Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

Iesu—Le Ala, le Upu Moni ma le Ola

 MATAUPU 52

Fafagaina o le Faitau Afe i Nai Falaoa ma Iʻa

Fafagaina o le Faitau Afe i Nai Falaoa ma Iʻa

MATAIO 14:13-21 MAREKO 6:30-44 LUKA 9:10-17 IOANE 6:1-13

  • UA FAFAGAINA E IESU TANE E TOʻA 5,000

Ua fiafia le ʻauaposetolo e toʻa 12 i la latou talaʻiga faataamilo i Kalilaia atoa, ma ua latou faamatala atu iā Iesu “mea uma na latou faia ma aʻoaʻo atu.” Ua latou lagona le vaivai, peitaʻi, e leai se taimi e latou te mālōlō pe aai ai, ona o le toʻatele o tagata o loo ō atu iā Iesu. O lea, ua fetalai atu ai Iesu i ona aposetolo: “Seʻi o tatou ō na o i tatou i se mea tuufua ma fai ai sina mālōlōga.”—Mareko 6:30, 31.

Ua faaee lo latou vaa atonu e lata i Kapanaumi, ma ō atu ai i se nofoaga tuufua i le itu i sasaʻe o le vaitafe o Ioritana i tala atu o Petesaita. Peitaʻi, ua iloa atu i latou e le toʻatele o tagata, ma taufetuli atu i le matafaga e muamua atu i le vaa. E taunuu atu le vaa, ua iai i inā nei tagata e faafeiloaʻi mai i latou.

Ua maliu ese nei Iesu mai i le vaa ma ua silasila atu i le motu o tagata, ona tigā alofa ai lea o ia iā i latou, auā ua pei o ni mamoe e leai so latou leoleo mamoe. Ua amata ona ia ʻaʻoaʻo atu iā i latou i le tele o mea’ e faatatau i le Malo. (Mareko 6:34) Ua ia faamālōlō foʻi i “ē o mamaʻi.” (Luka 9:11) Ua oo i le afiafi, ona faapea atu lea o ona soo iā te ia: “O le nofoaga tuufua lenei ma ua leva foʻi le aso; ia tuu atu tagata e ō i le aai e faatau mai ni a latou meaʻai.”—Mataio 14:15.

Peitaʻi ua fetalai atu Iesu iā i latou: “E lē tatau ona ō i latou, ae ia outou avatu ni meaʻai ma i latou.” (Mataio 14:16) E ui lava ua silafia e Iesu le gaoioiga o le a ia faia, peitaʻi ua ia tofotofoina Filipo i le fesili atu i ai: “O fea tatou te faatau mai ai ni falaoa e aai ai i latou nei?” Ua talafeagai le fesili atu iā Filipo, auā e sau o ia mai i Petesaita lea e latalata ane. Peitaʻi, o le faatauina mai o falaoa e lē foʻia ai le faafitauli. Pe tusa ma le 5,000 tane o loo iai, ma atonu e faaluaina lenā aofaʻi pe a faitau faatasi ai ma fafine ma tamaiti. Ua tali atu Filipo: “E lē lava le lua selau tenari [o le tenari e tasi o le totogi lea mo se tagata faigaluega i le aso e tasi] e faatau ai ni falaoa mo i latou, ina ia tofu le tagata ma sina mea.”—Ioane 6:5-7.

Ina ia faailoa atu e lē mafai ona fafagaina nei tagata e toʻatele, ua faapea atu Aneterea: “O loo i inei le tamaitiiti e iai ana falaoa karite e lima ma tamaʻi iʻa e lua. Ae pe e lava ai le toʻatele i nei mea?”—Ioane 6:9.

O le taimi lea o Mati po o Aperila, a o leʻi amata le Paseka i le 32 T.A. ma ua lanu meamata le mutia. Ua faatonu e Iesu ona soo e fai atu i tagata, e taooto i le mutia i vaega e taʻi 50 ma taʻi 100. Ua ia tago i falaoa e lima ma iʻa e lua, ma fai le faafetai i le Atua. Ona ia vaevaeina lea o nei falaoa ma nei iʻa, ma tuu atu i ona soo e tufatufa atu i tagata. O le mea e ofo ai, ua aai tagata uma i nei meaʻai seʻia oo ina maoona i latou.

Mulimuli ane, ua fetalai atu Iesu i ona soo: “Ia aoao mai mea ua totoe, ina ia aua neʻi maʻimau se mea.” (Ioane 6:12) Ua latou faia faapea, ma ua tutumu ai ato e sefulu lua i meaʻai ua totoe.