Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

Iesu—Le Ala, le Upu Moni ma le Ola

 MATAUPU 44

Ua Faatoʻafilemu e Iesu se Matagi i le Sami

Ua Faatoʻafilemu e Iesu se Matagi i le Sami

MATAIO 8:18, 23-27 MAREKO 4:35-41 LUKA 8:22-25

  • UA FAATOʻAFILEMU E IESU SE MATAGI I LE SAMI O KALILAIA

O loo iai pea Iesu i le vaipanoa o Kapanaumi. Ua alu le aso ma ua ia lagona le vaivai. Ina ua lata i le afiafi, ona ia faapea atu lea i ona soo, ʻseʻi o tatou ō’ i le itu i sasaʻe o le sami o Kalilaia.—Mareko 4:35.

I le itu i sasaʻe o le matafaga o le sami o Kalilaia, o loo iai le laufanua ua taʻua o Kerekese, o se vaega o le vaipanoa o Tekapoli. Ua avea aai o lenei vaipanoa ma nofoaga autū o le aganuu faa-Eleni, e ui e toʻatele foʻi tagata Iutaia e nonofo ai i inā.

E lē na o le vaa o loo iai Iesu ua malaga ese atu mai i Kapanaumi. O loo iai foʻi isi vaa o loo folau atu i le taimi lea. (Mareko 4:36) E lē mamao se mea e alu i ai lenei faigāmalaga. E pei le sami o Kalilaia o se vaituloto telē. E pe ā ma le 13 maila (21 km) le umī, ae e iai ona vaega e pe ā ma le 7 maila (12 km) le lautele. Peitaʻi, e lē papaʻu lenei vaituloto.

E ui o Iesu o se tagata e lelei atoatoa, ae ua ia lagona le matuā vaivai mai i lana faiva i le aso atoa. O lea, ua alu ifo ai o ia ma tofā i se aluga i le taumuli o le vaa.

O le toʻatele o le ʻauaposetolo o ni tagata folau ua lava le poto masani. Peitaʻi o lenei faigāmalaga, e lē o se faigāmalaga faigofie. O le sami o Kalilaia o loo latou uia e siʻomia i mauga, ma e masani lava e vevela le ʻea i luga aʻe o le sami. E iai taimi e agi malosi mai ai le savili mālūlū mai i mauga, ona fetaiaʻi lea ma le ʻea vevela i luga aʻe o le sami, ma faapogaia ai ni matagi malolosi i luga o le sami. O le mea tonu lenā ua tupu. Ua faafuaseʻi ona fafati mai galu i le vaa, ma ua amata ona “tumu le vaa i vai, ma ua lamatia ai.” (Luka 8:23) Peitaʻi o loo tofā pea Iesu.

Ua taumafai ma le malosi le ʻauvaa e uli le vaa, ma faalagolago i lo latou tomai i le auala foʻi sa latou sao mai ai i isi matagi i taimi ua teʻa. Peitaʻi ua ese lenei taimi, auā ua sili atu le malosi o le matagi lea ua latou fesagaʻia. Ua latou popole i o latou ola, ma ua latou fafagu ai i luga Iesu ma faapea atu iā te ia: “Le Alii e, ia e faaola mai iā i matou, auā o le a matou feoti!” (Mataio 8:25) Ua fefefe le ʻausoo ina neʻi o latou malelemo.

Ua ala aʻe nei Iesu ma ua ia fetalai atu iā i latou: “Aiseā ua outou fefefe ai, o outou o ē e faatuatua itiiti?” (Mataio 8:26) Ona vavao lea e Iesu i le matagi ma le sami e faapea: “Ia fifilemu, ma ia malū!” (Mareko 4:39) Ua toʻa le matagi ma ua malū le sami. (Ua faamatala e Mareko ma Luka lenei mea mataʻina ua tupu, e ala i le faamatilatila muamua o le faatoʻafilemuina e Iesu o le matagi, ona faatoʻā taʻua ai lea o le itiiti o le faatuatua o le ʻausoo.)

Seʻi manatu i le aafiaga o lenei mea i le ʻausoo. O lea ua faatoʻā uma ona latou vaaia se matagi malosi ua faatoʻafilemuina. Ua latou lagona le matuā matataʻu ma faapea ane le tasi i le isi: “O ai ea lenei tagata ua usiusitaʻi i ai le matagi ma le sami iā te ia?” Ua latou taunuu nei ma le saogalemu i le isi itu o le sami. (Mareko 4:41–5:1) Ae atonu o isi vaa na latou folau faatasi, sa mafai ona toe foʻi i le itu i sisifo o le sami o Kalilaia.

Maʻeu le faamāfanafanaina o i tatou i le iloaina, e iai i le Alo o le Atua le mana e pulea ai malosiaga faalenatura. O le a nonofo ma le saogalemu tagata ma e lē toe fefefe i ni mala faalenatura, pe a liuliualo mai Iesu i lo tatou lalolagi i le taimi o lana pulega i le Malo.

Faitau Atili

O le ā le Malo o le Atua?

O ai le Tupu o le Malo o le Atua, ma o ā mea o le a faataunuuina e lenā Malo?