Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

Iesu—Le Ala, le Upu Moni ma le Ola

 MATAUPU 29

Pe e Mafai Ona Faia Galuega Lelei i le Sapati?

Pe e Mafai Ona Faia Galuega Lelei i le Sapati?

IOANE 5:1-16

  • UA TALAʻI ATU IESU I IUTAIA

  • UA IA FAAMĀLŌLŌ SE TAMĀLOA MAʻI I SE VAI TĀʻELE

Ua tele mea ua faataunuuina e Iesu i lana faiva i Kalilaia. Peitaʻi, e iai isi vaipanoa o loo mafaufau Iesu e talaʻi i ai e ese mai i Kalilaia. Ua fetalai o ia: “E tatau ona ou folafola atu le tala lelei o le malo o le Atua i isi foʻi aai.” O lea, ua ia ʻtalaʻi atu ai i sunako o i Iutaia.’ (Luka 4:43, 44) E talafeagai lenei manatu auā o lea ua oo i se vaitaimi o Mati po o Aperila, ma ua lata i le taimi e faia ai se tasi o tausamiga i Ierusalema.

E tele atu faamatalaga o loo iai i tusi a Evagelia e faatatau i le faiva a Iesu i Kalilaia, nai lo o faamatalaga e faatatau i lana faiva i Iutaia. E lē avea le lē ano mai o tagata Iutaia, ma itu e taofia ai Iesu mai i le faaauau pea ona talaʻi atu ma faia galuega lelei.

Ua agaʻi atu nei Iesu i le aai autū o Iutaia o Ierusalema, mo le faamanatuina o le Paseka i le 31 T.A. O loo iai i inā se vai tāʻele telē e iai ona faapaologa e taʻua o le Petesata, i se nofoaga e tumutumu ai tagata lea e latalata i le Faitotoʻa o Mamoe. E toʻatele tagata mamaʻi, tauaso ma pipili e ō mai i lenei vai tāʻele, ona e talitonu e mafai ona faamālōlōina ai tagata pe a tāʻeʻele i lenei vai i le taimi e gaepu ai.

Ua oo nei i le Sapati, ma ua silasila atu Iesu i se tamāloa ua 38 tausaga o maʻi. Ua fesili atu Iesu iā te ia: “Po ua e fia mālōlō ea mai i lou maʻi?” Ua tali mai le tamāloa: “Lau susuga e, e leai lava se tasi e na te tuuina ifo aʻu i le vai tāʻele pe a gaepu; pe a ou alu ifo i le vai, ae ua muamua atu se isi iā te aʻu.”—Ioane 5:6, 7.

E mautinoa le faateʻia o le tamāloa ma i latou o loo faalogologo atu i le fetalaiga lenei a Iesu: “Inā tū ia i luga, ia ave lou moega ma e savali.” (Ioane 5:8) O le gaoioiga lea ua faia e le tamāloa, ma ua malosi ai o ia. Ua tū o ia i luga, ua ave lona moega ma savali.

Nai lo o le fiafia i lenei mea ofoofogia ua tupu, ua faamasinosino e tagata Iutaia le tamāloa ma fai atu iā te ia: “O le Sapati lenei, ma e sā ona e ave ai lou moega.” Ua tali mai le tamāloa: “O lē na ia faamālōlōina aʻu, ua faapea mai, ʻIa ave lou moega ma e savali.’” (Ioane 5:10, 11) Ua faitioina e nei tagata Iutaia lē o loo faamālōlōina tagata i le Sapati.

Ua latou fesili atu i le tamāloa: “O ai na fai atu iā te oe, ʻIa ave lou moega ma e savali’?” Aiseā ua latou faia ai lenei fesili? Talu ai “ua maliu ese Iesu mai i le mea o loo iai le motu o tagata,” ma e lē iloa foʻi e le tamāloa le igoa o Iesu. (Ioane 5:12, 13) Mulimuli ane, ua toe feiloaʻi lenei tamāloa ma Iesu i le malumalu, ma ia iloa ai lē na faamālōlōina o ia i le vai tāʻele.

Ua alu le tamāloa ua faamālōlōina ma taʻu atu i tagata Iutaia na fesili atu iā te ia, o Iesu na faamālōlōina o ia. O lea, ua ō atu ai loa nei tagata iā Iesu. Po ua latou ō atu iā Iesu ina ia iloa ai auala na ia faia ai nei vavega ofoofogia? E leai. Ua latou ō atu ina ia saʻili se mea e molia ai Iesu, ona o le faia o nei galuega lelei i le Sapati. Ua amata foʻi ona latou faasauā iā te ia.