Skip to content

Skip to secondary menu

Skip to table of contents

Molimau a Ieova

Faa-Samoa

Iesu—Le Ala, le Upu Moni ma le Ola

 MATAUPU 46

Ua Faamālōlōina Ina ua Paʻi Atu i le Ofu o Iesu

Ua Faamālōlōina Ina ua Paʻi Atu i le Ofu o Iesu

MATAIO 9:18-22 MAREKO 5:21-34 LUKA 8:40-48

  • UA FAAMĀLŌLŌINA SE FAFINE INA UA PAʻI ATU I LE OFU O IESU

Ua oo atu tala e faatatau i le toe foʻi ane o Iesu mai i Tekapoli i tagata Iutaia, o loo nonofo i le itu i mātū i sisifo o le matafaga o le sami o Kalilaia. E foliga mai ua faalogo le toʻatele o i latou e faatatau i le faatoʻafilemuina e Iesu o le matagi malosi ma le sami, ma atonu foʻi ua iloa e nisi lona faamālōlōina o ni tamāloloa na uluitinoina e temoni. O lea, ua faapotopoto ai “le motu o tagata e toʻatele” i le nuu o Kapanaumi, e faafeiloaʻi Iesu. (Mareko 5:21) Ua taunuu atu nei Iesu i le matafaga, ma o loo faatalitali mai ai ma le naunau lenei motu o tagata.

O se tasi o i latou o loo matuā naunau lava e feiloaʻi iā Iesu, o Iairo, o le pule o le sunako lea atonu o loo i Kapanaumi. Ua faapaʻū o ia i vae o Iesu ma ua augani atu pea: “Ua matuā maʻi tigāina loʻu afafine. Faamolemole, pe e mafai ona e maliu atu ma tuu ou aao i luga iā te ia, ina ia toe malosi ma ola ai o ia.” (Mareko 5:23) O le ā le auala o le a tali atu ai Iesu i le augani a lenei tamā, ina ia fesoasoani atu i lona afafine e toʻatasi e na o le 12 tausaga ma e matuā pele iā te ia?—Luka 8:42.

Ua agaʻi atu nei Iesu i le fale o Iairo, ae ua iai foʻi se isi mea ua tupu. O le toʻatele o tagata o loo ō atu faatasi ma Iesu, ua latou lagona le fiafia ma taumānatu pe faamata o le a toe faia e Iesu se isi vavega. Peitaʻi, e iai se fafine i le motu o tagata o loo popole i lona maʻi tugā.

Ua 12 tausaga o mafatia lenei fafine Iutaia i le punatoto. Sa ia saʻilia le fesoasoani a fomaʻi, ma faaalu ai le tele o ana tupe i togafitiga sa latou fautuaina o ia e fai. Ae e leai ma se togafitiga o aogā iā te ia. ʻUa na ona atili tigāina ai o ia.’—Mareko 5:26.

E tatou te iloa lelei o le maʻi o loo maua ai lenei fafine, e lē gata e vaivai ai lona tino ae e faalumaina ma māsiasi ai foʻi. E lē soona faamatalaina e se tasi lenei maʻi. E tusa ai foʻi ma le Tulafono a Mose, e lē mamā se fafine pe afai e alu lona palapala. O so o se tasi lava e paʻi atu iā te ia po o ona ofu ua pisipisia i le toto, e tatau ona tāʻele o ia ma e lē mamā seʻia oo i le afiafipō.—Levitiko 15:25-27.

Ua faalogo lenei fafine e faatatau “i mea sa faia e Iesu,” ma ua alu atu e saʻili o ia. Ae ona o lona tulaga lē mamā, ua ia faaofiofi atu ai i le va o le motu o tagata ma taumafai e aua neʻi mātauina o ia e se isi. Ua faapea ifo lenei fafine: “Afai ou te paʻi atu tau lava o ona ofu tele, ona ou toe malosi ai lea.” O lea, ua paʻi atu o ia i le pito o le ofu o Iesu, ma o le taimi lava lea ua ia lagona ai ʻle teʻa ese o le maʻi sa ia tigāina ai.’—Mareko 5:27-29.

Ua fetalai atu Iesu: “O ai na paʻi mai iā te aʻu?” Faamata o ā ni faalogona o lenei fafine ina ua faalogo atu i na upu? Ua faapea ane Peteru: “O loo lolofi ma fetaomi mai le motu o tagata iā te oe.” Ae aiseā la ua fesili ai Iesu, po o ai na paʻi atu iā te ia? Ua fetalai atu o ia: “Na paʻi mai lava se tasi iā te aʻu; auā ua ou iloa ua alu ese atu le mana mai iā te aʻu.”—Luka 8:45, 46.

Ina ua iloa e le fafine e lē mafai ona lilo o ia, ona fefe ai lea ma tetemū, ma ua sau ma faapaʻū i luma o Iesu. Ua ia faamatala atu e faatatau i lona maʻi, ma o lea ua faamālōlōina o ia. O lea, ua faapea atu ai Iesu iā te ia i se auala māfana ma agalelei: “Loʻu afafine e, ua e malosi ona o lou faatuatua. Alu ia ma le filemu, ma ia e mālōlō mai lou maʻi tigā.”—Mareko 5:34.

O le mea moni, o Lē ua filifilia e le Atua e pulea le lalolagi o sē e māfana ma e agaalofa. E lē gata e manatu mamafa mai i tagata, ae e iai foʻi lona mana e fesoasoani ai iā i latou.

Faitau Atili

TUSI MA POLOSIUA

Po o le a Faaiʻuina ea Mafatiaga?

Ua taʻua i le Tusi Paia e ʻinoʻino le Atua i faiga lē tonu ma e manatu mamafa mai i tagata. O ā aogā e te maua mai ai?