava ona faia iā te oulua e tusa ma lo oulua faatuatua.”—Mataio 9:28, 29.

Ua faafuaseʻi ona pupula mata o nei tamāloloa. Ua faatonuina i laʻua e Iesu e aua le taʻuina atu i se isi le mea ua tupu. Ae ona o lo la fiafia tele, ua la ō ai i se taimi mulimuli ane ma faailoa atu i vaipanoa uma le mea ua faia e Iesu.

A o ō ese atu nei tamāloloa, ua aumaia e tagata se tamāloa ua gūgū ona ua uluitinoina e se temoni. Ua tuliesea e Iesu le temoni, ma ua mafai nei ona toe tautala le tamāloa. Ua taufaiofo le motu o tagata ma faapea atu: “E leʻi vaaia muamua lava se mea faapenei i Isaraelu.” O loo iai foʻi i inā le ʻau Faresaio. E lē mafai ona latou faapea atu e leʻi tutupu moni nei vavega. O lea ua latou toe tuuaʻia ai Iesu e faapea, ua mafai ona ia faia nei galuega mamana ona “o le pule o temoni.”—Mataio 9:33, 34.

E leʻi umi ae toe foʻi Iesu ma ona soo i lona nuu o Nasareta. Pe tusa o le tausaga ua mavae, na ia aʻoaʻo ai i le sunako i inā. Sa taufaiofo tagata i mea sa ia aʻoaʻoina atu, ae mulimuli ane, na latou feita iā te ia ma taumafai ai e fasioti o ia. O lea foʻi la ua toe taumafai Iesu e fesoasoani atu i tagata o lona nuu.

I se tasi o Sapati, ua toe alu ai Iesu i le sunako ina ia aʻoaʻo atu. Ua taufaiofo le toʻatele ma ua latou faapea ane: “O fea na maua mai ai e lenei tagata lenei atamai ma nei galuega mamana? Pe e lē o le atalii ea lenei o le kamuta? Pe e lē o lona tinā ea o Maria, ma ona uso o Iakopo, Iosefa, Simona, ma Iuta? Pe e tatou te lē o faatasi ea foʻi ma ona tuafāfine uma? O fea la na maua mai ai e lenei tagata nei mea?”—Mataio 13:54-56.

Ua manatu tagata, o Iesu ua na o se tagata mai i Nasareta. Ua latou taumānatu: ʻSa matou vāai iā te ia a o tuputupu aʻe. E faapefea la ona avea o ia ma Mesia?’ E ui lava i faamaoniga uma, e aofia ai le atamai o Iesu faapea ana galuega mamana, ae ua latou teena pea o ia. O le masani lelei o ona tauaiga iā te ia, ua amata ai foʻi ona latou tausuai iā te ia. O lea, ua fetalai atu ai Iesu: “E lē mamalu se perofeta i lona lava nuu ma lona lava aiga.”—Mataio 13:57.

Ua matuā maofa lava Iesu ona o lo latou lē faatuatua. O lea, ua ia lē faia ai ni vavega i inā, ae ua “na o le faaee atu o ona aao i ni nai tagata mamaʻi ma faamālōlō iā i latou.”—Mareko 6:5, 6.