Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

Iesu—Le Ala, le Upu Moni ma le Ola

 MATAUPU 57

Ua Faamālōlōina e Iesu se Teineitiiti ma se Tamāloa Tutuli

Ua Faamālōlōina e Iesu se Teineitiiti ma se Tamāloa Tutuli

MATAIO 15:21-31 MAREKO 7:24-37

  • UA FAAMĀLŌLŌINA E IESU LE TAMA TEINE A SE FAFINE FOINIE

  • UA IA FAAMĀLŌLŌINA SE TAMĀLOA TUTULI MA E LĒ MAFAI ONA TAUTALA

Ina ua uma ona taʻusalaina e Iesu le ʻau Faresaio i a latou tū masani, ona ō ese loa lea o ia ma ona soo. Ua latou agaʻi atu i laufanua o Turo ma Saitonu i Foinie, lea e mamao i le itu i mātū i sisifo.

Ua maua e Iesu se fale e nofo ai, ae e lē o manaʻo e iloa o ia e tagata. Peitaʻi, e leʻi lilo o ia i le vaaiga a tagata. Ua alu atu iā te ia se fafine Eleni ae na fanau i Foinie, ma ʻaiʻoi atu iā te ia: “Le Alii e, le Atalii o Tavita, ia e alofa mai iā te aʻu. Ua matuā temonia lava laʻu tama teine.”—Mataio 15:22; Mareko 7:26.

Ae ua talosaga atu soo o Iesu iā te ia: “Ia fai i ai e alu, auā ua fai o ia ma faalavelave iā i tatou.” Ua faamatala atu e Iesu iā i latou le māfuaaga ua ia lē ano ai i le fafine: “E leʻi auina mai aʻu i nisi, ae na o mamoe o le aiga o Isaraelu ua leiloloa.” Peitaʻi, e leʻi gata ai i inā taumafaiga a le fafine. Ua faalatalata atu o ia iā Iesu, ua tootuli ma ʻaiʻoi atu: “Le Alii e, ia e fesoasoani mai iā te aʻu!”—Mataio 15:23-25.

Atonu ina ia tofotofoina le malosi o le faatuatua o lenei fafine, ua faasino atu Iesu i le vaaiga sesē a tagata Iutaia i tagata o isi nuu. Ua ia fetalai atu: “E lē tatau ona lafo falaoa a tamaiti i tamaʻi taʻifau.” (Mataio 15:26) O le faaaogāina e Iesu o le faaupuga “tamaʻi taʻifau,” ua ia faailoa atu ai ona faalogona māfana i tagata e lē o ni Iutaia. Ua ia faaalia foʻi lea uiga e ala i ona foliga vaaia, faapea lona leo mālū.

Nai lo o le lē fiafia i le fetalaiga a Iesu, ae ua faaaogā e lenei fafine le faamatalaga e faatatau i uiga faailoga tagata o tagata Iutaia, ma faapea atu ma le lotomaulalo: “E saʻo lava oe le Alii e, a o le mea moni, e ʻai e tamaʻi taʻifau fasi falaoa e paʻuʻū mai i laulau a o latou matai.” Ua silafia e Iesu le lelei o le loto o lenei fafine ma faapea atu: “Tinā e, maʻeu le malosi o lou faatuatua, ia taunuu e pei ona e moomoo i ai.” (Mataio 15:27, 28) O le mea tonu lenā ua tupu, e ui lava e lē o iai i inā le teineitiiti. Ua toe foʻi lenei fafine i lona aiga, ma iloa ai lana tama teine o loo taoto i le moega ua faamālōlōina, ma “ua alu ese le temoni” mai iā te ia.—Mareko 7:30.

Ua malaga atu nei Iesu ma ona soo i le isi itu o Foinie, ma agaʻi atu e latalata i punāvai o le vaitafe o Ioritana. Ua latou sopoʻia lenei vaitafe atonu i le itu i mātū o le sami o Kalilaia, ma ō atu ai i laufanua o Tekapoli. Ina ua latou taunuu i inā, ona latou aʻea ai lea o se mauga. Peitaʻi, ua iloa atu i latou e le motu o tagata. Ua latou avatu iā te ia o ē e pipili, o ē e mumutu, o ē e tauaso ma ē e gūgū. Ua faamālōlōina i latou uma ua tuuina atu i ona aao. O le maofa tele o tagata, ua latou vivii atu ai i le Atua o Isaraelu.

Ua uaʻi faapitoa atu nei Iesu i se tamāloa tutuli ma e tau lē mafai ona tautala. Seʻi faaāta faalogona o lenei tamāloa a o iai i lenei mea o loo tumutumu ai tagata. Atonu ua silafia e Iesu le matamuli o lenei tamāloa. O lea ua ia aveese ai o ia mai i le mea o loo iai le motu o tagata. A o iai na o i laʻua, ua faailoa atu e Iesu le gaoioiga o le a ia faia. Ua tuu atu ona tamatamaʻilima i taliga o le tamāloa, ua feanu, ona ia paʻi atu lea i lona laulaufaiva. Ua tepa aʻe Iesu i le lagi ma faapea atu i le tamāloa: “Efata,” o lona uiga, “Ia matala.” O le taimi lava lea ua toe lelei ai le faalogo a le tamāloa, ma ua mafai ona tautala e pei o isi tagata. E lē manaʻo Iesu e faailoa atu i isi le mea ua tupu. E sili atu iā te ia le talitonu o tagata i mea e latou te vāaitino ma faalogo i ai, nai lo o ni faamatalaga e feaveaʻi solo e faatatau iā te ia.—Mareko 7:32-36.

Ua telē se aafiaga ua oo i tagata ma “ua matuā maofa i latou,” ona o le mana o Iesu e faia ai nei faamālōlōga. Ua latou faapea ane: “Ua lelei mea uma ua ia faia. Ona o ia, ua mafai ai ona faalogo ē na tutuli, ma tautatala ē e leʻi mafai ona tautatala.”—Mareko 7:37.